គណបក្សកុម្មុយនិស្តចិនបើកសមាជលើកទី២០ ពីថ្ងៃទី១៦ដល់ថ្ងៃទី ២២ តុលា
នៅក្នុងប្រទេសចិន គណបក្សកុម្មុយនិស្តបើកធ្វើសមាជលើកទី២០ ពីថ្ងៃអាទិត្យ ទី១៦ដល់ថ្ងៃសៅរ៍ ទី២២ តុលា។ សមាជរបស់បក្សកម្មុយនិស្តចិនរៀបចំឡើង ខណៈដែលប្រទេសកំពុងបន្តអនុវត្តនយោបាយសូន្យកូវីដ និងចំពេលដែលពិភពលោកកំពុងវិលវល់ដោយសង្រ្គាមរុស្ស៊ីឈ្លានពានអ៊ុយក្រែន។ គួរបញ្ជាក់ថា គណបក្សកម្មុយនិស្តចិនបានរៀបចំសមាជនៅរៀងរាល់ ៥ឆ្នាំម្តង និងមានកម្មវត្ថុជ្រើសរើសថ្នាក់ដឹកនាំថ្មី រួមទាំងការកំណត់គោលនយោបាយថ្មីសម្រាប់ ៥ឆ្នាំបន្ទាប់។ តែប្រធានាធិបតីលោកស៊ី ជីនពីនដែលបានកាន់តំណែងជាប់គ្នាចំនួនពីរអាណត្តិរយៈពេល ១០ឆ្នាំតាំងពីឆ្នាំ ២០១២ ត្រូវបានគេមើលឃើញថា អាចនឹងត្រូវជាប់ឆ្នោតអាណត្តិថ្មីសម្រាប់រយៈពេល ៥ឆ្នាំបន្ថែមទៀត។ សំណួរដែលកំពុងចោទឡើង តើមានការប្រឆាំងនឹងមនុស្សខ្លាំងចិនលោកស៊ី ជីនពីងដែរ ឬទេ។ បើតាមអ្នកជំនាញបារាំងលោកហ្សង់ ភ្ជែរ កាបេស្តង់ មានបញ្ហាសំខាន់ចំនួន ៣ ដែលកំពុងចោទឡើងនៅផ្ទៃក្នុងគណបក្សកុម្មុយនិស្ត។
ចុះផ្សាយនៅថ្ងៃ៖
ស្តាប់ - ០១:៥៥
« ការប្រឆាំងនឹងលោកស៊ី ជីនពីងផ្តោតលើប្រធានរឿងជាច្រើន។ ប្រធានរឿងទី១ ទាក់ទងនឹងកំណែទម្រង់រដ្ឋធម្មនុញ្ញដែលអនុញ្ញាតឲ្យប្រធានាធិបតីអាចកាន់តំណែងលើសពីចំនួន ២អាណត្តិរយៈពេល ១០ឆ្នាំ។ ប្រធានរឿងទី២ ដែលកំពុងពុះចែកនៅផ្ទៃក្នុងគណបក្សកុម្មុយនិស្តគឺទាក់ទងនឹងកន្លែងរបស់វិស័យសេដ្ឋកិច្ចឯកជនដែលលោកស៊ី ជីនពីងចង់ទៅក្តាប់ក្នុងដៃ។ បើនិយាយជាលក្ខណៈសេដ្ឋកិច្ច នេះជានយោបាយសេដ្ឋកិច្ចមួយដើរបញ្រ្ចាស់ទិស ពិសេសនៅក្នុងសម័យសេដ្ឋកិច្ចដើរថយក្រោយ និងកំណើនសេដ្ឋកិច្ចធ្លាក់ចុះ។
មានយុវជនជាច្រើនពិបាករកការងារធ្វើដោយសារវិបត្តិកូវីដ ហើយរោងចក្រឯកជនជាច្រើនបានបិទទ្វារ។ ចំណែកប្រធានរឿងទី៣ ទាក់ទងនឹងកម្រិតភាពតានតឹងដែលចិនមានជាមួយអាមេរិក។ តើវិធានការការទូតថ្មីរបៀបណាដែលចិនត្រូវជ្រើសរើសដើម្បីបន្តត តាំងនឹងអាមេរិក។ គេបានឃើញកន្លងមកថា ជម្រើសនយោបាយការទូតកាចរបស់ចិនបានធ្វើឲ្យរូបភាពចិនធ្លាក់ចុះខ្លាំងគួរឲ្យកត់សម្គាល់នៅអឺរ៉ុប ពិសេសនៅក្នុងបណ្តាប្រទេសប្រជាធិបតេយ្យ។
ពិតណាស់ ចិនបានឆ្លើយដោយបញ្ជាក់ពីការមិនឈឺក្បាលលើរឿងនេះ ព្រោះចិនងាករកក្រុមប្រទេសប៉ែកខាងត្បូងដោយគិតថាក្រុមប្រទេសទាំងនេះបានគាំទ្រខ្លួន។ ប្រាកដហើយ ពិតមែនតែប្រទេសជាច្រើននៅប៉ែកខាងត្បូងមិនបានបង្ហាញជំហរគាំទ្រចិនផ្កាប់មុខមែន តែក៏មិនបានប្រឆាំងចិនដែរដោយព្យាយាមឈរនៅកណ្តាលដើម្បីអាចទាញបានផលចំណេញទាំងពីចិនផង និងពីបស្ចិមលោកផង។ ទោះជាយ៉ាងនេះក្តី ជម្រើសនយោបាយការទូតរបស់ចិនកំពុងពុះចែកនៅផ្ទៃក្នុងគណបក្សកុម្មុយនិស្តចិន ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ