សង្គមស៊ីវិលចិន រលាយរូបរាង ក្រោមអំណាច១០ឆ្នាំរបស់ស៊ីជីនពីង
ចុះផ្សាយនៅថ្ងៃ៖
ស្តាប់ - ០៤:៥២
ពេលវេលាល្អ ដែលបើកទូលាយឱ្យសកម្មជនស៊ីវិល អាចបញ្ចេញមតិយោបល់ ឬសកម្មភាពខ្លះដើម្បីបុព្វហេតុសង្គម បានកន្លងផុតទៅហើយ។ ១០ឆ្នាំក្រោមអំណាចរបស់លោក ស៊ី ជីនពីង សកម្មជនសិទ្ធិមនុស្ស បរិស្ថាន ... ត្រូវជ្រើសរើសរវាង ការបិទមាត់សំងំស្ងៀម ឬរត់គេចចេញពីប្រទេស ឬត្រូវជាប់ឃុំឃាំង និងស្ថិតក្រោមការឃ្លាំមើល។ ស្ថានភាពសង្គមស៊ីវិលចិន បានធ្លាក់ចុះយ៉ាងខ្លាំង នេះបើតាមការរៀបរាប់របស់ សកម្មជននិងបញ្ញាវន្ត ដែលAFPភ្នាក់ងារសារព័ត៌មានបារាំងបានជួប។
សកម្មជនការពារសិទ្ធិមនុស្ស សកម្មជនការពារសិទ្ធិអ្នកស្រលាញ់ភេទដូចគ្នា សកម្មជនការពារបរិស្ថាន បុគ្គលិកធ្វើការឱ្យអង្គការក្រៅរដ្ឋាភិបាល សាស្ត្រាចារ្យនៅសកលវិទ្យាល័យ អ្នកសារព័ត៌មានឯករាជ្យ មានចំណុចរួមមួយដូចគ្នា គឺត្រូវបានអាជ្ញាធរបំបិទមាត់ជិត ក្នុងរយៈពេល១០ឆ្នាំចុងក្រោយដែលប្រទេសចិនស្ថិតក្រោមការគ្រប់គ្រងរបស់ប្រធានាធិបតីចិន លោក ស៊ី ជីនពីង។ អ្នកបន្តធ្វើសកម្មភាព ត្រូវរងការបៀតបៀនពីសំណាក់ភ្នាក់ងារសន្តិសុខឥតឈប់ឈរ ខ្លះត្រូវទទួលការកោះហៅទៅសួរចម្លើយស្ទើរជារៀងរាល់សប្តាហ៍។ បុគ្គលិកអង្គការក្រៅរដ្ឋាភិបាលដើម្បីសិទ្ធិអ្នកស្រលាញ់ភេទដូចគ្នា បានចូលទៅផ្តល់ចម្លើយ ជាញឹកញយនិងម្តងៗ រយៈពេលជាង២៤ម៉ោង។
ក្នុងទសវត្សរ៍ឆ្នាំ១៩៨០ គេអាចជជែកពិភាក្សា ឬបោះពុម្ពផ្សាយសៀវភៅ ទាក់ទងនឹងតម្លៃនៃសេរីភាពនិងសង្គមស៊ីវិលបានខ្លះ។ នេះបើតាមការអះអាងរបស់អ្នកស្រី Gao Yu អ្នកកាសែតឯករាជ្យនៅប៉េកាំងនិងដែលធ្លាប់បានជាប់ពន្ធនាគារពីឆ្នាំ២០១៥-២០១៩ ពីបទបានធ្វើឱ្យធ្លាយឯកសារផ្ទៃក្នុងបក្ស។ បច្ចុប្បន្នមានអាយុ៧៨ឆ្នាំ អ្នកស្រីGao Yu ស្ថិតនៅឃ្លាំមើលរបស់អាជ្ញាធរ ដោយមិនអាចទទួលទូរស័ព្ទពីបរទេស និងមិនអាចទទួលស្វាគមន៍-ជួបជុំមិត្តភក្តិទេ។ តើនេះមិនមែនជាដំណើរថយក្រោយត្រលប់ទៅរករបបបែបម៉ៅនិយមទេឬ ?! សម្រាប់សកម្មជនបរិស្ថានដែលសុំមិនបញ្ចេញឈ្មោះ នៅឆ្នាំ២០១៤ គេអាចលើកបដាមានសារប្រឆាំង ឬដឹកនាំការងារវិទ្យាសាស្ត្រនៅផ្ទាល់កន្លែង ហើយសហការជាមួយអ្នកសារព័ត៌មានចិនដើម្បីបរិហារសកម្មភាពណាដែលប៉ះពាល់ដល់បរិស្ថាន។ ប៉ុន្តែឥលូវគេត្រូវជូនដំណឹងទៅប៉ូលិសជាមុនសិន មុននឹងអាចធ្វើសកម្មភាពអ្វីមួយបាន។
ផ្ទុយពីប្រធានាធិបតី ហ៊ូ ជីនតាវ ចំហាយនៃការបំបិទសិទ្ធិសេរីភាព បានជះក្លិនតាំងពីឆ្នាំ២០១៣មក ពោលគឺតាំងពីលោកស៊ី ជីនពីង ចាប់ឡើងកាន់អំណាចភ្លាម។ គណបក្សកុម្មុយនិស្តចិន បានបញ្ចេញឯកសារផ្ទៃក្នុង ហាមឃាត់មិនឱ្យមានការលើកស្ទួយគំនិតនិងទស្សនៈបែបសេរីនិយមរបស់លោកខាងលិច មានជាអាទិ៍សកម្មភាពក្នុងផ្នែកសង្គមស៊ីវិល និងសេរីភាពសារព័ត៌មាន ទេ។ បម្រាមបានលេចរូបរាងច្បាស់លាស់ នៅឆ្នាំ២០១៥ តាមរយៈ ការចាប់ខ្លួន មេធាវីនិងសកម្មជនចំនួនជាង៣រយនាក់ ក្នុងយុទ្ធនាការ ៧០៩ (ព្រោះហេតុការណ៍ប្រព្រឹត្តទៅ នៅថ្ងៃទី ៩ ខែកក្កដា ២០១៥)។ នៅឆ្នាំដដែលនោះ ចិនបានចេញគម្រោងច្បាប់ហាមឃាត់មិនឱ្យអង្គការក្រៅរដ្ឋាភិបាលទទួលជំនួយហិរញ្ញវត្ថុនិងមូលនិធិពីបរទេស។ គម្រោងច្បាប់បានចូលជាធរមាននៅឆ្នាំ២០១៧ និងបានធ្វើឱ្យអង្គការក្រៅរដ្ឋាភិបាល ជាច្រើនរលំរលាយ។
នៅសកលវិទ្យាល័យ ក៏មិនប្រសើរ។ សកម្មភាពដែលធ្លាប់អនុគ្រោះឱ្យធ្វើ ត្រូវបញ្ឈប់។ ការងារបំពាក់បំប៉នមនោគមវិជ្ជា ដូចជាមុខវិជ្ជាអប់រំនយោបាយត្រូវបានពង្រឹង។ និស្សិតមាននិន្នាការគាំទ្រអ្នកស្រលាញ់ភេទដូចគ្នា អាចនឹងត្រូវរងទណ្ឌកម្ម ដោយគ្រាន់តែចែកចាយទង់ជាតិពណ៌ឥន្ធនូទៅមិត្តផ្សេងទៀត។ សាស្ត្រាចារ្យ ត្រូវចេះយកសុន្ទរកថារបស់អ្នកកាន់អំណាចមកធ្វើជាត្រីមុខ។ អ្នកមិនចេះពន់ពេននិងធ្វើតាម នឹងត្រូវខ្ទាតចេញពីតួនាទី ឬស្ថិតនៅក្រោមការតាមដានពីសំណាក់សិស្សនិងនិស្សិតរបស់ខ្លួន។ និស្សិតបានក្លាយជាអ្នកចាំត្រួតពិនិត្យឃ្លាប្រយោគរបស់គ្រូ មិនមែនមកសិក្សាទស្សនៈគ្រូតាមរយៈការជជែកវែកញែកឡើយ។ វប្បធម៌បរិហារបានលូតលាស់យ៉ាងខ្លាំងក្នុងចំណោមបញ្ញាជនចិន នារយៈពេល១០ឆ្នាំចុងក្រោយមកនេះ។ នេះជាសម្រែកសោកស្តាយរបស់លោក Wu Qiang អតីតសាស្ត្រាចារ្យវិទ្យាសាស្ត្រនយោបាយ នៅសកលវិទ្យាល័យដ៏ល្បីល្បាញTsinghua ប្រចាំទីក្រុងប៉េកាំង។
១០ឆ្នាំនៃអំណាចរបស់លោកស៊ីជីនពីង សកម្មជនស៊ីវិលជាច្រើនបានជ្រើសរើសរត់ចេញពីប្រទេសចិន ឬត្រូវសំងំបិទមាត់ បើមិនចង់ឆ្លងកាត់ចម្រឹងដែក។ ក៏មានដែរ សកម្មជនដែលបន្តជំនះធ្វើសកម្មភាព។ ថ្វីបើស្ថានភាពពេលនេះ ទំនងជាអាក្រក់ខ្លាំងមែន តែគេនៅតែបន្តបញ្ចេញមតិយោបល់។ នេះបើតាមស្ថាបនិកអង្គការការពារសមភាពស្ត្រីនិងបុរស។ ប៉ុន្តែជាសង្គ្រាមដែលគ្មានថ្ងៃបានជោគជ័យឡើយ ព្រោះបើតាមបុគ្គលិកការពារបរិស្ថាន ក្នុងក្រសែភ្នែករបស់ក្រុមអ្នកជាតិនិយមចិន អ្នកបំរើការឱ្យអង្គការក្រៅរដ្ឋាភិបាលជាក្រុមប្រឆាំងចិន ឬជាក្រុមដែលលោកខាងលិចបានលាងខួរក្បាល។ កាន់តែគួរឱ្យព្រួយបារម្ភ និងដើម្បីកុំឱ្យមានសកម្មជនសង្គមស៊ីវិលដុះក្នុងរង្វង់ក្មេងជំនាន់ក្រោយ រដ្ឋាភិបាលបានតាមដានមើល ដោយសម្ងាត់បំផុតរាល់គ្រប់ជនណាដែលផ្តើមសកម្មភាពតូចតាច។ នេះបើតាមCharles សកម្មជនការពារសិទ្ធិអ្នកធ្វើការ ដែលមានមិត្តភក្តិពីរនាក់ កំពុងជាប់ឃុំឃាំងតាំងពីជាងមួយឆ្នាំមកហើយ នៅក្នុងប្រទេសចិន ក្រោមបទចោទប្រកាន់ធ្វើវិទ្ធង្សនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ