សិង្ហបុរី គ្រោងលុបចោលច្បាប់ហាមឃាត់ការស្រលាញ់ភេទដូចគ្នា
លោក លី សៀនឡុង នាយករដ្ឋមន្ត្រីសិង្ហបុរី បានប្រកាសនៅថ្ងៃអាទិត្យទី ២១សីហា ២០២២ ថា រដ្ឋាភិបាលគ្រោងនឹងរំលាយចោលច្បាប់ ដ៏ចាស់គំរិល ដែលហាមឃាត់និងដាក់ទោសអ្នកស្រលាញ់ភេទដូចគ្នា នៅក្នុងពេលដ៏ឆាប់ៗខាងមុខនេះ។ ផ្ទុយពីឥណ្ឌានិងតៃវ៉ាន់ សិង្ហបុរីធ្លាប់សាកល្បងលុបច្បាប់នេះជាច្រើនលើកហើយតែមិនបានសម្រេច។
ចុះផ្សាយនៅថ្ងៃ៖
“រដ្ឋាភិបាលសិង្ហបុរី នឹងរំលាយច្បាប់ ហើយនឹងមិនយកទោសអ្នកដែលមានទំនាក់ទំនងផ្លូវភេទរវាងបុរសនិងបុរសដូចគ្នាទេ”។ វាជាការល្អដែលគួរធ្វើ និងដែលប្រជាពលរដ្ឋសិង្ហបុរីភាគច្រើនព្រមទទួលយកបានហើយ។ នេះជាប្រសាសន៍របស់លោកនាយករដ្ឋមន្ត្រីនៅក្នុងសុន្ទរកថានយោបាយ នាថ្ងៃអាទិត្យទី ២១សីហា ដោយបញ្ជាក់ថា រំលាយច្បាប់ គឺជាការវិវឌ្ឍដែលស្របទៅនឹងសង្គម និងការគិតរបស់មនុស្ស។ អ្នកស្រលាញ់ភេទដូចគ្នាចូលក្នុងសង្គមប្រសើរជាងមុនច្រើន។
បើតាមលោកនាយករដ្ឋមន្ត្រី ស្ថានការណ៍បានប្តូរផ្លាស់ច្រើន បើប្រៀបទៅឆ្នាំ២០០៧ ដែលអាជ្ញាធរសិង្ហបុរី បានសម្រេចចិត្តរក្សាទុកច្បាប់ហាមឃាត់ការស្រលាញ់ភេទដូចគ្នាសិន និងមិនទាន់អាចអនុវត្តបាន។
ដឹងថាប្រជាជនសិង្ហបុរីភាគច្រើនខ្លាចការលុបច្បាប់ទៅអាចធ្វើឱ្យមានការប្តូរផ្លាស់សង្គមសិង្ហបុរី លោកនាយករដ្ឋមន្ត្រីបានសន្យាថា ទោះបីជារដ្ឋាភិបាលធ្វើវិសោធនកម្មច្បាប់អនុគ្រោះដល់អ្នកស្រលាញ់ភេទដូចគ្នាមែន ប៉ុន្តែលោកនឹងបន្តការពារច្បាប់អាពាហ៍ពិពាហ៍ តាមនិយមន័យដើម គឺធ្វើឡើង រវាងស្ត្រីម្នាក់ និងបុរសម្នាក់។
សូមបញ្ជាក់ថា សិង្ហបុរីមានច្បាប់ហាមឃាត់សកម្មភាពស្រលាញ់ភេទដូចគ្នា មាត្រា៣៧៧A នៃក្រមព្រហ្មទណ្ឌ ជាមរតកបន្សល់ទុកតាំងពីសម័យក្រោមអាណានិគមនិយមអង់គ្លេសមក ដោយគ្រោងដាក់ទោសធ្ងន់បំផុត ដល់ទៅ ២ឆ្នាំលើបុរសណាដែលរួមរក្សជាមួយបុរសភេទដូចគ្នា។ ច្បាប់មានចែងជាលាយលក្ខណ៍អក្សរមែន តែពុំមានការអនុវត្តជាក់ស្តែងទេ។ ប៉ុន្តែក្រុមអ្នកការពារសិទ្ធមនុស្សស្រលាញ់ភេទដូចគ្នា មានអារម្មណ៍ថាប៉ះពាល់ដល់សេរីភាពរបស់ពួកគេ និងមិនសក្តិសមសម្រាប់ប្រទេសដែលមានវប្បធម៌ជឿនលឿននិងរស់រវើកដូចសិង្ហបុរីនេះទេ។
សេចក្តីប្រកាសរបស់លោក លី សៀនឡុង ជាការបោះជំហានថ្មីដំបូង លើវិថីដ៏វែងនៃដំណើរឆ្ពោះទៅរកសមភាពពេញលេញរបស់ក្រុមអ្នកស្រលាញ់ភេទដូចគ្នា។ សម្ព័ន្ធសាសនាវិហារប្រូតេស្តង់នៅសិង្ហបុរី បានព្រមានប្រឆាំងនឹងការលុបច្បាប់នេះរួចហើយកាលពីថ្ងៃសុក្រ។ សិង្ហបុរីធ្លាប់បានប៉ុនប៉ងលុបច្បាប់នេះ កាលពីឆ្នាំ២០១៤ តែត្រូវបានតុលាការច្រានចោល។ ឥណ្ឌាដែលមានមរតកច្បាប់សល់ពីអាណានិគមនិយមអង់គ្លេសដូចសិង្ហបុរីដែរ បានលុបច្បាប់នេះចោលកាលពីឆ្នាំ២០១៨។ នៅអាស៊ី តៃវ៉ាន់ទទួលស្គាល់ និងអនុញ្ញាតឱ្យអ្នកស្រលាញ់ភេទគ្នារៀបអាពាហ៍ពិពាហ៍ដោយស្របច្បាប់ មុនគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ