ជនភៀសខ្លួនរ៉ូហ៊ីងយ៉ាទាមទារការកាពារសន្តិសុខ ខណៈប្រមុខសិទ្ធិមនុស្ស អ.ស.ប. ធ្វើទស្សនកិច្ចនៅបង់ក្លាដែស
កាលពីថ្ងៃអង្គារនេះ ជនជាតិរ៉ូហ៊ីងយ៉ាដែលបានភៀសខ្លួន ទៅរស់នៅក្នុងជំរំនៅប្រទេសបង់ក្លាដែស បានធ្វើការអង្វរអំពាវនាវដល់ ឧត្តមស្នងការ អង្គការសហប្រជាជាតិ ទទួលបន្ទុកសិទ្ធិមនុស្ស លោកស្រី មីស្ហែល បាស្ហឺឡេ ដើម្បីទទួលបានការការពារ ពីឃាតកម្ម ដែលបានកើតឡើងនៅក្នុងជំរំពួកគេ ក្នុងពេលថ្មីៗនេះ។ លោកស្រី បាស្ហឺឡេ ឥឡូវនេះកំពុងបំពេញទស្សនកិច្ចការងាររយៈពេលបួនថ្ងៃ នៅប្រទេសបង់ក្លាដែស មុនពេលដែលអាណត្តិការងាររបស់លោកស្រីនៅអង្គការសហប្រជាជាតិ ត្រូវបញ្ចប់នៅចុងខែសីហានេះ។
ចុះផ្សាយនៅថ្ងៃ៖
ស្តាប់ - ០២:០៦
លោកស្រី មីស្ហែល បាស្ហឺឡេ បានចំណាយពេលពេញមួយថ្ងៃ ដើម្បីផ្តល់ជំនួយសង្គ្រោះបន្ទាន់ និងជួបជាមួយជនជាតិភាគតិច រ៉ូហ៊ីងយ៉ាជិតមួយលាននាក់ ដែលបានភៀសខ្លួនចេញពីការធ្វើទុក្ខបុកម្នេញ នៅក្នុងប្រទេសភូមា ហើយបានមកតាំងទីលំនៅ នៅជំរំជនភៀសខ្លួន នៅព្រំដែនប្រទេសបង់ក្លាដែស។
សមាជិកជនជាតិភាគតិចនេះ កំពុង់រស់នៅប្រកបដោយភាពភ័យខ្លាចសារជាថ្មីម្តងទៀត ចំពោះសុវត្ថិភាពអាយុជីវិតរបស់ពួកគេ បន្ទាប់ពីប្រធានសហគមន៍រ៉ូហ៊ីងយ៉ា ពីរនាក់ត្រូវបានគេបាញ់សម្លាប់ កាលពីដើមខែសីហានេះ។
សូមបញ្ចាក់ថា អ្នករស់នៅភាគច្រើនក្នុងជំរំនេះ គឺជាជនជាតិភាគតិចឥស្លាម ដែលបានភៀសខ្លួនចេញពីប្រទេសភូមានៅក្នុងឆ្នាំ ២០១៧ ក្រោយមានការបង្ក្រាបដោយក្រុមយោធាភូមា។
យោងតាមអ្នកដឹកនាំសាសនាឥស្លាមម្នាក់ ដែលបានរាយការណ៍តាមទូរស័ព្ទ ប្រាប់ទីភ្នាក់ងារព័ត៌មាន AFP ថា ប្រជាជននៅក្នុងជំរំ បានលើកអំពីបញ្ហាឃាតកម្មនេះឡើង ក៏ដូចជាវិធីសាស្រ្តក្នុងការពង្រឹងសន្តិសុខសុវត្តិភាពនៅក្នុងជំរុំ ជាមួយលោកស្រី ឧត្តមស្នងការផងដែរ។ ក្រុមជនជាតិភាគតិចនេះ ជាពិសេសក៏បានសង្កត់ធ្ងន់ ទាមទារ អោយមានការជ្រោមជ្រែង ពីសំណាក់អង្គការសហប្រជាជាតិដើម្បីទទួលបាននូវការធានាសុខសន្តិភាព នៅទីលំនៅជាបណ្តោះអាសន្នរបស់ពួកគេនេះ។
ការពិតបញ្ហាសន្តិសុខនៅក្នុងជំរុំនេះ គឺមិនមែនជាបញ្ហាថ្មីឡើយ រឿងឃាតកម្ម ការចាប់ជំរិត និងការជួញដូរគ្រឿងញៀនត្រូវបានកើតឡើងជាប្រចាំ។ ជាក់ស្តែងកាលពីខែកញ្ញាឆ្នាំមុននេះ មេដឹកនាំកំពូលរបស់ជនជាតិរ៉ូហ៊ីងយ៉ាដែលបាន ធើ្វបទបង្ហាញក្នុងកិច្ចប្រជុំអង្គការសហប្រជាជាតិនៅទីក្រុងហ្សឺណែវ ត្រូវបានគេធ្វើឃាត ហើយបន្ទាប់មកសិស្ស និងគ្រូបង្រៀនជនជាតិរ៉ូហ៊ីងយ៉ា ប្រាំមួយនាក់ទៀតក៏ត្រូវបានគេសម្លាប់ នៅឯសាលាសាសនា ឥស្លាមមួយ។
ការសម្លាប់ទាំងអស់រហូតមកដល់ពេលនេះ ត្រូវបានគេសង្ស័យថាជាទង្វើរបស់ ក្រុមបះបោរប្រដាប់អាវុធ អារ៉ាកាន់ ដែរធ្លាប់ត្រូវបានការចោទប្រកាន់ពីបទជួញដូរគ្រឿងញៀន និងបទសម្លាប់គូប្រជែងនយោបាយ។
យ៉ាងណាមិញ ស្នងការទទួលបន្ទុកជនភៀសខ្លួនរបស់បង់ក្លាដែស បានបញ្ជាក់ប្រាប់លោកស្រី ប្រមុខសិទ្ធិមនុស្សអង្គការសហប្រជាជាតិថា រដ្ឋាភិបាលបង់ក្លាដែសបានចាត់វិធានការគ្រប់ប្រភេទរួចមកហើយ ដើម្បីកែលម្អស្ថានភាពសន្តិសុខនៅក្នុងជំរំនេះ ហើយលោកក៏បានលើកឡើងផងដែល អំពីគំរោងរបស់រដ្ឋាភិបាល ក្នុងការបង្កើនកម្រិតនៃការសិក្សាជាបណ្តើរៗ សម្រាប់កុមារជនភៀសខ្លួនទាំងអស់ នៅក្នុងជំរំនេះ។
លោកស្រី មីស្ហែល បាស្ហឺឡេ នឹងត្រូវធ្វើសេចក្តីថ្លែងការណ៍តាម ប្រព័ន្ធផ្សព្វផ្សាយក្នុងរដ្ឋធានី Dhaka នៅថ្ងៃពុធនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ