លោកស្រីឧត្តមស្នងការសិទ្ធិមនុស្ស ទៅបង់ក្លាដែស ដើម្បីពិនិត្យស្ថានភាពជំរំជនភៀសខ្លួនរ៉ូហ៊ីងយ៉ា
លោកស្រី មីឈែល បាឆឺឡេ ឧត្តមស្នងការទទួលបន្ទុកកិច្ចការសិទ្ធិមនុស្ស នៃអង្គការសហប្រជាជាតិ បានទៅដល់ប្រទេសបង់ក្លាដែស នៅថ្ងៃអាទិត្យទី១៤សីហា។ នៅក្នុងដំណើរធ្វើទស្សនកិច្ច៤ថ្ងៃនេះ លោកស្រីនឹងធ្វើដំណើរ ទៅពិនិត្យស្ថានភាពនៅឯជំរំជនភៀសខ្លួនរ៉ូហ៊ីងយ៉ា ដែលស្ថិតនៅភាគខាងកើតបង់ក្លាដែស មិនឆ្ងាយប៉ុន្មានពីព្រំដែនភូមា។
ចុះផ្សាយនៅថ្ងៃ៖
ស្តាប់ - ០២:១០
យ៉ាងហោចណាស់ មានជនជាតិរ៉ូហ៊ីងយ៉ា ចំនួនជិត១លាននាក់ ដែលបានរត់គេចពីការកាប់សម្លាប់នៅភូមាកាលពីឆ្នាំ២០១៧ ហើយបច្ចុប្បន្ន រស់នៅក្នុងលក្ខខណ្ឌយ៉ាងលំបាកលំបិនបំផុត នៅក្នុងជំរំភាគខាងកើតប្រទេសបង់ក្លាដែស។ កាលពីខែកក្កដាកន្លងទៅ ស្ថាប័នយុត្តិធម៌កំពូល នៃអង្គការសហប្រជាជាតិ បានទទួលស្គាល់ថា គឺប្រទេសភូមាដែលជាអ្នកទទួលខុសត្រូវ ចំពោះអំពើប្រល័យពូជសាសន៍ ធ្វើទៅលើប្រជាជនរ៉ូហ៊ីងយ៉ា។
គួរបញ្ជាក់ថា ជនភៀសខ្លួនរ៉ូហ៊ីងយ៉ា បានបដិសេធ មិនព្រមត្រលប់ទៅភូមាវិញទេ ល្គឹកណាមិនមានការធានាជាក់ច្បាស់ណាមួយ ថារបបសិកភូមា នឹងមិនកាប់សម្លាប់ពួកគេសាជាថ្មី។ តែយ៉ាងណាបញ្ហារ៉ាំរ៉ៃ នៃជំរំជនភៀសខ្លួនរ៉ូហ៊ីងយ៉ានៅលើទឹកដីបង់ក្លាដែសនេះ កំពុងតែធ្វើឲ្យរដ្ឋាភិបាលប្រទេសនេះ អន្ទះសារចង់ឲ្យវាចប់ឆាប់ៗ។
ទៅដល់រដ្ឋធានីដាកា និងជួបជាមួយលោកស្រីនាយករដ្ឋមន្ត្រីបង់ក្លាដែស នៅថ្ងៃអាទិត្យ លោកស្រីមីឈែល បាឆឺឡេ ឧត្តមស្នងការសិទ្ធិមនុស្សនៃអង្គការសហប្រជាជាតិ នឹងធ្វើដំណើរទៅជំរំជនភៀសខ្លួនរ៉ូហ៊ីងយ៉ានៅថ្ងៃចន្ទ។
គួរបញ្ជាក់ថា រដ្ឋាភិបាលបង់ក្លាដែស ដឹកនាំដោយលោកស្រី Sheikh Hasina ក៏បានរងការរិះគន់ពីសហគមអន្តរជាតិ ព្រមទាំងអង្គការសិទ្ធិមនុស្សនានាដែរ ថាមិនគោរពសិទ្ធិមនុស្ស។ អង្គការសិទ្ធិមនុស្សចំនួន៩ ដែលក្នុងនោះមាន Human Rights Watch បានរួមគ្នាអំពាវនាវ ឲ្យលោកស្រីមីឈែល បាឆឺឡេ ត្រូវតែថ្លែងការណ៍ជាសាធារណៈ ប្រាប់ទៅ រដ្ឋាភិបាលបង់ក្លាដែស ថាត្រូវតែបញ្ឈប់ជាបន្ទាន់ នូវសកម្មភាពរំលោភបំពាននានា ដូចជាការប្រហារជីវិតមនុស្សក្រៅប្រព័ន្ធច្បាប់ ការធ្វើទារុណកម្ម ព្រមទាំងការបាត់ខ្លួនដោយបង្ខំជាដើម។
យោងតាមក្រុមសកម្មជននយោបាយបង់ក្លាដែស អាជ្ញាធរសន្តិសុខនៃរដ្ឋាភិបាលរបស់លោកស្រី Sheikh Hasina បានសម្លាប់មនុស្សជាច្រើនពាន់នាក់ នៅក្នុងករណីបាញ់រះជាច្រើនដង ចំណែកសកម្មជននយោបាយប្រឆាំងជាច្រើនរយនាក់ទៀត បានបាត់ខ្លួន។
យ៉ាងណាក៏ដោយ រដ្ឋាភិបាលបងក្លាដែស បានបដិសេធការចោទប្រកាន់ នឹងបានលើកឡើងថា លោកស្រីឧត្តមស្នងការសិទ្ធិមនុស្ស នឹងបានមកឃើញនឹងភ្នែកជាក់ស្តែង ថាបង់ក្លាដែសបានអភិវឌ្ឍន៍រីកចម្រើនកម្រិតណា និងបានឈានខ្ពស់ខ្លាំងក្នុងការគោរពសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ