អ.ស.ប.៖ក្រោយគ្រោះទឹកជំនន់ មានកុមារបង់ក្លាដែសចំនួន ៣,៥លាននាក់កំពុងខ្វះទឹកស្អាតប្រើប្រាស់
មូលនិធិអង្គការសហប្រជាជាតិដើម្បីកុមារហៅកាត់យូនីសេហ្វបានប្រកាសក្នុងថ្ងៃសុក្រ ទី២៤ មិថុនាថា មានកុមារបង់ក្លាដែសចំនួន ៣លាន ៥សែននាក់កំពុងខ្វះទឹកស្អាតប្រើប្រាស់។ កង្វះទឹកស្អាតប្រើប្រាស់បានកើតមានឡើងនៅក្រោយគ្រោះទឹកជំនន់កាលពីពេលថ្មីៗនេះ។ ដើម្បីដោះស្រាយបញ្ហាកង្វះទឹកស្អាតប្រើប្រាស់សម្រាប់កុមារបង់ក្លាដែសទាំង ៣លាន ៥សែននាក់ អង្គការយូនីសេហ្វត្រូវការកញ្ចប់ថវិកាបន្ទាន់ចំនួន ២លាន ៥សែនដុល្លារ។
ចុះផ្សាយនៅថ្ងៃ៖
ស្តាប់ - ០១:៤៤
លោកស្ហឹលដុន យែត (Sheldon Yett) អ្នកតំណាងអង្គការយូនីសេហ្វនៅបង់ក្លាដែសបានថ្លែងតាមវីដេអូទៅកាន់ក្រុមអ្នកកាសែតក្នុងទីក្រុងហ្សឺណែវ ប្រទេសស៊្វីសថា មានកុមារបង់ក្លាដែសចំនួន ៣លាន ៥សែននាក់ត្រូវការជាបន្ទាន់នូវទឹកស្អាតប្រើប្រាស់។ តាមលោកស្ហឹលដុន យែត កង្វះទឹកស្អាតប្រើប្រាស់នេះបានកើតមាននៅតំបន់ប៉ែកឦសានដែលបានរងគ្រោះដោយទឹកជំនន់ធ្ងន់ធ្ងរកាលពីសប្តាហ៍កន្លងទៅ ក្នុងនោះ មាន ១២តំបន់ធំៗបានលិចទឹកទាំងស្រុង កំពុងខ្វះទឹកស្អាតប្រើប្រាស់ និងកំពុងខ្វះស្បៀង។ « កុមារត្រូវការជំនួយឥឡូវនេះ » នេះជាការអំពាវនាវរបស់លោកស្ហឹលដុន យែតដោយបន្ថែមថា ជំងឺកើតមានភ្លាមៗនៅពេលដែលមនុស្សបង្ខំចិត្តបរិភោគទឹកកខ្វក់។
អ្នកតំណាងអង្គការយូនីសេហ្វនៅបង់ក្លាដែសរូបនេះដដែលបានបញ្ជាក់ថា មានទីតាំងទឹកស្អាតជាង ៤០ ០០០កន្លែង និងបង្គន់ជិត ៥០ ០០០បង្គន់ត្រូវបានបំផ្លាញដោយទឹកជំនន់។ តាមលោកស្ហឹលដុន យែត ករណីរាករូស និងជំងឺបណ្តាលឲ្យស្លាប់ផ្សេងទៀតកំពុងបន្តកើតមានគួរឲ្យបារម្ភ។ ក្រៅពីបំផ្លាញទីតាំងទឹកស្អាត និងបង្គន់អនាម័យ គ្រោះទឹកជំនន់ក៏បានបំផ្លាញហេដ្ឋារចនាសម្ព័ន្ធមន្ទីរពេទ្យអស់ ៩០% និងបានពន្លិចសាលារៀន រួមទាំងមណ្ឌលសិក្សាជាង ៥ ០០០កន្លែងនៅតំបន់ជុំវិញទីក្រុង Sylhet ស្ថិតប៉ែកឦសាន។ នៅពេលនេះ អង្គការយូនីសេហ្វបានចែកចាយថ្នាំបន្សុតទឹកចំនួន ១,៧៥លានគ្រាប់ ប៊ីដុងទឹកចំនួន ៩ ០០០ប៊ីដុង និងឧបករណ៍អនាម័យរាប់ពាន់សម្រាប់ស្ត្រី និងក្មេងស្រីជំទង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ