លោកស៊ីថាការប្រឈមមុខដាក់គ្នារវាងមហាអំណាចនាំមកនូវផលវិបាកធ្ងន់ធ្ងរ
ថ្លែងនៅក្នុងវេទិកាសេដ្ឋកិច្ចពិភពលោកតាមអនឡាញ ប្រធានាធិបតីចិនលោក ស៊ី ជីនពីងបានអំពាវនាវឲ្យមានកិច្ចសហប្រតិបត្តិការគ្នាដើម្បីដោះស្រាយបញ្ហាប្រឈមជាសកល។ បន្ថែមលើនេះ មេដឹកនាំចិនក៏បានព្រមានផងដែរប្រឆាំងនឹងការប្រឈមមុខគ្នារវាងប្រទេសមហាអំណាចធំៗដែលលោកថានឹងនាំមកនូវផលវិបាកធ្ងន់ធ្ងរខ្លាំង។
ចុះផ្សាយនៅថ្ងៃ៖
ស្តាប់ - ០២:១៦
ដោយសារតែការរាត្បាតនៃជំងឺកូវីដនៅមិនទាន់បង្ហាញសញ្ញាធូរស្រាលនៅឡើយ កិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោកត្រូវប្រព្រឹត្តធ្វើតាមអនឡាញជាលើកទី២នាឆ្នាំ ២០២២នេះ។ សុន្ទរកថារបស់ប្រធានាធិបតីចិនក្នុងវេទិកាសេដ្ឋកិច្ចនាថ្ងៃចន្ទ ទី១៧ មករាម្សិលមិញដូចគ្នាភាគច្រើនទៅនឹងអ្វីដែលលោកបានថ្លែងកាលពីឆ្នាំទៅមិញដែរ។
ក្រៅតែពីបានតាំងខ្លួនថាជាអ្នកការពារគោលការណ៍ពហុភាគីនិយម លោកស៊ី ជីងពីនបានថ្លែងជំរុញឲ្យប្រទេសនានាធ្វើការសហការគ្នាដើម្បីដោះស្រាយបញ្ហាប្រឈមជាសកល និងជៀសវាងការបង្កើតបក្ខពួក ការគំរាមកំហែងបំភិតបំភ័យអ្នកដទៃដែលធ្វើឲ្យពិភពលោកទាំងមូលជួបគ្រោះថ្នាក់។ ទាក់ទិនវិបត្តិកូវីដវិញ លោកប្រធានាធិបតីចិនធ្លាប់បាននិយាយហើយដែរថាទំនុកចិត្តនិងកិច្ចសហប្រតិបត្តិការតំណាងឲ្យមធ្យោបាយដ៏ត្រឹមត្រូវតែមួយគត់ដើម្បីកម្ចាត់ជំងឺកូវីដ១៩។
ដោយមិននិយាយចោទប្រកាន់ប្រទេសណាមួយ មេដឹកនាំចិនក៏បានព្រមានប្រឆាំងផងដែរនឹងការនិយមជ្រុលផ្នែកមនោគមវិជ្ជា និងនយោបាយនៃបញ្ហាសេដ្ឋកិច្ច វិទ្យាសាស្ត្រ ព្រមទាំងបច្ចេកវិទ្យា។ លោកស៊ីបានបន្ថែមថាប្រវត្តិសាស្ត្របានបង្ហាញឲ្យគេឃើញច្បាស់ម្តងហើយម្តងទៀតថាការប្រឈមមុខដាក់គ្នាមិនអាចដោះស្រាយបញ្ហាបានទេ តែវានាំមកតែផលវិបាកធ្ងន់ធ្ងរប៉ុណ្ណោះ។
ជាការគួរឲ្យកត់សម្គាល់ការអត្ថាធិប្បាយរបស់មេដឹកនាំចិន ធ្វើឡើងខណៈដែលទំនាក់ទំនងរវាងទីក្រុងប៉េកាំងនិងវ៉ាស៊ីនតោន មានភាពតានតឹងខ្លាំងនឹងគ្នាជុំវិញបញ្ហាជាច្រើនដូចជាអធិបតេយ្យភាពរបស់តៃវ៉ាន់ កម្មសិទ្ធិបញ្ញា ពាណិជ្ជកម្ម និងបញ្ហាសិទ្ធិមនុស្សជាដើម។
ចិនបានចោទប្រកាន់អាមេរិកថាបានលេងនយោបាយបង្ខិតបង្ខំ និងគំរាមកំហែងផ្នែកសេដ្ឋកិច្ច។ ដោយឡែក ចិនខ្លួនឯងផ្ទាល់វិញក៏កំពុងប្រឈមនឹងការចោទប្រកាន់ថាបានធ្វើបាបគំរាមសម្លុតលើប្រទេសតូចៗក្នុងតំបន់អាស៊ីអាគ្នេយ៍ដែលកំពុងមានជម្លោះទាមទារទឹកដីជាមួយចិននៅឯសមុទ្រចិនខាងត្បូងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ