រដ្ឋអំណាចម៉ាឡេស៊ីរងការរិះគន់ខ្លាំងជុំវិញការឆ្លើយតបយឺតយ៉ាវចំពោះគ្រោះទឹកជំនន់
រដ្ឋាភិបាលក្រុងគូឡាឡាំពូកំពុងប្រឈមសម្ពាធយ៉ាងខ្លាំងពីប្រជាជនដែលរិះគន់រដ្ឋអំណាចថាមានភាពយឺតយ៉ាវជ្រុលហួសក្នុងការឆ្លើយតបនឹងគ្រោះទឹកជំនន់។ ជាគ្រោះទឹកជំនន់ដ៏អាក្រក់មិនធ្លាប់មានក្នុងប្រទេសម៉ាឡេស៊ីនារយៈពេលច្រើនឆ្នាំកន្លងមកនេះ។
ចុះផ្សាយនៅថ្ងៃ៖
ស្តាប់ - ០២:១៨
នៅក្នុងប្រទេសម៉ាឡេស៊ី យ៉ាងហោចមនុស្ស៤៨នាក់បានស្លាប់ ៥នាក់បាត់ខ្លួន និងរាប់ម៉ឺននាក់បានរត់ភៀសខ្លួនចេញពីផ្ទះសម្បែងនៅក្នុងជំនន់ទឹកភ្លៀងដ៏អាក្រក់ដែលកើតឡើងកាលពីសប្តាហ៍មុនក្នុងរដ្ឋចំនួន៨ដោយផ្នែកខ្លះបានជន់លិចទីក្រុងនិងភូមិមួយចំនួន។
រដ្ឋាភិបាលម៉ាឡេស៊ីកំពុងរងការរិះគន់យ៉ាងខ្លាំងដែលមិនបានទាញសញ្ញាអាសន្នប្រាប់ប្រជាជនឲ្យបានទាន់ពេលវេលានិងមានភាពយឺតយ៉ាវខ្លាំងហួសហេតុក្នុងការឆ្លើយទាំងការជួយសង្គ្រោះក្នុងអំឡុងនិងក្រោយគ្រោះទឹកជំនន់។
នៅខណៈពេលនេះ មានភក់នៅគ្រប់ទីកន្លែង មានសម្ភារៈប្រើប្រាស់ជាច្រើនត្រូវបានបំផ្លិចបំផ្លាញ រីឯគ្រឿងសង្ហារិមមានតម្លៃជាច្រើនត្រូវជន់លិចក្នុងទឹក។ អ្នកស្រុកម៉ាឡេស៊ី និងក្រុមអ្នកស្ម័គ្រចិត្តកំពុងនាំគ្នាអូសទាញសម្ភារៈរបស់របរចេញពីក្នុងទឹក និងបន្តប្រតិបត្តិការបោសសម្អាតគំនរសំរាម។
ប្រជាជនរងគ្រោះម៉ាឡេស៊ីជាច្រើន មានការខកចិត្តចំពោះអាជ្ញាធរជាខ្លាំង ដោយប្រជាជនខ្លះរអ៊ូរទាំថា មិនបានទទួលជំនួយពីរដ្ឋាភិបាលក្នុងគ្រាអាសន្នចាំបាច់ ហើយអ្នកខ្លះទៀតថា រដ្ឋាភិបាលពិតជាមានភាពយឺតយ៉ាវក្នុងបេសកកម្មជួយសង្គ្រោះ។ មិនតែប៉ុណ្ណោះ ឥឡូវនេះ នៅមកយឺតយ៉ាវក្នុងប្រតិបត្តិការបោសសម្អាតទៅទៀត។ បើតាមសម្តីអ្នកស្រុក Kartik Rao ប្រាប់ទីភ្នាក់ងារព័ត៌មាន AFP បើទោះបីជាប្រាំពីរថ្ងៃក្រោយទឹកជំនន់ទៅហើយ ក៏សំរាមនៅក្នុងសង្កាត់ Kartik Rao នេះ នៅមិនទាន់ត្រូវបានសម្អាតចេញនៅឡើយ។
នាយករដ្ឋមន្ត្រីម៉ាឡេស៊ីលោក អ៊ីស្មាអែល សាប៊្រី យ៉ាកុប (Ismail Sabri Yaakob) បានទទួលស្គាល់ភាពទន់ខ្សោយរបស់រដ្ឋអំណាចក្នុងការឆ្លើយតបទៅនឹងគ្រោះទឹកជំនន់ ប៉ុន្តែបានសន្យាថានឹងកែលម្អចំណុចខ្វះខាតទាំងនេះក្នុងពេលអនាគត។
គួរជ្រាបថា ប្រទេសម៉ាឡេស៊ីតែរងគ្រោះដោយទឹកជំនន់ជារៀងរាល់ឆ្នាំក្នុងរដូវខ្យល់មូសុងចាប់ពីខែវិច្ឆិកាដល់ខែកុម្ភៈ ប៉ុន្តែនៅខែធ្នូនេះ ជំនន់ទឹកភ្លៀងកំណាចខ្លាំងបំផុត បើគិតចាប់តាំងពីឆ្នាំ ២០១៤។ បើតាមអ្នកជំនាញ ទឹកជំនន់ដែលកាន់តែកំណាចខ្លាំង មានទំនាក់ទំនងនឹងការកើនឡើងនៃកំដៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ