ជប៉ុន សភាអនុម័តកញ្ចប់ថវិកាបន្ថែមប្រឈមនឹងកូវីដ
សភាជប៉ុនបានអនុម័តនៅថ្ងៃចន្ទទី ២០ធ្នូ២០២១នេះ កញ្ចប់ថវិកាជាតិបន្ថែម ប្រចាំឆ្នាំ២០២១-២២ ក្នុងកំរិតឯតទគ្គកម្ម។ តាមគម្រោង ថវិកាមួយភាគធំត្រូវយកទៅចំណាយក្នុងផែនការផ្តល់សន្ទុះសេដ្ឋកិច្ចជាតិ ក្រោយវិបត្តិកូវីដ១៩ ដែលនាយករដ្ឋមន្ត្រីជប៉ុន បានលើកឡើងកាលពីខែមុន។
ចុះផ្សាយនៅថ្ងៃ៖
ស្តាប់ - ០១:៥២
កញ្ចប់ថវិកាជាតិបន្ថែម ទំហំជិត ៣៦ម៉ឺនពាន់លានយ៉េន ឬត្រូវជាជាង២៨២ពាន់លានអឺរ៉ូ ទើបត្រូវបានសភាជប៉ុន អនុម័ត នៅថ្ងៃចន្ទទី ២០ធ្នូ ស្របតាមការព្រមព្រៀងរបស់រដ្ឋាភិបាលជប៉ុនកាលពីខែមុន និងបន្ទាប់ពីបានឆ្លងកាត់ការត្រួតពិនិត្យរបស់សភាជាន់ទាប កាលពីថ្ងៃពុធទី១៥ធ្នូ២០២១។
តាមគម្រោង ថវិកាមួយភាគធំ នឹងយកទៅបំប៉នគម្រោងផ្តល់សន្ទុះសេដ្ឋកិច្ចជាតិដែលស្នើឡើងដោយលោកនាយករដ្ឋមន្ត្រី ហ្វូមីអូ គីស្ហ៊ីដា នៅពេលបានក្លាយជាប្រមុខដឹកនាំរដ្ឋាភិបាលជប៉ុនភ្លាម។ នេះជាផែនការផ្តល់សន្ទុះសេដ្ឋកិច្ចជាតិជប៉ុនទីបី តាំងពីផ្ទុះកូវីដ១៩មក និងមានទំហំធំបំផុតមិនធ្លាប់មានក្នុងកំណត់ត្រាជប៉ុនទេ (៥៦ ០០០ពាន់លានយ៉េន)។ ដោយសារកញ្ចប់ថវិកាបន្ថែមនេះ នាយករដ្ឋមន្ត្រីជប៉ុនអាចសម្រេចវិធានការដ៏សំខាន់មួយនៃផែនការផ្តល់សន្ទុះសេដ្ឋកិច្ច គឺការចែកកាដូជាទឹកប្រាក់ចំនួន ៧៨៤អឺរ៉ូដល់គ្រប់យុវជនយុវនារីជប៉ុនអាយុ១៨ឆ្នាំ។
ថវិកាមួយផ្នែកទៀត តម្លៃជាង១៤៥ពាន់លានអឺរ៉ូ នឹងយកទៅចំណាយលើវិធានការទប់ស្កាត់ការរាតត្បាតរបស់កូវីដ១៩ និងសម្រាប់ទ្រទ្រង់ប្រព័ន្ធសុខាភិបាលជប៉ុន ដោយរាប់ទាំងការផ្តល់ប្រាក់ឧបត្ថម្ភដល់មន្ទីរពេទ្យផង។
ពន្លឿនកម្មវិធីចាក់ថ្នាំបង្ការ ដើម្បីឱ្យពលរដ្ឋជប៉ុនជិត៧៨%អាចទទួលវ៉ាក់សាំងបានពីរដូស និងការបញ្ជាទិញថ្នាំសម្រាប់ព្យាបាលជំងឺកូវីដ ក៏បានទទួលចំណែកប្រមាណជិត ១៥០០០លានដុល្លារ ពីគម្រោងថវិកាបន្ថែមដែលសភាបានអនុម័តនៅព្រឹកថ្ងៃចន្ទនេះដែរ។
ជាចុងក្រោយ កញ្ចប់ថវិកាបន្ថែម ក៏មានទុកមួយភាគសម្រាប់យកទៅលើកស្ទួយវិស័យទេសចរណ៍ក្នុងស្រុក តាមរយៈការផ្តល់ហិរញ្ញវត្ថុដោយផ្ទាល់ បញ្ចុះតម្លៃធ្វើដំណើរ និងស្នាក់នៅក្នុងសណ្ឋាគារ។ ដោយហេតុតែវិបត្តិកូវីដ១៩ វិស័យទេសចរណ៍ជប៉ុន ត្រូវផ្អាកស្ទើរទាំងស្រុង តាំងពីខែធ្នូឆ្នាំ២០២០មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ