បរិយាកាសតំបន់តានតឹងខ្លាំង ជប៉ុនដំឡើងកញ្ចប់ថវិកាការពារជាតិ ដល់កំពូល
ក្រសួងការពារជាតិជប៉ុន បានប្រកាសនៅថ្ងៃសុក្រទី ២៦វិច្ឆិកា ២០២១នេះ លើកគម្រោងថវិកាការពារជាតិ ដោយដំឡើងកញ្ចប់ថវិកាបន្ថែម យ៉ាងច្រើនបំផុតមិនធ្លាប់មាន ពោលគឺដល់ប្រមាណ ៦ពាន់លានអឺរ៉ូ សម្រាប់ពីពេលនេះដល់ថ្ងៃទី៣១មីនា២០២២។ ជប៉ុនត្រូវការបំប៉ោងថវិកាការពារជាតិ ដើម្បីពន្លឿនការទិញគ្រឿងសម្ភារៈបរិក្ខារយោធា ព្រោះភាពតានតឹងជាមួយចិន និងហានិភ័យបង្កឡើងដោយកូរ៉េខាងជើង បានធ្វើឱ្យស្ថានភាពភូមិសាស្ត្រនយោបាយ សន្តិសុខតំបន់ ធ្លាក់ដុនដាប កាន់តែធ្ងន់ធ្ងរទៅៗ និងអាក្រក់ខ្លាំង ហើយក្នុងសភាពលឿនរហ័សជ្រុលទៀត។
ចុះផ្សាយនៅថ្ងៃ៖
ស្តាប់ - ០២:១២
ជប៉ុនត្រូវការបន្ថែមថវិកា សម្រាប់យកទៅទិញមីស៊ីលបាញ់ស្ទាក់ និងមីស៊ីលការពារផ្ទៃអាកាស ទិញយន្តហោះល្បាត ឧទ្ធម្ភាគចក្រ ឬនាវាមុជទឹកបំពាក់មីស៊ីល។ ចំណាយផ្នែកខ្លះ ជាគម្រោងសម្រាប់ឆ្នាំក្រោយ ២០២២-២៣ទេ ប៉ុន្តែបើតាមក្រសួងការពារជាតិ បរិបទតំបន់បានជំរុញឱ្យជប៉ុនត្រូវតែពន្លឿនការបំពាក់គ្រឿងបរិកា្ខរឱ្យកងទ័ពជប៉ុន។
នៅក្នុងសៀវភៅស ស្តីពីផែនការការពារជាតិប្រចាំឆ្នាំ ចេញផ្សាយលើកចុងក្រោយកាលពីខែកក្កដា ២០២១ ជប៉ុនបានគូសបញ្ជាក់ថាភាពតានតឹងរវាងចិននិងអាមេរិកជុំវិញបញ្ហាកោះតៃវ៉ាន់ ជាការគំរាមកំហែង សន្តិសុខតំបន់យ៉ាងខ្លាំង និងកាន់តែខ្លាំងឡើងៗ និងធ្វើឱ្យជប៉ុនស្ថិតក្នុងស្ថានភាពដ៏លំបាកមួយ ព្រោះចិន និងសហរដ្ឋអាមេរិក សុទ្ធតែជាដៃគូពាណិជ្ជកម្មដ៏ដំបងរបស់ជប៉ុន។ ហើយតូក្យូខ្លួនឯងផ្ទាល់ ក៏តែងប៉ះទង្គិចជារឿយៗ ជាមួយចិនដែលបង្ហាញវត្តមានកាន់តែញឹកញយឡើងៗក្នុងតំបន់ប្រជុំកោះជាប់ជម្លោះ សេនកាគុ ហៅជាភាសាជប៉ុន ឬកោះទាវយូ ហៅតាមភាសាចិន។ ការគំរាមកំហែងដ៏ធ្ងន់ធ្ងរមួយទៀតសម្រាប់ជប៉ុន គឺកូរ៉េខាងជើង និងកម្មវិធីនុយក្លេអ៊ែរកូរ៉េខាងជើង។ មួយរយៈចុងក្រោយ ព្យុងយ៉ាងបានចាប់ផ្តើមអភិវឌ្ឍ និងសាកល្បងមីស៊ីលបាលីស្ទិកកាន់តែច្រើន។
ហេតុដូច្នេះហើយបានជា នាយករដ្ឋមន្ត្រីជប៉ុនថ្មី លោក ហ្វូមីអូ គីស៊ីដា ដែលទើបក្លាយជាប្រមុខដឹកនាំរដ្ឋាភិបាល កាលពីខែតុលា២០២១ បានចាត់ទុកការបង្កើនថវិកាការការពារជាតិជាអាទិភាពមួយប្រទេស។ ប្រសិនបើគម្រោងបន្ថែមថវិកាបានទទួលការអនុម័តពីសភា កញ្ចប់ថវិកាការពារជាតិជប៉ុនប្រចាំឆ្នាំ (គិតពីថ្ងៃទី ១មេសា២០២១-៣១មីនា២០២២) នឹងឡើងដល់កំរិតកំពូល ពោលគឺមានកំណើនដល់ទៅ ១៥%ក្នុងរយៈពេលមួយឆ្នាំ។ បើតាមរដ្ឋធម្មនុញ្ញសន្តិនិយម ក្រោយសម័យសង្គ្រាមលោក ជប៉ុនមិនអាចមានអាវុធនុយក្លេអ៊ែរទេ ហើយកញ្ចប់ថវិកាការពារជាតិក៏មិនត្រូវមានកំណើនឡើងលើសពី១%នៃផលិតផលសរុបក្នុងដែរ។ ប៉ុន្តែគណបក្សអភិរក្សនិយមសេរីប្រជាធិបតេយ្យដែលដឹកនាំដោយលោក ហ្វូមីអូ គីស៊ីដា គ្រោងនឹងស្នើសុំធ្វើវិសោធនកម្មច្បាប់រដ្ឋធម្មនុញ្ញ ដំឡើងកញ្ចប់ថវិកាការពារជាតិឱ្យឡើងលើស២%នៃផលិតផលសរុប នាថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ