ជប៉ុនបង្កើនថវិកាការពារជាតិដើម្បីប្រឈមទប់នឹងមហិច្ឆតារបស់ចិន និងការគំរាមកំហែងរបស់កូរ៉េខាងជើង
នៅថ្ងៃអង្គារ ទី៣១ សីហា ក្រសួងការពារជាតិជប៉ុនបានបង្ហាញកញ្ចប់ថវិកាការពារជាតិប្រចាំឆ្នាំសម្រាប់ឆ្នាំ ២០២២ ដែលមានទឹកប្រាក់ ៥០ ០០០លានដុល្លារ។ កញ្ចប់ថវិកានេះនឹងត្រូវក្រសួងការពារជាតិស្នើទៅសភាឲ្យបោះឆ្នោតនាពេលខាងមុខ។ បើធៀបនឹងថវិកាក្នុងឆ្នាំ ២០២១ នេះ គឺមានការកើនឡើងបន្តិចបន្តួច។ ការបង្កើនថវិកាការពារជាតិរបស់ជប៉ុនពេលនេះធ្វើឡើង ខណៈដែលប្រទេសកំពុងប្រឈមនឹងការគំរាមកំហែងរបស់កូរ៉េខាងជើង និងមហិច្ឆតាតំបន់កាន់តែរីកធំឡើងរបស់ប្រទេសចិន។
ចុះផ្សាយនៅថ្ងៃ៖
ស្តាប់ - ០២:៣៥
ក៏ដូចជាក្នុងរយៈពេលប៉ុន្មានឆ្នាំចុងក្រោយនេះដែរ ជប៉ុនតែងបានដំឡើងតិច ឬច្រើននូវថវិកាការពារជាតិប្រចាំឆ្នាំរបស់ខ្លួន។ នៅក្នុងទឹកប្រាក់ចំនួន ៥០ ០០០លានដុល្លារសម្រាប់ថវិកាឆ្នាំ ២០២២ ត្រូវបានក្រសួងការពារជាតិបញ្ជាក់ថា មានគម្រោងសាងសង់នាវាយោធាចំនួន ៥គ្រឿង នាវាមុជទឹកចំនួន ១គ្រឿង និងគ្រោងទិញយន្តហោះចម្បាំង F-៣៥ ចំនួន ១២គ្រឿង។ ទន្ទឹមគ្នានេះ ក្រសួងការពារជាតិក៏បានបញ្ជាក់ពីការចង់បង្កើនសមត្ថភាពការពាររបស់ជប៉ុននៅក្នុងលំហអាកាស និងក្នុងផ្នែកសន្តិសុខអ៊ីនធ័រនែត។ តាមក្រសួងការពារជាតិដដែល ហេតុផលនៃការដំឡើងថវិកាការពារជាតិក៏ដោយសារតែបរិបទនៃសន្តិសុខនៅជុំវិញប្រទេសជប៉ុនកំពុងមានស្ថានភាពកាន់តែអាក្រក់ទៅៗមិនធ្លាប់មានពីពេលមុន។
ដោយឡែក លោកហ៊ីដឺស្ហ៊ី តាកឺសាកា អ្នកជំនាញជប៉ុនខាងវិស័យការពារបានបញ្ជាក់នៅក្នុងបទសម្ភាសន៍ឲ្យ AFP ថា ការរៀបចំ និងការពង្រឹងប្រព័ន្ធការពាររបស់ជប៉ុនពេលនេះមានគោលដៅឆ្លើយតបនឹងកំណើនគំរាមកំហែងរបស់ចិន និងកូរ៉េខាងជើង។ លោកតាកឺសាកាបានបន្ថែមថា ចិនបានបង្កើនថវិកាការពារជាតិលឿនជាងអ្វីដែលគេបានគិតទៅទៀត។ តាមវិទ្យាស្ថានស្រាវជ្រាវអន្តរជាតិស្តីពីសន្តិភាពក្រុងស្តុកខុលហៅកាត់ Sipri ការចំណាយលើវិស័យយោធារបស់ចិនក្នុងឆ្នាំ ២០២០ មានដល់ទៅ ២៥២ ០០០លានដុល្លារ និងថា ឆ្នាំ ២០២០ ជាឆ្នាំទី២៦ ដែលចិនបានដំឡើងថវិកាយោធាជាប់ៗគ្នា។
តើជប៉ុននឹងបន្តមានថវិកាការពារជាតិខ្ពស់ ឬយ៉ាងណា?។ « ដរាបណារដ្ឋាភិបាលជប៉ុនបន្តកាន់កាប់ដោយក្រុមអ្នកអភិរក្សនិយម ដរាបនោះថវិកាការពារជាតិជប៉ុននឹងបន្តស្ថិតខ្ពស់ » នេះបើតាមលោកហ៊ីដឺស្ហ៊ី តាកឺសាកា។ តែអ្នកជំនាញជប៉ុនរូបនេះដដែលមិនភ្លេចបញ្ជាក់ទេថា ការដែលជប៉ុនមានខ្ទង់ចំណាយច្រើនក្នុងវិស័យការពារជាតិក៏ជាលទ្ធផលនៃការដាក់គំនាបពីអាមេរិកដើម្បីឲ្យជប៉ុនដើរតួនាទីកាន់តែសំខាន់នៅក្នុងសន្តិសុខតំបន់ ខណៈដែលភាពតានតឹងកំពុងមានខ្លាំងរវាងអាមេរិក និងចិន។ ជប៉ុនយល់ឃើញថា ភាពតានតឹងរវាងចិន និងអាមេរិកទាក់ទងនឹងកោះតៃវ៉ាន់ជាការគំរាមកំហែងកាន់តែខ្លាំងឡើងចំពោះស្ថិរភាពនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ