ហេតុអ្វីការវិនិយោគលើឥណទានកាបូននៅម៉ាឡេស៊ីបង្កឲ្យមានសង្រ្គាមប៉ាកា?
នៅម៉ាឡេស៊ី ការចុះកិច្ចព្រមព្រៀងផ្តល់សម្បទានព្រៃឈើដល់ក្រុមហ៊ុនបរទេស សម្រាប់ឥណទានកាបូនបានបង្កឲ្យភាពភ្ញាក់ផ្អើលក្នុងចំណោមប្រជាជនក្នុងស្រុក និងអង្គការការពារបរិស្ថាន។ នៅពាក់កណ្តាលខែ វិច្ឆិកាកន្លងទៅ អាជ្ញាធរម៉ាឡេស៊ី ដែលគ្រប់គ្រងកោះប័រណេអូ បានចុះកិច្ចសន្យាអនុញ្ញាតឲ្យក្រុមហ៊ុនបរទេសធ្វើសម្បទាន លើដីព្រៃ ជាង២លានហិចតា របស់កោះប័រណេអូ សម្រាប់រយៈពេល ២០០ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ក្រុមហ៊ុនបរទេសដែលបានទទួលសិទ្ធិធ្វើសម្បទានលើដីព្រៃ២លានហិចតានៅលើកោះប័រណេអូ សម្រាប់រយៈពេល ២០០ឆ្នាំ គឺក្រុមហ៊ុនសិង្ហបុរី និងក្រុមហ៊ុនប្រឹក្សាជំនួញអូស្ត្រាលី។ ទៅតាមកិច្ចព្រមព្រៀង ដែលអាជ្ញាធរគ្រប់គ្រងកោះប័រណេអូ ត្រូវចុះហត្ថលេខា នាពេលខាងមុខ ក្រុមហ៊ុនសិង្ហបុរី និងក្រុមហ៊ុនអូស្ត្រាលី រួមជាមួយក្រុមហ៊ុនដៃគូក្នុងស្រុកម៉ាឡេស៊ីនឹងប្រើប្រាស់ព្រៃសម្បទាន ២លានហិចតា ដែលស្មើនឹងទំហំប្រទេសស្លូវ៉េនី មួយ សម្រាប់វិនិយោគលើគម្រោងឥណទានកាបូន។ ជាមួយបរិមាណឧស្ម័នកាបូនិកដែលព្រៃឈើនៅលើកោះប័រណេអូ ស្រូបយកបាន ក្រុមហ៊ុនឯកជនខាងលើអាចធ្វើពាណិជ្ជកម្មកាបូន ពោលគឺអាចលក់ជាឥណទានកាបូន ទៅកាន់ទីផ្សារកាបូន។
ដើម្បីមានសមត្ថភាពស្រូបយកឧស្ម័នកាបូនិកពីក្នុងបរិយាកាស គម្រោងសម្បទានរបស់ក្រុមហ៊ុនសិង្ហបុរី និងក្រុមហ៊ុនអូស្ត្រាលីមានទិសដៅសំខាន់រក្សា អភិរក្សគម្របព្រៃ នៅលើកោះប័រណេអូ។ ដូច្នេះ វាជារឿងល្អមួយសម្រាប់ការចូលរួមថែរក្សាព្រៃឈើ។ ប៉ុន្តែ ហេតុអ្វីបានជាប្រជាជនក្នុងស្រុក និងអង្គការការពារបរិស្ថានដូចជាអង្គការWWF ជាដើម បរិហាររិះគន់ទៅវិញ? តើតម្រូវការ និងភាពពេញនិយមនៃទីផ្សារកាបូន កំពុងជំរុញ ឲ្យមានការធ្វើអាណានិគមនិយមកាបូន?
ក្រុមហ៊ុនសិង្ហបុរីផ្ទាល់បានចេញមុខការពារគម្រោងការវិនិយោគរបស់ខ្លួនថា មានគោលដៅ ការពារព្រៃឈើ និងផ្តល់ប្រយោជន៍ផ្នែកហិរញ្ញវត្ថុដល់អាជ្ញាធរមូលដ្ឋាន។ ប៉ុន្តែ សកម្មជន និងអង្គការការពារបរិស្ថាន បារម្ភថា គម្រោងការវិនិយោគរបស់ក្រុមហ៊ុនបរទេសខាងលើ គ្មានតម្លាភាព។ ថ្វីត្បិតថា ក្រុមហ៊ុនបរទេសមានចេតនាល្អ គឺដើម្បីការពារអភិរក្សគម្របព្រៃ សម្រាប់អាចស្រូបយកឧស្ម័នកាបូន ប៉ុន្តែមិនមែនកាប់បំផ្លាញព្រៃឈើ មែន ប៉ុន្តែគេបានចោទសំណួរថា ហេតុអ្វី គេចាំបាច់ផ្តល់គម្រោងឥណទានកាបូនទៅឲ្យក្រុមហ៊ុនបរទេសធ្វើអ្វី? អាជ្ញាធរម៉ាឡេស៊ីផ្ទាល់ក៏អាចមានសមត្ថភាព វិនិយោគលើគម្រោងឥណទានកាបូន ដោយមិនចាំបាច់ត្រូវការវត្តមានរបស់ក្រុមហ៊ុនឯកជននោះទេ។
ម្យ៉ាង ការផ្តល់សិទ្ធិឲ្យក្រុមហ៊ុនឯកជនចូលទៅកាន់កាប់ គ្រប់គ្រង ដីព្រៃ នៅលើកោះប័រណេអូ នឹងប៉ះពាល់ ដល់សិទ្ធិរស់នៅជាមូលដ្ឋានរបស់ក្រុមជនជាតិដើម ដែលកំពុងរស់នៅក្នុងព្រៃស្រាប់។ សម្រាប់អង្គការការពារបរិស្ថាន ជនជាតិដើម ម្ចាស់ស្រុក ជាអ្នកដែលការពារអភិរក្សព្រៃឈើ បានល្អជាង ក្រុមហ៊ុនបរទេសទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ