មិនកំណត់ទិសដៅបោះបង់ថាមពលផូស៊ីលហើយ នាយករដ្ឋមន្ត្រីអូស្ត្រាលីអាចមិនទៅប្រជុំអាកាសធាតុCOP26ទៀត
សន្និសីទអាកាសធាតុលើកទី ២៦ ឬហៅកាត់ថា COP26 ដែលនឹងប្រព្រឹត្តទៅនៅចុងខែតុលា នៅ Glasgow ជាឱកាសសម្រាប់គ្រប់ប្រទេសជាសមាជិកទាំងអស់ ត្រូវបង្ហាញផែនការអព្យាក្រិតកាបោន នៅឆ្នាំ២០៥០។ ប៉ុន្តែនាយករដ្ឋមន្ត្រីអូស្ត្រាលី ដែលទើបបដិសេធមិនកំណត់គោលដៅបញ្ឈប់ការប្រើថាមពលធ្យូងថ្ម ទំនងជាមិនអញ្ជើញទៅចូលរួមក្នុងជំនួបកំពូលអាកាសធាតុអន្តរជាតិនេះទេ។ នេះបើតាមបទសម្ភាសន៍របស់លោក ជាមួយកាសែត West Australian ចុះផ្សាយនៅថ្ងៃ ចន្ទទី ២៧ កញ្ញា២០២១។
ចុះផ្សាយនៅថ្ងៃ៖
ស្តាប់ - ០១:៥៦
ឆ្លើយនឹងសំណួររបស់អ្នកសារព័ត៌មាន លោក ស្កុត ម៉ូរីសុន Scott Morrisonបានអះអាងថាលោកប្រហែលមិនទៅចូលរួមក្នុងសន្និសីទអាកាសធាតុទេ ដោយចង់ផ្ចង់កម្លាំងសម្រាប់ប្រយុទ្ធប្រឆាំងនឹងជំងឺរាតត្បាតកូវីដ១៩ តែលោកមិនទាន់សម្រេចនៅឡើយ។ អូស្ត្រាលីនឹងបញ្ជូនតំណាងជាន់ខ្ពស់ជាច្រើនទៅជំនួស ប្រសិនបើលោកនាយករដ្ឋមន្ត្រី សម្រេចមិនទៅ COP២៦មែន។ នេះបើតាមការធានាអះអាងរបស់រដ្ឋមន្ត្រីក្រសួងការបរទេសអូស្ត្រាលី។
ជំនួបកំពូលស្តីអំពីអាកាសធាតុលើកនេះ ជាសន្និសីទដ៏សំខាន់ជាងគេបំផុតគិតចាប់តាំងពីជំនួបនៅទីក្រុងប៉ារីស ឆ្នាំ២០១៥មក ព្រោះជាឱកាសដែលសហគមន៍អន្តរជាតិត្រូវផ្តល់ផែនការជាក់ស្តែងស្តីពីការទប់ស្កាត់ការឡើងកម្តៅអាកាសធាតុឱ្យបានត្រឹម១,៥អង្សា។ បើគ្មានផែនការប្រកបដោយមហិច្ឆតាទេ កម្តៅសីតុណ្ហភាពនឹងឡើងដល់ ២,៧អង្សា នៅដំណាច់សតវត្សរ៍ ជាមួយគ្រោះមហន្តរាយធម្មជាតិកាន់តែកំណាច ដែលអូស្ត្រាលីបានទទួលរងគ្រោះ ដោយផ្ទាល់ នារយៈពេលប៉ុន្មានចុងក្រោយនេះ ដូចជាភ្លើងឆេះភ័យ ភាពរាំងហួតហែង ឬព្យុះកំបុតត្បូងសាហាវៗ ...
ប៉ុន្តែប្រមុខរដ្ឋាភិបាលអូស្ត្រាលីបែរចង់អវត្តមាន និងមិនចង់លើកផែនការកាត់បន្ថយការបញ្ចេញឧស្ម័នផ្ទះកញ្ចក់ទៅវិញ។
ជាប្រទេសនាំចេញធ្យូងថ្មលេខមួយនៅលើពិភពលោក និងប្រើធ្យូងថ្មជាចម្បងសម្រាប់ទាញយកថាមពលអគ្គីសនីមកប្រើប្រាស់ អូស្ត្រាលីបានបដិសេធមិនផ្តល់កាលបរិច្ឆេទ និងគោលដៅនៃការបញ្ឈប់ការប្រើថាមពលផូស៊ីលទេ។ សម្រាប់លោកនាយករដ្ឋមន្ត្រី ផលិតកម្មធ្យូងថ្ម ជាគ្រឹះសេដ្ឋកិច្ចដ៏សំខាន់របស់អូស្ត្រាលី ជាទីផ្សារការងារ និងជាការធានាកំរិតជីវភាពប្រជាជនអូស្ត្រាលី។ អូស្ត្រាលីមិនអាចសន្យាធ្វើអព្យាក្រិតកាបោនឡើយ បើដរាបណានៅមានផលវិបាកប៉ះពាល់ដល់ទីផ្សារការងារនោះ។ នេះបើតាមការបញ្ជាក់បន្ថែមរបស់លោកឧបនាយករដ្ឋមន្ត្រីអូស្ត្រាលី។
អូស្ត្រាលីចង់ឆ្លៀតពេលដែលវត្ថុធាតុដើមធ្យូងថ្មកំពុងឡើងថ្លៃ ហើយពិភពលោកកំពុងត្រូវការខ្លាំង សម្រាប់ប្រមូលថវិកាចូលហិបរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ