ចិននឹងពង្រឹងយុទ្ធនាការដាំដើមឈើដោយសង្ឃឹមបង្កើនអត្រាផ្ទៃដីព្រៃឈើសរុបចំនួន ២៤,១% នៅឆ្នាំ ២០២៥
នៅក្នុងប្រទេសចិន រដ្ឋាភិបាលបានប្តេជ្ញាចិត្តបង្កើនយុទ្ធនាការប្រយុទ្ធប្រឆាំងនឹងការប្រែប្រួលអាកាសធាតុ និងការការពារជម្រកធម្មជាតិ។ តាមរយៈយុទ្ធនាការមួយនេះ ចិននឹងបង្កើនការដាំដើមឈើថ្មីឲ្យបានទំហំដី ៣៦ ០០០គីឡូម៉ែត្រការ៉េក្នុងមួយឆ្នាំរហូតដល់ឆ្នាំ ២០២៥។ ៣៦ ០០០គីឡូម៉ែត្រការ៉េគឺស្មើនឹងទំហំផ្ទៃក្រឡាដីរបស់ប្រទេសបែលហ្សិក។ កម្មវត្ថុរបស់ចិន គឺសំដៅកាត់បន្ថយការបញ្ចេញឧស្ម័នកាបោនឲ្យដល់កម្រិតសូន្យពីពេលនេះទៅឆ្នាំ ២០៦០។
ចុះផ្សាយនៅថ្ងៃ៖
ស្តាប់ - ០២:១៥
លោកលី ជុនលាង អនុប្រធានរដ្ឋបាលព្រៃឈើ និងវាលស្មៅចិនបានថ្លែងក្នុងថ្ងៃសុក្រ ទី២០ សីហាថា ការដាំដើមឈើជាបេះដូងនៃកិច្ចខិតខំប្រឹងប្រែងរបស់ចិនតាំងពីច្រើនទសវត្ស និងជាយុទ្ធសាស្រ្តស្នូលក្នុងគោលដៅកាត់បន្ថយឧស្ម័នកាបោនឲ្យដល់កម្រិតសូន្យពីពេលនេះទៅឆ្នាំ ២០៦០។ អនុប្រធានរដ្ឋបាលព្រៃឈើ និងវាលស្មៅចិនរូបនេះដដែលបានធានាថា ពីពេលនេះទៅឆ្នាំ ២០៣៥ គុណភាព និងស្ថិរភាពនៃប្រព័ន្ធអេកូឡូស៊ីព្រៃឈើជាតិ ស្មៅ តំបន់សំណើម និងវាលខ្សាច់នឹងមានភាពប្រសើរឡើងគួរឲ្យកត់សម្គាល់។
បើផ្អែកតាមផែនការ ៥ឆ្នាំរបស់រដ្ឋាភិបាលក្រុងប៉េកាំងស្តីពីព្រៃឈើ និងស្មៅចេញផ្សាយក្នុងសប្តាហ៍នេះ ចិនសង្ឃឹមបង្កើនអត្រាផ្ទៃដីព្រៃឈើសរុបចំនួន ២៤,១% ពីពេលនេះទៅឆ្នាំ ២០២៥។ ផែនការដដែលបានទាញសញ្ញាអាសន្នពីកង្វះប្រភពព្រៃឈើ និងវាលស្មៅនៅក្នុងប្រទេស ពិសេសនៅតំបន់ខាងជើង និងខាងលិច។ នៅក្នុងការពង្រឹងយុទ្ធនាការដាំដើមឈើនេះ ចិននឹងផ្អែកមួយភាគលើការដាំដើមឈើឡើងវិញតាមបែបធម្មជាតិដោយប្រើប្រភេទដើមឈើខុសៗគ្នាទៅតាមអាកាសធាតុនៅក្នុងតំបន់នីមួយៗ។
លោកឆេន ជៀវេន អ្នកទទួលខុសត្រូវនៃការតាក់តែងផែនការ ៥ឆ្នាំស្តីពីព្រៃឈើ និងស្មៅបានបញ្ជាក់ថានៅរង្វង់ ៥ឆ្នាំខាងមុខ ប្រទេសនឹងពង្រីកបណ្តាញឧទ្យានជាតិ បង្កើតប្រព័ន្ធអេកូឡូស៊ី និងបង្កើនយុទ្ធនាការបង្រ្កាបការជួញដូរសត្វព្រៃខុសច្បាប់។ ដោយឡែក ក្រុមសិក្សាទីផ្សារឈ្មោះ Comparethemarket.com បានគូសបញ្ជាក់ក្នុងថ្ងៃសុក្រ ទី២០ សីហាថា ក្រុងប៉េកាំងតែមួយគួរតែដាំដើមឈើឲ្យបានជាង ១៥លានដើមក្នុងមួយឆ្នាំដើម្បីទូទាត់នឹងការបញ្ចេញឧស្ម័នពុលប្រចាំឆ្នាំ។ ចំណែកក្រុងសិង្ហបុរី និងហុងកុងគួរដាំឲ្យបានជាង ៩លានដើមជារៀងរាល់ឆ្នាំ ហើយក្រុងឡុងដ៏ ប្រទេសអង់គ្លេសគួរដាំប្រមាណជាជាង ៤លានដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ