ចលនាប្រឆាំងតាលីបង់ចាប់លេចរូបរាង នៅភាគឦសានអាហ្វហ្កានីស្ថាន
៥ថ្ងៃក្រោយ ក្រុមតាលីបង់ដណ្តើមអំណាច គ្រប់គ្រងអាហ្វហ្កានីស្ថាន ចលនាប្រឆាំងក្រុមតាលីបង់បានចាប់កើតមាន បណ្តើរៗ នៅក្នុងប្រទេស។ នៅថ្ងៃព្រហស្បតិ៍ ទន្ទឹមគ្នា នឹងការរៀបចំបាតុកម្មរបស់ប្រជាជនអាហ្វហ្កានីស្ថានដើម្បីបុណ្យខួបឯករាជ្យជាតិអាហ្វហ្កានីស្ថាន ចលនាប្រឆាំងគ្រប់ទម្រង់រូបភាពរបស់ក្រុមតាលីបង់ បានកើតមានផងដែរ នៅតាមខេត្ត តំបន់មួយចំនួន នៅភាគខាងកើតជាប់ព្រំដែន ប៉ាគីស្ថាន។ អតីតអនុប្រធានាធិបតីអាហ្វហ្កានីស្ថាន លោកអាំរូឡា សាឡេះ ដែលប្រកាសតាំងខ្លួនជាមេដឹកនាំរដ្ឋាភិបាល អាហ្វហ្កានីស្ថាន ស្របច្បាប់ នៅក្រោយការរត់ភៀសខ្លួនរបស់លោកប្រធានាធិបតី អាស្រាហ្វ ហ្កានី បានអំពាវនាវឲ្យប្រជាជន ដែលស្អប់ក្រុមតាលីបង់ឲ្យចូលរួមក្នុងចលនាឧទ្ទាមទ័ពព្រៃ ដើម្បីប្រឆាំងរបបដឹកនាំតាលីបង់។
ចុះផ្សាយនៅថ្ងៃ៖
ស្តាប់ - ០៣:១៣
នៅក្នុងឱកាសបុណ្យឯករាជ្យ ជាតិ កាលពីថ្ងៃព្រហស្បតិ៍ ប្រជាជនអាហ្វហ្កានីស្ថានបានចុះថ្នល់ធ្វើបាតុកម្ម នៅតាមទីក្រុងជាច្រើនក្នុងប្រទេស។ បាតុករជាច្រើនលើកគ្រវី ទង់ជាតិ អាហ្វហ្កានីស្ថាន ចំណែក សាក្សីនៅកន្លែងកើតហេតុម្នាក់ បាននិយាយប្រាប់ទីភ្នាក់ងារReuters ថា នៅទីក្រុង Assadabad មនុស្សជាច្រើននាក់បានស្លាប់ នៅពេលទាហានតាលីបង់បាញ់រះទៅលើក្រុមបាតុករ។ នៅទីក្រុង Jalalabad ក្បែរព្រំដែនប៉ាគីស្ថាន កើតមានផងដែរ បាតុកម្ម ប៉ុន្តែ ជាបាតុកម្មប្រឆាំងក្រុមតាលីបង់ ព្រោះរូបភាពវីដេអូមួយចំនួនបានបង្ហាញ បាតុករ ចាប់ហែកទង់ជាតិតាលីបង់។
ក្រុមតាលីបង់មិនបានគ្រប់គ្រងទឹកដីទាំងអស់របស់អាហ្វហ្កានីស្ថាននោះទេ។ ព័ត៌មានចេញពីជ្រលងភ្នំ ផាន់ឈៀរ Panchir ដែលស្ថិតនៅភាគឦសាន អាហ្វហ្កានីស្ថាន បានឲ្យដឹងថា អតីតអនុប្រធានាធិបតី អាហ្វហ្កានីស្ថាន និងកូនប្រុសរបស់អតីតមេបញ្ជាការទ័ពម៉ាស៊ូ Massoud កំពុងប្រមូលកម្លាំងទ័ពដើម្បីប្រឆាំងតទល់នឹងក្រុមតាលីបង់។ នេះជាប្រសាសន៍របស់រដ្ឋមន្រ្តីការបរទេសរុស្ស៊ី ស៊ែរហ្គេយ ឡាវរ៉ូវ នៅក្នុងសន្និសីទកាសែត កាលពីថ្ងៃ ព្រហស្បតិ៍ម្សិលមិញ។
ខណៈដែលក្រុមតាលីបង់កំពុងជួបពិភាក្សាជាមួយអតីតប្រធានាធិបតីអាហ្វហ្កានីស្ថាន លោកហាមីដ ការហ្សៃ ក្នុងដំណើរការរៀបចំបង្កើតរដ្ឋាភិបាលចម្រុះថ្មី ប្រមុខការបរទេសរុស្ស៊ី បានអំពាវនាវឲ្យក្រុមតាលីបង់ បង្កើត ការពិភាក្សាថ្នាក់ជាតិ ដើម្បីបង្កើតរដ្ឋាភិបាលមួយដែលតំណាងឲ្យអាហ្វហ្កានីស្ថាន។
អតីតប្រធានាធិបតីអាហ្វហ្កានីស្ថាន លោក អាំរូឡា សាឡេះដែលបដិសេធមិនចុះញ៉មនឹងក្រុមតាលីបង់ បានដកខ្លួនថយទៅនៅជ្រលងភ្នំ ផាន់ឈៀរ Panchir គ្រប់គ្រងដោយកូនប្រុសរបស់ លោកអាម៉េដ ស្ហា ម៉ាស៊ូ Ahmed Shah Massoud អតីតមេបញ្ជាការទ័ព អាហ្វហ្កានីស្ថាន ដ៏ល្បីឈ្មោះខាងប្រយុទ្ធប្រឆាំងនឹងក្រុមតាលីបង់។ លោកម៉ាស៊ូ ជាវីរបុរសអាហ្វហ្កានីស្ថាន ដែលល្បីល្បាញខាងតស៊ូប្រឆាំងការឈ្លានពានរបស់សូវៀត ប៉ុន្តែ លោកត្រូវក្រុមតាលីបង់លួចធ្វើឃាតសម្លាប់ នៅប៉ុន្មានថ្ងៃមុនដែលក្រុមអាល់កៃដា វាយប្រហារភេរវកម្មទៅលើអគារភ្លោះ នៅទីក្រុងញូវយ៉ក ឆ្នាំ ២០០១។
នៅថ្ងៃចន្ទ រូបភាពវីដេអូ បង្ហោះផ្សាយតាមបណ្តាញសង្គមហ្វេសប៊ុក បានបង្ហាញ អតីតអនុប្រធានាធិបតីអាហ្វហ្កានីស្ថាន និងកូនប្រុសរបស់អតីតមេបញ្ជាការទ័ពប្រឆាំង ក្រុមតាលីបង់ ដាក់ដុំថ្ម នៅកន្លែងមួយ នៃជ្រលងភ្នំ ដើម្បីសំគាល់ការចាប់ផ្តើមនៃចលនាតស៊ូប្រឆាំងរបបតាលីបង់។
នៅក្នុងអត្ថបទចុះផ្សាយដោយកាសែតអាមេរិកាំង Washington Post កាលពីថ្ងៃពុធ លោកអាម៉ាដ ម៉ាស៊ូ Ahmad Massoud បានស្វែងរកការគាំទ្រផ្នែកសព្វាវុធ ពីសហរដ្ឋអាមេរិក ដើម្បី ជួយឲ្យចលនាតស៊ូអាហ្វហ្កានីស្ថានអាចតស៊ូប្រឆាំងនឹងក្រុមតាលីបង់ ដែលបានចូលកាន់អំណាចនៅអាហ្វហ្កានីស្ថាន កាលពីថ្ងៃអាទិត្យ។ តាមលោកអាម៉ាដ ម៉ាស៊ូ អាមេរិកនៅតែអាចជាឃ្លាំងអាវុធ សម្រាប់លទ្ធិប្រជាធិបតេយ្យ តាមរយៈការគាំទ្រ ចលនាយុទ្ធជនប្រយុទ្ធ នៅជ្រលងភ្នំផាន់ឈៀរ ដែលកំពុងប្រមូលផ្តុំដោយអតីតទាហាន និងកងកុម្ម៉ង់ដូរពិសេសរបស់អាហ្វហ្កានីស្ថាន ដែលខកចិត្ត នឹងឃើញមេបញ្ជាការទ័ពរបស់ខ្លួន កំសាក ទម្លាក់អាវុធចុះចាញ់ នៅមុនការប្រយុទ្ធជាមួយ ពួកតាលីបង់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ