លោក ចូ បៃដិន ថា “មិនស្តាយក្រោយ” រឿងដកទ័ពចេញពីអាហ្វហ្កានីស្ថានទេ
ពួកតាលីបង់វាយលុកដណ្តើមកាន់កាប់បានទីរួមខេត្ត ពីរថ្មីទៀត នៅថ្ងៃអង្គារទី ១០សីហា ម្សិលមិញ។ ជាសរុប មានទីរួមខេត្តចំនួន៩ បានធ្លាក់ចូលក្នុងកណ្តាប់ដៃតាលីបង់ ដែលកំពុងបន្តចូលទៅកាន់កាប់ទីតាំងជាច្រើនផ្សេងទៀត។ ក្តីព្រួយបារម្ភកំពុងរីករាលដាល ដល់រដ្ឋធានីកាប៊ូល និងទូទាំងផ្ទៃប្រទេស។ ប៉ុន្តែសម្រាប់លោកប្រធានាធិបតីអាមេរិក ចូ បៃដិន លោក “គ្មានការស្តាយក្រោយ” ចំពោះសេចក្តីសម្រេចចិត្តដកកងទ័ពអាមេរិកទាំងស្រុងចេញពី អាហ្វហ្កានីស្ថានទេ។ ផ្ទុយទៅវិញ លោកបានអំពាវនាវឱ្យ ទាហានរដ្ឋាភិបាល តស៊ូប្រយុទ្ធនឹងពួកតាលីបង់។
ចុះផ្សាយនៅថ្ងៃ៖
ស្តាប់ - ០២:១០
២០ឆ្នាំក្រោយអន្តរាគមន៍យោធា កងទ័ពបរទេស ត្រូវដកចេញអស់សព្វគ្រប់ពីអាហ្វហ្កានីស្ថាននៅត្រឹមថ្ងៃទី ៣១សីហា ២០២១។ “ខ្ញុំមិនស្តាយក្រោយ ចំពោះសេចក្តីសម្រេចចិត្តចាកចេញអាហ្វហ្កានីស្ថានទេ!” នេះជាប្រសាសន៍របស់លោកចូ បៃដិន កាលពីល្ងាចថ្ងៃអង្គារទី ១០សីហា ដោយបានសង្កត់ធ្ងន់ថា អាហ្វហ្កានីស្ថានត្រូវមានឆន្ទៈប្រយុទ្ធតតាំងនឹងពួកតាលីបង់ ត្រូវតែប្រយុទ្ធដើម្បីខ្លួនឯង និងដើម្បីជាតិ។
សហរដ្ឋអាមេរិក ហាក់ចាប់បញ្ចេញអារម្មណ៍មួរម៉ៅកាន់តែខ្លាំងឡើងៗ នៅចំពោះមុខភាពទន់ខ្សោយរបស់ទាហានរដ្ឋាភិបាលអាហ្វហ្កានីស្ថាន ដែលអាមេរិកបានបង្ហាត់ បង្វឹក ផ្តល់ហិរញ្ញវត្ថុ និងបំពាក់អាវុធយុទ្ធភ័ណ្ឌឱ្យតាំងពីជាច្រើនឆ្នាំមកហើយ។ កងកម្លាំងយោធារបស់ក្រុងកាប៊ូល មានកម្លាំងច្រើននិងខ្លាំងជាងទ័ពរបស់ពួកតាលីបង់ ឆ្ងាយណាស់ មិនគួរណាត្រូវចាញ់ខ្លាំងដូច្នេះទេ។ គំនិតដែលថាមិនអាចបញ្ឈប់ពួកតាលីបង់បាន ខុសពីការពិតជាក់ស្តែងលើសមរភូមិ។ នេះបើតាមការគូសបញ្ជាក់របស់អ្នកនាំពាក្យក្រសួងការបរទេសអាមេរិក លោក Ned Price។
តាំងពីខែឧសភា ពេលបរទេសចាប់ផ្តើមប្រតិបត្តិការដកទ័ពចេញមក តាលីបង់បានបើកយុទ្ធនាការវាយលុកយ៉ាងខ្លាំង និងទើបសម្រេចដណ្តើមកាន់កាប់ទីតាំងជាច្រើននារយៈពេលប៉ុន្មានថ្ងៃចុងក្រោយនេះ។ គិតត្រឹមថ្ងៃពុធទី ១១សីហា តាលីបង់ដណ្តើមបានទីរួមខេត្ត៩ក្នុងចំណោមខេត្តសរុប៣៤របស់អាហ្វហ្កានីស្ថាន ហើយ ពីរភាគបី (៦លើ៩) នៃខេត្តនៅតំបន់ភាគខាងជើងបានធ្លាក់ក្នុងកណ្តាប់ដៃពួកគេ។ តាំងពីថ្ងៃសុក្រមក តាលីបង់ បានវាយលុកលើទីក្រុងធំនៅភាគខាងជើងប្រទេស ដែលមានទម្លាប់ប្រឆាំងខ្លាំងបំផុត តាំងពីក្នុងអំឡុងពេលពួកតាលីបង់កំពុងកាន់អំណាច ក្នុងទសវត្សរ៍ឆ្នាំ១៩៩០ ដោយបានចូលដល់សង្កាត់ជាប់ទីរួមខេត្តផង នៅថ្ងៃអង្គារទី ១០សីហាម្សិលមិញ។
ក្នុងពេលពួកតាលីបង់សម្រុកលើគ្រប់សមរភូមិ នៅភាគខាងជើងផងនិងភាគខាងត្បូងផង ដូហាបានទទួលបើកជំនួបប្រជុំអន្តរជាតិ ដោយមានតំណាងមកពីកាតា សហរដ្ឋអាមេរិក ចិន អង់គ្លេស ប៉ាគីស្ថាន អង្គការសហប្រជាជាតិ សហភាពអឺរ៉ុបចូលរួម។ ដំណើរចរចារកសន្តិភាពពួកតាលីបង់និងរដ្ឋាភិបាលអាហ្វហ្កានីស្ថាន ស្របតាមកិច្ចព្រមព្រៀងរវាងអាមេរិកនិងតាលីបង់ កាលពីខែកុម្ភៈ២០២០ ត្រូវជាប់គាំងទាំងស្រុង។ ទោះក្តីសង្ឃឹមមានតិចតួចក្តី ក៏អន្តរការីអាមេរិក ត្រូវជំរុញពួកតាលីបង់ជាថ្មីឱ្យបញ្ឈប់សកម្មភាពយោធា និងចរចាស្វែងរកកិច្ចព្រមព្រៀងនយោបាយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ