ប្រធានាធិបតីអាមេរិកប្រកាសផ្តល់កន្លែងជ្រកកោនដល់ប្រជាជនហុងកុង
ប្រធានាធិបតីអាមេរិក លោកចូ បៃដិន បានសម្រេច កាលពីថ្ងៃ ព្រហស្បតិ៍ ទី ៥សីហា អនុញ្ញាតឲ្យប្រជាជនហុងកុងជ្រកកោនបណ្តោះអាសន្ន ក្នុងទឹកដីអាមេរិក។ ប្រធានាធិបតីអាមេរិកបានលើកយកហេតុផល រំលោភសិទ្ធិ សេរីភាព នៅទីក្រុងហុងកុង បង្កឡើងដោយប្រទេសចិន។ ក្រសួងការបរទេសចិន តាមរយៈ ស្ថានទូតចិន ប្រចាំវ៉ាស៊ីនតោន បានប្រតិកម្មភ្លាម ដោយចោទប្រកាន់អាមេរិកថា កំពុងលូកដៃចូលកិច្ចការផ្ទៃក្នុងរបស់ចិន។
ចុះផ្សាយនៅថ្ងៃ៖
ស្តាប់ - ០២:០១
នៅក្នុងក្រឹត្យប្រធានាធិបតី ដែលផ្សព្វផ្សាយដោយសេតវិមាន លោកប្រធានាធិបតីអាមេរិក ចូ បៃដិនបានសរសេរថា ការគាំទ្ររបស់អាមេរិក សម្រាប់ប្រជាជនហុងកុង នឹងមិនចុះខ្សោយនោះទេ។
នៅថ្ងៃព្រហស្បតិ៍ ប្រធានាធិបតីអាមេរិក បានសម្រេចផ្តល់កន្លែងជ្រកកោនបណ្តោះអាសន្នរយៈពេល ១ឆ្នាំកន្លះ ដល់ប្រជាជន ហុងកុង ដែលកំពុងស្ថិតនៅក្នុងទឹកដីអាមេរិក។ នៅក្នុងក្រឹត្យ ប្រធានាធិបតី លោកចូ បៃដិន បានបញ្ជាឲ្យក្រសួងសន្តិសុខផ្ទៃក្នុងអាមេរិក ផ្អាកការបណ្តេញចេញ ប្រជាជនហុងកុង ក្នុងហេតុផល បញ្ហានយោបាយបរទេស។
តាមរដ្ឋបាលអាមេរិក មានប្រជាជនហុងកុង ជាច្រើនពាន់នាក់ ដែលនឹងទទួលបានសិទ្ធិជ្រកកោន បណ្តោះអាសន្ន និងអាចធ្វើការនៅទឹកដីអាមេរិក។
បា្រកដណាស់ ការសម្រេចរបស់ភាគីអាមេរិក បានធ្វើឲ្យប្រទេសចិន មិនសប្បាយចិត្ត។ នៅក្នុងសេចក្តីប្រកាសឆ្លើយតប នៅថ្ងៃសុក្រនេះ ក្រសួងការបរទេសចិន បានចោទប្រកាន់ អាមេរិកថា បានលូកដៃអន្តរាគមន៍ យ៉ាងហិង្សា បំផុត ក្នុងកិច្ចការផ្ទៃក្នុងហុងកុង។ “ដោយប្រកាសថា ផ្តល់កន្លែងជ្រកកោន ដ៏ប្រាកដប្រជាដល់ប្រជាជនហុងកុង អាមេរិកកំពុងព្យាយាមនិយាយអាក្រក់ពីហុងកុង សំអុយឈ្មោះចិន និងធ្វើសកម្មភាព ដើម្បីបំផ្លាញ ភាពចម្រុងចម្រើន និងស្ថិរភាពនៅទីក្រុងហុងកុង។” នេះបើតាមសេចក្តីប្រកាស របស់ក្រសួងការបរទេសចិន។
អ្នកនាំពាក្យរបស់ស្ថានទូតចិន ប្រចាំទីក្រុងវ៉ាស៊ីនតោន វិញ ក៏មិនបង្អង់មាត់ វាយបក រិះគន់ចំណាត់ការរបស់អាមេរិកដែរ។ តាមអ្នកនាំពាក្យចិន ចាប់តាំងពីអនុវត្តច្បាប់សន្តិសុខជាតិ នៅមួយឆ្នាំមកនេះ គេបានស្តារ សណ្តាប់ធ្នាប់សង្គម និងធានាបាននីតិរដ្ឋ ឡើងនៅវិញ នៅហុងកុង។
សម្រាប់អ្នកនាំពាក្យរបស់សេតវិមាន លោកស្រី Jen Psaki ប្រឈមនឹងការចាប់ឃុំខ្លួន ហើយនិងការជំនុំជម្រះ ដែលមានលក្ខណៈនយោបាយ នៅហុងកុង ព្រមទាំងការបំបិទសិទ្ធិ នយោបាយតាមលទ្ធិប្រជាធិបតេយ្យ និងសេរីភាពបញ្ចេញមតិ អាមេរិកនឹងនៅតែបន្តចាត់វិធានការដើម្បីផ្តល់ជំនួយ ជានិច្ច ដល់ប្រជាជនហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ