ហុងកុង ចាប់ខ្លួនសកម្មប្រជាធិបតេយ្យថ្មីទៀត ក្រោយការបន្ថែមទណ្ឌកម្មរបស់អាមេរិក
សកម្មជនប្រជាធិបតេយ្យហុងកុងចំនួន ៨នាក់ ត្រូវប៉ូលិសចាប់ខ្លួន នៅថ្ងៃអង្គារទី៨ ធ្នូ ២០២០ ស្របទៅតាមច្បាប់ស្តីពីសន្តិសុខជាតិ ដែលអនុម័តដោយសភាចិន កាលពីខែមិថុនាកន្លងទៅ។ ទន្ទឹមគ្នានេះ សហរដ្ឋអាមេរិក បានប្រកាស ដាក់ទណ្ឌកម្មថ្មីបន្ថែមប្រឆាំងនឹងអ្នកទទួលខុសត្រូវនៅក្នុងសភាចិន ដែលមានបន្ទុកតាក់តែងច្បាប់សន្តិសុខជាតិហុងកុង។
ចុះផ្សាយនៅថ្ងៃ៖
នៅក្នុងចំណោមសកម្មជនទាំង ៨នាក់ ដែលត្រូវចាប់ខ្លួន មាន ៣នាក់ គឺជាអតីតសមាជិកសភា និងជាអតីតប្រធានគណបក្សប្រជាធិបតេយ្យហុងកុង។ យោងតាមប៉ូលិសហុងកុង ពួកគេត្រូវចាប់ខ្លួន ដោយជាប់ចោទពីបទញុះញង់ រៀបចំ ឬចូលរួម ក្នុងបាតុកម្មដោយគ្មានច្បាប់អនុញ្ញាត កាលពីថ្ងៃទី១កក្កដាកន្លងទៅ។
ការចាប់ខ្លួននេះ ធ្វើឡើងតែប៉ុន្មានម៉ោងក្រោយសេចក្តីប្រកាសរបស់រដ្ឋាភិបាលអាមេរិក ដាក់ទណ្ឌកម្មថ្មីបន្ថែមទៀតប្រឆាំងនឹងប៉េកាំង។ ជាទណ្ឌកម្មដាក់ប្រឆាំងលើអ្នកទទួលខុសត្រូវនៅ ក្នុងសភាចិន ដែលមានបន្ទុកតាក់តែងច្បាប់ស្តីពីសន្តិសុខជាតិហុងកុង ចំនួន១៤រូប មានជាអាទិ៍ អនុប្រធានគណៈកម្មការអចិន្ត្រៃយ៍សភានិងសមាជិក ។ អំណើះតទៅ អ្នកទទួលខុសត្រូវនៅក្នុងសភាចិននេះព្រមទាំងក្រុមគ្រួសារ មិនអាចធ្វើដំណើរទៅជាន់ទឹកដីអាមេរិកបានទៀតទេ និងពុំអាចប្រើប្រាស់ប្រព័ន្ធហិរញ្ញវត្ថុអាមេរិកបានទៀតដែរ។ ចំណែកទ្រព្យសម្បត្តិរបស់ពួកគេដែលមាននៅអាមេរិកនឹងត្រូវបង្កក។
សូមបញ្ជាក់ថាការដាក់ទណ្ឌកម្មបន្ថែមលើចិននេះ ជាការពង្រឹងជំហរដាច់ខាតរបស់អាមេរិកផង និងជាសេចក្តីសម្រេចចិត្តដែលបានការព្រមព្រៀងគ្នារវាងក្រុមការងារក្នុងរដ្ឋបាលផុតអាណត្តិលោក ដូណាល់ ត្រាំ និងអនាគតរដ្ឋបាលថ្មីរបស់លោក ចូ បៃដិន ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ