អាណត្តិលោកចូ បៃដិន ចាប់ផ្តើមដាក់ទណ្ឌកម្មសេដ្ឋកិច្ចលើក្រុមហ៊ុនចិន
នៅក្នុងហេតុផល គ្រោះថ្នាក់ និងគំរាមកំហែងសន្តិសុខជាតិអាមេរិក ក្រសួងពាណិជ្ជកម្មអាមេរិកបានសម្រេច នៅថ្ងៃព្រហស្បតិ៍ ទី៨មេសា ដាក់ទណ្ឌកម្មលើក្រុមហ៊ុនចិនចំនួន ៧ ដែលមានជំនាញ ខាង ស៊ូពែរកុំព្យូទ័រ ឬ កុំព្យូទ័រយក្ស ដែលមានកម្លាំងខ្លាំងមហាសាល។ ទីក្រុងប៉េកាំង បានប្រតិកម្មតបវិញ ដោយថ្កោលទោស វិធានការដាក់ទណ្ឌកម្មរបស់អាមេរិកលើកនេះ។
ចុះផ្សាយនៅថ្ងៃ៖
ស្តាប់ - ០២:៣៥
នៅក្នុងអាណត្តិដឹកនាំរបស់លោកចូ បៃដិន ទំនាក់ទំនងចិន អាមេរិកនឹងមិនងាយចាប់ល្អប្រសើរឡើងវិញនោះទេ។ បន្ទាប់ពីដាក់ទណ្ឌកម្មមន្រ្តីចិន ដោយសារសំណុំរឿង រំលោភសិទ្ធិមនុស្សនៅខេត្តស៊ីនជាំង រដ្ឋបាលអាមេរិកបានសម្រេចដាក់ទណ្ឌកម្មលើក្រុមហ៊ុនបច្ចេកវិទ្យាចិន ចំនួន៧ ដែលហេតុផល គំរាមកំហែងដល់សន្តិសុខជាតិអាមេរិក។
នៅថ្ងៃព្រហស្បតិ៍ ក្រសួងពាណិជ្ជកម្មអាមេរិកបានប្រកាសចាត់វិធានការរឹតបន្តឹង ការធ្វើជំនួញជាមួយមជ្ឈមណ្ឌល ក្រុមហ៊ុន ចិនទាំង ៧ ដែលមានជំនាញខាងស៊ូពែរ កុំព្យូទ័រ។ សម្រាប់រដ្ឋមន្រ្តីក្រសួងពាណិជ្ជកម្មអាមេរិក លោកស្រី Gina Raimondo សមត្ថភាពស៊ូពែរកុំព្យូទ័រសំខាន់ណាស់សម្រាប់ទ្រទ្រង់ ការអភិវឌ្ឍន៍ប្រព័ន្ធសន្តិសុខជាតិ ការធ្វើទំនើបកម្មវិស័យកងទ័ព ដែលនៅក្នុងនោះមានផងដែរ ការផលិតអាវុធនុយក្លេអ៊ែរ និងអាវុធដែលលឿនជាងសំឡេង។ តាមលោកស្រីរដ្ឋមន្រ្តីពាណិជ្ជកម្មអាមេរិក ទណ្ឌកម្ម លើកនេះសំដៅ រារាំង ចិនមិនឲ្យទាញយកប្រយោជន៍ពីបច្ចេកវិទ្យាអាមេរិកាំង ដើម្បី ទៅពង្រឹង មហិច្ឆតា ធ្វើទំនើបកម្មកងទ័ពរបស់ខ្លួន។
ទៅតាមទណ្ឌកម្ម របស់ក្រសួងពាណិជ្ជកម្ម អាមេរិក ក្រុមហ៊ុនស៊ូពែរកុំព្យូទ័រទាំង ៧របស់ចិន ត្រូវ ដាក់ពាក្យសុំធ្វើជំនួញ ឡើងវិញ និងសុំអនុញ្ញាតពិសេស សម្រាប់ការនាំចេញ និងនាំចូល ផលិតផលអាមេរិក។ នៅក្នុងចំណោមក្រុមហ៊ុនចិនទាំង ៧ ដែលចូលក្នុងបញ្ជីខ្មៅរបស់អាមេរិក កាលពីថ្ងៃ ព្រហស្បតិ៍ មានក្រុមហ៊ុន Sunway TaihuLight ក្នុងខេត្តជាំងស៊ូ Jiangsu ភាគខាងកើតប្រទេសចិន។ បង្កើតឡើង នៅឆ្នាំ ២០១៦ ក្រុមហ៊ុនចិនមួយនេះ ត្រូវគេចាត់ទុក ជាម៉ាស៊ីន ស៊ូពែរកុំព្យូទ័រ ដែលលឿនជាងគេក្នុងពិភពលោក។ នៅឆ្នាំ ២០២០ ស៊ូពែរកុំព្យូទ័រTaihulight ជាប់ចំណាត់ថ្នាក់លេខ ៤ នៅក្រោយម៉ាស៊ីន ស៊ូពែរកុំព្យូទ័ររបស់ប្រទេសជប៉ុន និងអាមេរិក។
ទីក្រុងប៉េកាំងបានអភិវឌ្ឍ បង្កើតម៉ាស៊ីន ស៊ូពែរកុំព្យូទ័រ សមត្ថភាព ខ្លាំង សម្រាប់ប្រើក្នុងវិស័យបច្ចេកវិទ្យា (ធ្វើការពីចម្ងាយ) សម្រាប់សិក្សាអាកាសធាតុ ឬស្រាវជ្រាវផ្នែកកងទ័ព។ ធ្លាប់ចោទប្រកាន់ចិន បានលួចបច្ចេកវិទ្យា និងកម្មសិទ្ធិបញ្ញា របស់ក្រុមហ៊ុនអាមេរិកាំង រដ្ឋបាលអាមេរិក ព្រួយបារម្ភកាន់តែខ្លាំងថា ចិន មានចេតនាប្រើស៊ូពែរកុំព្យូទ័រ ដើម្បី ចូលទៅចម្លងយកគំនិត និងចំណេះដឹង ផ្នែកបច្ចេកវិទ្យា អាមេរិកាំង។
ពីទីក្រុងប៉េកាំង ប្រតិកម្មទៅនឹងទណ្ឌកម្មរបស់ក្រសួងពាណិជ្ជកម្មអាមេរិក អ្នកនាំពាក្យរបស់ក្រសួងការបរទេសចិន បាន និយាយថ្កោលទោស វិធានការរបស់អាមេរិក និងសន្យាចាត់វិធានការ វាយបកវិញដើម្បីការពារសិទ្ធិ និងផលប្រយោជន៍របស់ក្រុមហ៊ុនចិន។ សម្រាប់អ្នកនាំពាក្យរបស់ក្រសួងការបរទេសចិន ការដាក់គំនាប និងការប្រឹងប្រឹងទាំងឡាយរបស់អាមេរិកនឹងមិនអាចរាំងស្ទះបំផ្លាញដំណើរអភិវឌ្ឍផ្នែកបច្ចេកវិទ្យារបស់ចិនបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ