ប៉េកាំងបង្កើតយន្តការការពារក្រុមហ៊ុនចិន ដែលរងគ្រោះដោយការអនុវត្តច្បាប់មិនយុត្តិធម៌ នៅបរទេស
ក្រសួងពាណិជ្ជកម្មចិន បានប្រកាសអនុវត្តវិធានការថ្មី នៅថ្ងៃសៅរ៍នេះ ដើម្បី ប្រឆាំងទប់ទល់នឹងប្រទេសណា ដែលអនុវត្តច្បាប់ ដោយគ្មានហេតុផលត្រឹមត្រូវ ទៅលើក្រុមហ៊ុនចិន នៅ ទឹកដី បរទេស។ ចំណាត់ការថ្មីរបស់ទីក្រុងប៉េកាំង ធ្វើឡើង បន្ទាប់ពីអាមេរិក បានចាត់វិធានការ ជាបន្តបន្ទាប់ ប្រឆាំងនឹងក្រុមហ៊ុនចិន ដែលអាមេរិកចោទថា បានធ្វើការបម្រើផលប្រយោជន៍ឲ្យកងទ័ពចិន។
ចុះផ្សាយនៅថ្ងៃ៖
ស្តាប់ - ០១:៥២
ចិនបានបង្កើតច្បាប់ថ្មី ប្រឆាំងនឹងការអនុវត្ត មិនត្រឹមត្រូវរបស់រដ្ឋាភិបាលបរទេស នៅបន្ទាប់ពី ក្រុមហ៊ុនចិនកាន់តែច្រើន ប្រឈមនឹងការដាក់សម្ពាធ នៅ បរទេស ជាពិសេស នៅទឹកដីអាមេរិក។ សម្រាប់ក្រសួងពាណិជ្ជកម្ម វិធានការថ្មី មានគោលដៅការពារសិទ្ធិ ស្របច្បាប់ ហើយនិងប្រយោជន៍របស់ក្រុមហ៊ុន ជនជាតិចិន និងប្រទេសចិន។
ករណីហាមឃាត់មិនឲ្យក្រុមហ៊ុនHuawei ចូលក្នុងទីផ្សារអាមេរិក គឺជាឧទាហរណ៍ស្រាប់។ នៅខែវិច្ឆិកាកន្លងទៅ លោកប្រធានាធិបតី ដូណាល់ ត្រាំ នៅ បានហាមឃាត់មិនឲ្យប្រជាជនអាមេរិក វិនិយោគក្នុងក្រុមហ៊ុនចិន ដែល អាចផ្គត់ផ្គង់ ឬគាំទ្រផលប្រយោជន៍របស់កងទ័ពចិន។ នៅខែនេះ លោកដូណាល់ ត្រាំ ធ្លាប់ បានចេញបញ្ជាហាមមិនឲ្យគេអាចផ្ទេរលុយ ទៅកាន់កម្មវិធីទាំងឡាយដែលមានជាប់ពាក់ព័ន្ធនឹងក្រុមហ៊ុនចិន។
ទៅតាមច្បាប់ថ្មី ដែលត្រូវចូលជាធរមាន ចាប់ពីថ្ងៃសៅរ៍នេះ គេនឹងបង្កើតយន្តការពិសេសមួយ ដើម្បីទប់ទល់ វាយបកវិញ នឹងច្បាប់ បរទេស ឬ វិធានការណា ដែល អនុវត្តដោយមិនត្រឹមត្រូវ មិនយុត្តិធម៌ពីសំណាក់រដ្ឋាភិបាលបរទេស ទៅលើក្រុមហ៊ុនចិន។ ជាក់ស្តែង ជនជាតិចិន ឬក្រុមហ៊ុនចិន ត្រូវរាយការណ៍ ដាក់ពាក្យប្តឹងទៅអាជ្ញាធរចិន នៅក្នុងរយៈពេល ៣០ថ្ងៃដែលខ្លួនត្រូវប្រឈមនឹងច្បាប់បរទេស ដែលមានន័យរារាំងមិនឲ្យក្រុមហ៊ុនចិនអាចធ្វើជំនួញ ប្រកួតប្រជែង ដោយស្មើភាព។ បើសិន ក្រុមតាមដានរបស់ចិន វាយតម្លៃថា ក្រុមហ៊ុនចិន ពិតជារងគ្រោះដោយសារច្បាប់បរទេសមែន នោះ ចិននឹងចាត់វិធានការទាត់ចោល ការអនុវត្តច្បាប់បរទេសលើក្រុមហ៊ុនចិន។ មួយវិញទៀត ទៅតាមយន្តការខាងលើ រដ្ឋាភិបាលចិននឹងជួយបុគ្គល ក្រុមហ៊ុនដែលរងគ្រោះ ខាតបង់ ដោយសារ តែការអនុវត្តច្បាប់ នៅទឹកដី បរទេស។
ប៉ុន្តែ ក្នុងករណីដែលក្រុមហ៊ុនចិន ខកខាន មិនបានរាយការណ៍ ភាពពិតជាក់ស្តែង ឬមិនគោរព ធ្វើតាមយន្តការថ្មី នោះ ពួកគេនឹងត្រូវរងការព្រមាន ឬការបង់ប្រាក់ពិន័យ ទៅឲ្យអាជ្ញាធរចិនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ