លោក ថាណាថន អតីតបេក្ខជននាយករដ្ឋមន្រ្តីថៃ រងចោទប្រកាន់ពីបទ ជេរប្រមាថព្រះមហាក្សត្រ
តុលាការថៃ បានសម្រេច នៅថ្ងៃ អង្គារទី៣០មីនា ចោទប្រកាន់ អតីតប្រធានបក្សប្រឆាំងថៃ អណាឃត់ម៉ៃ លោកថាណាថនពីបទជេរប្រមាថព្រះមហាក្សត្រ និងឧក្រិដ្ឋកម្មព័ត៌មានវិទ្យា។ កំហុសរបស់លោកថាណាថន គឺ បានបង្ហោះផ្សាយផ្ទាល់វីដេអូ នៅលើបណ្តាញសង្គមហ្វេសប៊ុក ដែលនៅក្នុងនោះ លោកបានរិះគន់យុទ្ធសាស្ត្រាចាក់វ៉ាក់សាំង បង្ការជំងឺកូវីដរបស់រដ្ឋាភិបាល ដឹកនាំដោយលោកប្រាយុទ្ធ ចាន់អូចា។
ចុះផ្សាយនៅថ្ងៃ៖
ស្តាប់ - ០២:១០
មហាសេដ្ឋី និងជាអតីតប្រធានបក្សប្រឆាំង ដ៏មានប្រជាប្រិយភាពនៅប្រទេសថៃ លោកថាណាថន ជួងរុងរួងគីត ត្រូវបានតុលាការក្រុងបាងកក ចោទប្រកាន់ ក្រោមច្បាប់ជេរប្រមាថព្រះមហាក្សត្រ និងច្បាប់ឧក្រិដ្ឋកម្មកុំព្យូទ័រ បន្ទាប់ពី លោកបង្ហោះផ្សាយផ្ទាល់វីដេអូ តាមបណ្តាញសង្គម ហ្វេសប៊ុក ដែលនៅក្នុងនោះ លោកថាណាថនបាននិយាយរិះគន់យុទ្ធសាស្រ្តចាក់វ៉ាក់សាំង របស់រដ្ឋាភិបាលថៃ។ សម្រាប់លោកថាណាថន យុទ្ធសាស្រ្តចាក់វ៉ាក់សាំង របស់រដ្ឋាភិបាលដែលរំពឹងផ្អែកខ្លាំងពេកតែទៅលើក្រុមហ៊ុនSiam BioScience តែមួយ គឺជាហានិភ័យខ្ពស់។
លោកថាណាថន រងចោទប្រកាន់ ក្នុងបទជេរប្រមាថ ព្រះមហាក្សត្រ ក៏ដោយសារ តែ នៅក្នុងវីដេអូ លោកបាននិយាយដល់ក្រុមហ៊ុន Siam BioScience ដែល គ្រប់គ្រងដោយCrown property bureau ការិយាល័យហិរញ្ញវត្ថុរបស់រាជវាំង។
នៅក្រៅតុលាការក្រុងបាងកក កាលពីថ្ងៃអង្គារ លោកថាណាថនបាននិយាយថា បើមើលវីដេអូហ្វេសប៊ុករបស់លោកឡើង គ្មានចំណុចណាមួយ ដែលបង្ហាញថា លោកនិយាយរំលោភច្បាប់ជេរប្រមាថព្រះមហាក្សត្រនោះទេ។
លោកថាណាថនអះអាងដែរថា អ្វីដែលលោកបានធ្វើ គឺដើម្បីផលប្រយោជន៍របស់ប្រទេស និងដើម្បីជំរុញឲ្យរដ្ឋាភិបាលសព្វថ្ងៃពិនិត្យមើលសាឡើងវិញ យុទ្ធសាស្រ្តចាក់វ៉ាក់សាំងរបស់ខ្លួនឡើងវិញតែប៉ុណ្ណោះ។ ដូច្នេះ លោកគ្មានអ្វីដែលត្រូវបារម្ភនៅក្នុងរឿងក្តីក្តាំលើកនេះទេ។
មួយវិញទៀត បទចោទប្រកាន់កាលពីថ្ងៃអង្គារមិនបានធ្វើឲ្យលោកថាណាថន ដកថយ លែងរិះគន់រដ្ឋាភិបាលនោះទេ។ លោកថាណាថន បានសំដែងការបារម្ភដែលឃើញ យុទ្ធនាការចាក់វ៉ាក់សាំងរបស់រដ្ឋាភិបាល យឺត ពោលគឺបានត្រឹមតែ១សែន ៥ម៉ឺននាក់ ប៉ុណ្ណោះក្នុងរយៈពេល១ខែមកនេះ។ តាមលោកថាណាថន ថៃកំពុងមានវ៉ាក់សាំង ១លាន ដូស ប៉ុន្តែ សព្វថ្ងៃនេះ ថៃចាក់វ៉ាក់សាំង បានតែ ៥ពាន់ប៉ុណ្ណោះ ក្នុងមួយថ្ងៃ ដែលធ្វើឲ្យថៃត្រូវការ ពេល២០០ថ្ងៃ ដើម្បី បង្ហើយ វ៉ាក់សាំង ១លានដូស។
លោកនាយករដ្ឋមន្រ្តីប្រាយុទ្ធ ចាន់អូចា ធ្លាប់បានចេញមុខ ការពារនយោបាយ ចាក់វ៉ាក់សាំង របស់រដ្ឋាភិបាលថៃ ដែលនៅក្នុងនោះ រដ្ឋាភិបាល បានកុម្ម៉ង់ទិញ វ៉ាក់សាំង របស់ក្រុមហ៊ុនអង់គ្លេសស៊ុយអែត AstraZeneca ៦១លានដូស ចំណែក ក្រុមហ៊ុនSiam BioScience ជាអ្នកបានទទួលសិទ្ធិផលិតវ៉ាក់សាំង AstraZeneca ចំនួន ២០០លានដូស សម្រាប់ការប្រើប្រាស់ នៅប្រទេសថៃ និងប្រទេសជិតខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ