អាមេរិកលម្អិតទណ្ឌកម្មសេដ្ឋកិច្ច ដែលសំដៅតែមេដឹកនាំយោធាភូមា
នៅភូមា បាតុកម្មប្រឆាំងរដ្ឋប្រហារយោធាភូមា បានឈានចូលដល់ថ្ងៃទី ៧ និងកាន់តែរីកធំឡើង បើទោះមានការបង្រ្កាប និងចាប់ខ្លួន បាតុករ ជាច្រើនរយនាក់។ ក្រៅតែពីបាតុកម្មដង្ហែរក្បួន នៅតាមទីក្រុងធំៗ នៅភូមា នៅថ្ងៃសុក្រ នេះ មន្រ្តីរដ្ឋការ ប៉ូលិស បុគ្គលិកពេទ្យបានធ្វើកូដកម្ម មិនព្រមធ្វើការ ដើម្បី ទាមទារឲ្យរបបសឹកភូមា ដោះលែងលោកស្រីអ៊ុងសាន ស៊ូជី។ ប្រមុខដឹកនាំយោធា លោកមីន អ៊ុងឡាំងបានគំរាមពីផលវិបាក បើសិនគេមិនព្រមត្រលប់ចូលធ្វើការ។ កងទ័ពភូមាបានបង្កើនការចាប់ខ្លួនមន្រ្តីប្រឆាំង ដោយមិនខ្លាចរអា នឹងការដាក់ទណ្ឌកម្មសេដ្ឋកិច្ចរបស់អាមេរិក។ អាមេរិកដែលបានលម្អិតទណ្ឌកម្មរបស់ខ្លួន ទៅលើមេដឹកនាំយោធាភូមា។
ចុះផ្សាយនៅថ្ងៃ៖
ស្តាប់ - ០២:៤០
មួយថ្ងៃក្រោយ លោកប្រធានាធិបតី ចូបៃដិន ចេញក្រឹតដាក់ទណ្ឌកម្មសេដ្ឋកិច្ចលើអ្នកទទួលខុសត្រូវ ធ្វើរដ្ឋប្រហារយោធានៅ ភូមា រដ្ឋមន្រ្តី ក្រសួងអាមេរិកាំង សំខាន់ៗចំនួន៣ បានចេញមុខមកលម្អិត ទណ្ឌកម្មសេដ្ឋកិច្ច ដែលលោកចូ បៃដិន សំដៅ ជាពិសេស មេដឹកនាំយោធា ភូមា លោក មីន អ៊ុងឡាំង។
នៅក្នុងសេចក្តីថ្លែងការណ៍ កាលពីថ្ងៃព្រហស្បតិ៍ រដ្ឋមន្រ្តី ហិរញ្ញវត្ថុអាមេរិក លោកស្រី Janet Yellen បាននិយាយព្រមានថា អាមេរិកត្រៀមចាត់វិធានការបន្ថែម បើសិនកងទ័ពភូមា មិនព្រម ដោះលែងលោកស្រីអ៊ុងសាន ស៊ូជី និងត្រលប់មកស្តាររដ្ឋាភិបាលស៊ីវិលឡើងវិញ។ ក្នុងករណីកងទ័ពភូមាប្រើអំពើហិង្សា ដើម្បី បង្រ្កាបទៅលើបាតុកម្មសន្តិភាព នោះ កងទ័ពត្រូវដឹងថា ទណ្ឌកម្ម របស់អាមេរិកនឹងមានច្រើនតទៅទៀត។
ទៅតាមក្រឹតប្រធានាធិបតីដែលបើកផ្លូវឲ្យដាក់ទណ្ឌកម្មសេដ្ឋកិច្ចទៅលើអ្នកដែលរៀបចំឲ្យមានរដ្ឋប្រហារនៅភូមា មេដឹកនាំយោធា មីន អ៊ុងឡាំង អនុប្រធានរបស់លោក ឈ្មោះ សូ វីន ហើយនិងក្រុមហ៊ុន ត្បូង ចំនួន ៣ ត្រូវជាប់ក្នុងសំណាញ់ទណ្ឌកម្មរបស់អាមេរិក។ នៅពេល លោកមីន អ៊ុងឡាំង និងអនុប្រធានរបស់លោក ធ្លាប់ស្ថិតក្នុងបញ្ជីទណ្ឌកម្ម របស់អាមេរិក ដោយសារសំណុំរឿង ធ្វើទុក្ខបុកម្នេញលើជនជាតិរ៉ូហ៊ីងយ៉ា នេះជាលើកទី១ដែលក្រុមហ៊ុនឯកជន ធ្វើជំនួញលើត្បូងភូមា ត្រូវជាប់ទណ្ឌកម្មសេដ្ឋកិច្ចរបស់អាមេរិក ក្នុងហេតុផលថា ក្រុមហ៊ុនដើរតួសំខាន់ នៅក្នុងប្រព័ន្ធដឹកនាំយោធា ភូមា។ ជារួម មានមន្រ្តី យោធាភូមា ១០រូប ដែលក្នុងនោះ មាន លោកមីន អ៊ុងឡាំង និងរដ្ឋមន្រ្តី ការពារជាតិ រដ្ឋមន្រ្តីដឹកជញ្ជូនផង សុទ្ធតែជាប់ក្នុងបញ្ជីទណ្ឌកម្មរបស់រដ្ឋបាលអាមេរិក។
នៅថ្ងៃព្រហស្បតិ៍ ក្រសួងការបរទេសអាមេរិក បានប្រកាសផងដែរថា ក្រសួងនឹងបង្វែរប្រាក់ជំនួយជាង ៤២លានដុល្លារ ដែលត្រូវផ្តល់ទៅឲ្យរដ្ឋាភិបាលភូមា ដើម្បី យកជួយអង្គការសង្គមស៊ីវិល ឬក្រុមហ៊ុនឯកជនភូមា។ ចំណែករដ្ឋមន្រ្តី ក្រសួងពាណិជ្ជកម្មអាមេរិក បានបញ្ជាក់ថា ក្រសួងនឹងចាត់វិធានការបន្ទាន់ ដើម្បីរឹតបន្តឹងការនាំចេញទំនិញទាំងឡាយ ណា ដែលត្រូវបញ្ជូនទៅឲ្យកងទ័ពភូមា។
នៅក្រោយការប្រកាសរបស់លោកចូ បៃដិន ដើម្បីដាក់ទណ្ឌកម្មលើកងទ័ពភូមា រដ្ឋាភិបាលអាមេរិកាំងបានអះអាងដែរថា ខ្លួនបានចាត់វិធានការរួចហើយដើម្បី កុំឲ្យកងទ័ពភូមាអាច ចូលប្រើប្រាស់ទឹកប្រាក់ជាង ១ពាន់លានដុល្លារ ដែលជាមូលនិធិជាតិរបស់រដ្ឋភូមា ដែលមានរក្សាទុក នៅទឹកដី អាមេរិក។
ឧត្តមស្នងការសិទ្ធិមនុស្ស ដែលមានទីតាំងនៅទីក្រុងហ្សឺណែវ បានអំពាវនាវឲ្យ គេផ្តោត ដាក់ទណ្ឌកម្មសេដ្ឋកិច្ច តែទៅលើមេដឹកនាំយោធា ប៉ុន្តែ មិនមែនរដ្ឋាភិបាល ភូមា ជាទូទៅ ជៀសវាងកុំឲ្យប្រជាជនភូមារងគ្រោះបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ