ភូមា៖ អាមេរិកដាក់ទណ្ឌកម្មក្រុមយោធា ខណៈបាតុកម្មប្រជាជនភូមាផុសផុលកាន់តែធំ
ស្ថានការណ៍នយោបាយនៅភូមា បន្តក្តីគគុក ដោយនៅថ្ងៃព្រហស្បតិ៍ ប្រជាជនភូមាច្រើនម៉ឺននាក់ បានធ្វើបាតុកម្ម បើទោះបីជាមានការប្រើកម្លាំង បង្រ្កាបពីសំណាក់អាជ្ញាធរយ៉ាងណាក៏ដោយ។ រដ្ឋាភិបាលអាេមរិក របស់លោកចូ បៃដិន បានប្រកាសថា បានចាត់វិធានការទណ្ឌកម្ម ដោយបានបញ្ចុះលទ្ធភាពប្រើប្រាស់ប្រាក់ របស់ក្រុមយោធាភូមា មកនៅត្រឹមតែ១ពាន់លានដុល្លារប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២៣
កាលពីពីរថ្ងៃមុន សមត្ថកិច្ចភូមាបានចាប់ផ្តើមប្រើកម្លាំង ដើម្បីបំបែកហ្វូងបាតុករ ដោយការបាញ់គ្រាប់កាំភ្លើងជ័រ និងបាញ់ទឹកជាដើម។ បាតុករ២នាក់បានរងរបួសជាទំងន់ ប្រឈមគ្រោះថ្នាក់ដល់ជីវិត។ តែយ៉ាងណាក៏ដោយ ប្រជាជនភូមា ជាច្រើនម៉ឺននាក់ បានចុះផ្លូវធ្វើបាតុកម្ម កាន់តែច្រើននៅថ្ងៃព្រហស្បតិ៍ទី១១កុម្ភៈនេះ។ បុគ្គលិកស្ថាប័នរដ្ឋ បុគ្គលិកឯកជន សឹងទូទាំងប្រទេស បានរួមគ្នាធ្វើកូដកម្ម មិនចូលធ្វើការ ដើម្បីចូលរួមក្នុងសកម្មភាពបាតុកម្មទូទាំងប្រទេស។
ក្រៅពីជនជាតិភូមា នៅមានជនជាតិដើមភាគតិច ដូចជាជនជាតិការ៉េន ជនជាតិរ៉ាឃីន និងកាឈីនជាដើម បានចូលរួមធ្វើបាតុកម្មជាច្រើនម៉ឺននាក់ ក្នុងសម្លៀកបំពាក់ប្រពៃណី ដើម្បីប្រឆាំងនឹងអំណាចផ្តាច់ការរបស់ក្រុមកងទ័ពជាតិភូមា ហើយទាមទារ ឲ្យដោះលែងលោកស្រីអ៊ុងសាន ស៊ូជី និងអ្នកទោសនយោបាយទាំងអស់។
សូមបញ្ជាក់ថា ប៉ុន្មានថ្ងៃចុងក្រោយនេះ សមត្ថកិច្ចភូមា បានចុះចាប់ខ្លួន មនុស្សជាច្រើននាក់ ដើម្បីសំដៅបង្អាក់សន្ទុះចលនាបាតុកម្ម។ ក្នុងចំណោមអ្នកដែលត្រូវគេចាប់ខ្លួន នៅយប់ថ្ងៃពុធ ឈានចូលថ្ងៃព្រហស្បតិ៍នេះ គឺមានលោក អនុប្រធានសភារដ្ឋសភាភូមា ព្រមទាំងសកម្មជននយោបាយ គណបក្សសម្ព័ន្ធជាតិដើម្បីប្រជាធិបតេយ្យ ច្រើននាក់ទៀត។ បើគិតពីថ្ងៃទី១កុម្ភៈ គឺមានមនុស្សជាង២០០នាក់ ដែលត្រូវគេចាប់ខ្លួន។
កាលពីថ្ងៃពុធ លោកប្រធានាធិបតីអាមេរិក ចូ បៃដិន បានបញ្ជាក់ប្រាប់ថា រដ្ឋបាលលោក បានចេញវិធានការទណ្ឌកម្មហិរញ្ញវត្ថុ ទៅលើក្រុមមេទ័ពភូមា ដោយបានកាត់បន្ថយលទ្ធភាពប្រើប្រាស់ប្រាក់របស់ក្រុមនេះ តែត្រឹមចំនួន១ពាន់លានដុល្លារ។ លោកចូ បៃដិន បានបន្ថែមថា លោកកំពុងពិចារណាដាក់ទណ្ឌកម្មបន្ថែមទៀត ដែលនឹងប្រកាសនៅសប្តាហ៍ក្រោយ ដើម្បីដាក់សំពាធឲ្យកងទ័ពភូមា ដោះលែងលោកស្រីអ៊ុងសាន ស៊ូជី។ ដូចគ្នាដែរ លោក ចូហ្សែព បូរែល ប្រមុខការទូតសហភាពអឺរ៉ុប បានប្រាប់ថាសហភាពអឺរ៉ុប កំពុងពិចារណារកទណ្ឌកម្ម ឲ្យមានប្រសិទ្ធភាព ដែលអាចជាទណ្ឌកម្មហិរញ្ញវត្ថុដោយផ្ទាល់ទៅលើក្រុមមេទ័ពភូមា និងទណ្ឌកម្មទៅលើអ្នករកស៊ីធំៗភូមា ដែលសហការជាមួយក្រុមយោធា។
នៅថ្ងៃសុក្រ ទី១២ កុម្ភៈ ក្រុមប្រឹក្សាសិទ្ធិមនុស្សនៃអង្គការសហប្រជាជាតិ នឹងបើកកិច្ចប្រជុំពិសេសមួយ ស្តីពីបញ្ហាភូមានេះ។ គេកំពុងតាមដានមើល យ៉ាងយកចិត្តទុកដាក់បំផុត ស្តីពីគោលជំហរ របស់ចិន និងរុស្ស៊ី នៅក្នុងសំណុំរឿងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ