ភូមា៖កងទ័ពបន្តបើកយុទ្ធនាការចាប់ខ្លួន ខណៈដែលចលនាមហាជនកំពុងបន្តមានសន្ទុះខ្លាំង
នៅក្នុងប្រទេសភូមា ៤ថ្ងៃក្រោយរដ្ឋប្រហារទម្លាក់រដ្ឋាភិបាលជាប់ឆ្នោតរបស់លោកស្រីអ៊ុង សានស៊ូជី ចលនាមហាជនមកពីគ្រប់ស្រទាប់វណ្ណៈប្រឆាំងនឹងរបបសឹកបាន និងកំពុងក៏កំពុងមានយ៉ាងផុសផុលនាថ្ងៃសុក្រ ទី៥ កុម្ភៈ។ ទន្ទឹមគ្នានេះ កងទ័ពក៏កំពុងបន្តបើកយុទ្ធនាការចាប់ខ្លួនក្រុមអ្នកនយោបាយរបស់គណបក្សសម្ព័ន្ធជាតិដើម្បីប្រជាធិបតេយ្យ និងក្រុមសកម្មជនអ្នកប្រជាធិបតេយ្យផ្សេងទៀត។ លោកវីន ថេនដែលជាឥស្សរជនជើងចាស់របស់គណបក្សសម្ព័ន្ធជាតិដើម្បីប្រជាធិបតេយ្យត្រូវបានកងទ័ពចាប់ខ្លួននៅផ្ទះកូនស្រីរបស់គាត់នាព្រលឹមស្រាងៗព្រឹកថ្ងៃសុក្រ ទី៥ កុម្ភៈនេះ។
ចុះផ្សាយនៅថ្ងៃ៖
ស្តាប់ - ០២:៣១
ប្រជាជនភូមាមកពីគ្រប់មជ្ឈដ្ឋានមានតាំងពីប្រជាជនសាមញ្ញ គ្រូបង្រៀន សិស្ស និស្សិត ក្រុមមេធាវី ក្រុមគ្រូពេទ្យ និងមន្រ្តីរដ្ឋការបានបន្តនាំគ្នាប្រឆាំងនឹងក្រុមឧត្តមសេនីយដែលបានធ្វើរដ្ឋប្រហារទម្លាក់រដ្ឋាភិបាលស៊ីវិលកាលពី ៤ថ្ងៃមុន។ នៅក្នុងទីក្រុងរ៉ង់ហ្គូន ក្រុមបាតុករជាគ្រូបង្រៀន និងសិស្ស និស្សិតបានចុះផ្លូវធ្វើបាតុកម្មដោយបានលើកម្រាមដៃចំនួន ៣ ជាសញ្ញានៃការតស៊ូដែលចម្លងគំរូតាមចលនាគាំទ្រប្រជាធិបតេយ្យនៅហុងកុង និងនៅប្រទេសថៃ។ ទន្ទឹមគ្នានេះ ពួកគេក៏បានស្រែកច្រៀងនូវចម្រៀងពេញនិយមមួយកាលពីសម័យបះបោរប្រឆាំងនឹងរបបសឹកក្នុងឆ្នាំ ១៩៩៨ និងដែលកាលណោះត្រូវបានរបបសឹកវាយបង្រ្កាបយ៉ាងចាស់ដៃ។
« ដរាបណាពួកឧត្តមសេនីយបន្តកាន់អំណាច យើងនឹងមិនត្រឡប់ចូលធ្វើការវិញទេ។ បើទាំងអស់គ្នាធ្វើដូចនេះ ប្រព័ន្ធដឹកនាំរបស់កងទ័ពនឹងមិនអាចនៅយូរបានឡើយ » នេះជាការថ្លែងរបស់គ្រូបង្រៀនម្នាក់។ ចំណែកប្រជាជនក្នុងទីក្រុងរ៉ង់ហ្គូនបាននាំគ្នាបន្តចុចស៊ីផ្លេឡាន និងដំលើគូទឆ្នាំងដើម្បីបណ្តេញព្រាយបីសាចដែលជាពួកកងទ័ព។ ខណៈដែលចលនាមហាជនកំពុងបន្តមានកាន់តែខ្លាំង កងទ័ពក៏កំពុងបន្តប្រតិបត្តិការចាប់ខ្លួនក្រុមអ្នកនយោបាយរបស់គណបក្សសម្ព័ន្ធជាតិដើម្បីប្រជាធិបតេយ្យ និងក្រុមសកម្មជនអ្នកប្រជាធិបតេយ្យផ្សេងទៀត។ អង្គការក្រៅរដ្ឋាភិបាលមួយដែលមានទីស្នាក់ការក្នុងក្រុងរ៉ង់ហ្គូនបានឲ្យដឹងថា មានមនុស្សជិត ១៥០នាក់ត្រូវបានកងទ័ពចាប់ខ្លួន។
ជាក់ស្តែងនៅព្រលឹមស្រាងៗព្រឹកថ្ងៃសុក្រ ទី៥ កុម្ភៈ កងទ័ពបានចាប់ខ្លួនលោកវីន ថេននៅផ្ទះកូនស្រីរបស់គាត់។ មានអាយុ ៧៩ឆ្នាំ លោកវីន ថេនជាឥស្សរជននយោបាយជើងចាស់ម្នាក់របស់គណបក្សសម្ព័ន្ធជាតិដើម្បីប្រជាធិបតេយ្យ និងធា្លប់បានជាប់គុកជាង ២០ឆ្នាំនៅក្នុងរបបសឹកពីឆ្នាំ ១៩៨៩ដល់ឆ្នាំ ២០១០។ ព្រឹត្តិការណ៍រដ្ឋប្រហារនៅភូមាកំពុងត្រូវបានបស្ចិមលោកបន្តថ្កោលទោស។ តែនៅក្នុងកិច្ចប្រជុំបន្ទាន់របស់ក្រុមប្រឹក្សាសន្តិសុខ សេចក្តីថ្លែងការណ៍រួមបានត្រឹមសម្តែងក្តីបារម្ភ និងអំពាវនាវឲ្យមានការដោះលែងអ្នកដែលបានចាប់ខ្លួន ពោលមិនបានថ្កោលទោសលើរដ្ឋប្រហារនោះទេ។ នេះក៏ដោយសារតែមានការរារាំង ជំទាស់ពីប្រទេសរុស្ស៊ី និងចិន ពិសេសចិនដែលជាអ្នកគាំទ្រ និងការពារភូមាក្នុងគ្រប់កាលៈទេសៈទាំងអស់នៅអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ