ក្រោយរដ្ឋប្រហារ ចលនាប្រជាជនតវ៉ាប្រឆាំងនឹងរបបសឹកចាប់កើតឡើង
ពីរថ្ងៃក្រោយរដ្ឋប្រហារទម្លាក់រដ្ឋាភិបាលស៊ីវិល ដែលសហគមន៍អន្តរជាតិបានធ្វើការថ្កោលទោសជាទូទៅមក ការទាមទារឱ្យប្រជាជនងើបឡើងតវ៉ាប្រឆាំងនឹងរបបសឹក ចាប់កើតមានកាន់តែច្រើនឡើងៗ។ នៅថ្ងៃពុធទី ៣កុម្ភៈ២០២១ ក្រុមគ្រូពេទ្យ បុគ្គលិកសុខាភិបាល បាននាំមុខងើបតវ៉ាមុនគេ។ ហើយទន្ទឹមគ្នានេះ សហរដ្ឋអាមេរិក បានធ្វើការចោទប្រកាន់ជាផ្លូវការក្រុមយោធាភូមាពីបទធ្វើរដ្ឋប្រហារដណ្តើមអំណាចពីលោកស្រី អ៊ុងសានស៊ូជី និងបានសន្យាដាក់ទណ្ឌកម្មជាថ្មីប្រឆាំងនឹងក្រុមឧត្តមសេនីយ៍ទាំងអស់នោះ។
ចុះផ្សាយនៅថ្ងៃ៖
ស្តាប់ - ០២:០២
ចលនាបះបោរតវ៉ាប្រឆាំងនឹងរបបសឹកចាប់លេចជាសញ្ញាបណ្តើរៗ។ ក្រុមគ្រូពេទ្យ និងបុគ្គលិកសុខាភិបាល បាននាំគ្នាចងបូក្រហម និងប្រកាសមិនធ្វើការទេ លើកលែងតែដើម្បីសង្គ្រោះអ្នកជំងឺករណីបន្ទាន់។ អ្នកទទួលខុសត្រូវមន្ទីរពេទ្យ Magway ដែលមានគ្រែអាចទទួលអ្នកជំងឺបាន១០០នាក់ បានប្រកាសថាពួកគេគោរពតែបញ្ជារបស់រដ្ឋាភិបាលប្រសូតចេញពីការបោះឆ្នោតដោយសេរីប្រជាធិបតេយ្យប៉ុណ្ណោះ។
ក្រុម “ចលនាតវ៉ាប្រជាជន” ក៏ទើបត្រូវបានបង្កើតឡើងតាមប្រព័ន្ធសង្គម ហ្វេសប៊ុក ដោយប្រមូលបានអ្នកចូលរួមប្រមាណ ១៥ម៉ឺននាក់ហើយ។ នៅរ៉ង់ហ្គូនទីក្រុងសេដ្ឋកិច្ចរបស់ប្រទេស ក្នុងសង្កាត់ពាណិជ្ជកម្ម ក្រុមអ្នកជំនួញ អ្នកលក់ដូរ និងប្រជាជនសាមញ្ញ នាំគ្នាគោះចានគោះឆ្នាំង បញ្ចេញសំឡេងប្រឆាំង នៅល្ងាចថ្ងៃអង្គារមិ្សលមិញ ជាមួយនឹងសម្រែកថា “ជយោម៉ែស៊ូ (អ៊ុងសានស៊ូជី)!
ដឹងថាមានការរៀបចំធ្វើរដ្ឋប្រហារទម្លាក់ លោកស្រីជ័យលាភីរង្វាន់ណូបែលសន្តិភាព ដែលទំនងកំពុងជាប់ឃុំក្នុងគេហដ្ឋានជាថ្មី បានសរសេរលិខិតទុកជាមុន អំពាវនាវឱ្យប្រជាពលរដ្ឋ កុំព្រមទទួលយកព្រឹត្តិការណ៍រដ្ឋប្រហារនេះ។ ប៉ុន្តែ ភាពភ័យខ្លាចនៅមានដក់ជាប់ក្នុងអារម្មណ៍ពលរដ្ឋដែលដឹងថាពួកយោធាផ្តាច់ការមិនរអារនឹងប្រើវិធីបង្កា្របយ៉ាងហិង្សាទេ ទើបចលនាតវ៉ាប្រឆាំងពិបាកលេចចេញជារូបរាងខ្លាំង។
អាជ្ញាធរសឹកបានព្រមានរួចជាស្រេចហើយ នូវរាល់ពាក្យសំដីឬសារណាដែលញុះញង់ឱ្យមានការងើបតវ៉ាហិង្សា និងបង្កអស្ថិរភាពសង្គម។ បើតាមឧត្តមសេនីយ៍ មីន អ៊ុងឡាំង ដែលបច្ចុប្បន្នជាអ្នកក្តោបអំណាចប្រទេសស្ទើរទាំងស្រុង រដ្ឋប្រហារនេះជាទង្វើចាំបាច់ដើម្បីស្ថិរភាពជាតិ។
រដ្ឋប្រហារថ្ងៃទី ១កុម្ភៈបានជំរុញឱ្យសហគមន៍អន្តរជាតិថ្កោលទោសពីគ្រប់ទិសទី។ បន្ទាប់ពីបានចោទក្រុមយោធាថាអ្នករៀបចំធ្វើរដ្ឋប្រហារដើម្បីតែទម្លាក់លោកស្រី អ៊ុងសាន ស៊ូជី រដ្ឋបាលអាមេរិករបស់លោក ចូ ដៃដិន បានដំឡើងសំឡេងដាក់ភូមា ដោយព្រមានដាក់ទណ្ឌកម្មជាថ្មី បិទខ្ទប់តាមផ្លូវច្បាប់មិនឱ្យមានជំនួយអាមេរិកផ្ទាល់ទៅជួយរដ្ឋភូមាទៀតទេ។ តែនេះជាទណ្ឌកម្មជានិម្មិតរូបប៉ុណ្ណោះ ព្រោះក្រុមយោធាភូមាជាប់ទណ្ឌកម្មអាមេរិកតាំងពីមានផ្ទុះវិបត្តិរ៉ូហ៊ីងយ៉ា ឆ្នាំ២០១៧មកស្រាប់ទៅហើយ។
ចំណែកក្រុមប្រឹក្សាសន្តិសុខអង្គការសហប្រជាជាតិ ដែលបានជួបប្រជុំគ្នាបន្ទាន់នៅយប់មិញ ដោយបិទទ្វារវិញ មិនអាចព្រមព្រៀងគ្នាចេញសេចក្តីសម្រេចចិត្តរួមបានទេ។ ក្រុមប្រឹក្សាកំពុងបន្តការចរចាទៀត ដើម្បីកុំឱ្យចិនជាសម្ព័ន្ធមិត្តភូមាប្រើសិទ្ធិប្រឆាំងវេតូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ