ចិនប្រកាសបើកទីផ្សារកាបូនជាផ្លូវការដើម្បីចូលរួមកាត់បន្ថយឧស្ម័នផ្ទះកញ្ចក់
មហាអំណាចចិនដែលចង់បានអព្យាក្រឹតកាបូន នៅ ឆ្នាំ ២០៦០ បានចាប់ផ្តើមបើកទីផ្សារកាបូនរបស់ខ្លួន ជាផ្លូវការ នៅថ្ងៃចន្ទ ទី ១កុម្ភៈ ឆ្នាំ ២០២១។ ទីផ្សារកាបូនរបស់ចិននឹង សំខាន់ធំជាងគេនៅលើផែនដី គឺធំជាងទីផ្សារកាបូនដែលសហភាពអឺរ៉ុបបានបង្កើតឡើងនៅ ឆ្នាំ ២០០៥។ ទីផ្សារកាបូនមានទិសដៅចំបង កាត់បន្ថយឧស្ម័នផ្ទះកញ្ចក់ តាមរយៈប្រព័ន្ធទិញដូរ កូតា និងសិទ្ធិបញ្ចេញឧស្ម័នកាបូនិក ទៅក្នុងបរិយាកាស។
ចុះផ្សាយនៅថ្ងៃ៖
ចិនដែលបញ្ចេញឧស្ម័នកាបូនិកទៅក្នុងបរិយាកាសច្រើនជាងគេ ក្នុងពិភពលោក ធ្លាប់បានដាក់គោលដៅ នៅឆ្នាំ ២០១៥ ថា នឹងបង្កើតទីផ្សារកាបូន នៅ ឆ្នាំ ២០១៧ ដើម្បី កាត់បន្ថយឧស្ម័ន ពុល តាមរយៈ ការចាប់បង្ខំរោងចក្រ ក្រុមហ៊ុនចិន ឲ្យបង់ប្រាក់ សម្រាប់បរិមាណ ឧស្ម័នកាបូនិក ដែលខ្លួនបញ្ចេញលើសកូតា។
ប៉ុន្តែ ទើបនៅថ្ងៃទី ១កុម្ភៈ ឆ្នាំ ២០២១ (ជិត៤ឆ្នាំក្រោយ) ដែលប្រទេសចិនបានសម្រេចបើកជាផ្លូវការទីផ្សារកាបូន ដែលធំជាងគេ នៅក្នុងពិភពលោក។ តាមការចុះផ្សាយរបស់ទីភ្នាក់ងារព័ត៌មានចិនថ្មី ប្រព័ន្ធដោះដូរកូតា ឧស្ម័នកាបូនិក ដែលជាប្រភពនៃឧស្ម័នផ្ទះកញ្ចក់ បានចូលជាធរមាននៅ ប្រទេសចិន ចាប់ពី ថ្ងៃទី ១កុម្ភៈ។ ប្រព័ន្ធនេះនឹងអនុញ្ញាតឲ្យអាជ្ញាធរខេត្តអាចកំណត់កូតា បញ្ចេញឧស្ម័នកាបូនិក សម្រាប់ រោងចក្រ អគ្គិសនី។ វាអនុញ្ញាតផងដែរឲ្យក្រុមហ៊ុនផលិតថាមពលអគ្គិសនី អាចដោះដូររវាងគ្នា នូវសិទ្ធិបញ្ចេញឧស្ម័នពុល។
ច្បាប់ថ្មី នឹងគ្របដណ្តប់លើរោងចក្រអគ្គិសនី ចំនួនជាង២០០០ដែលបញ្ចេញឧស្ម័នផ្ទះកញ្ចក់ ប្រមាណ ២៦ ០០០តោន ក្នុងមួយឆ្នាំៗ។ តាមអង្គការ ដៃគូអន្តរជាតិដើម្បីសកម្មភាពស្តីពីកាបូន ទៅថ្ងៃអនាគត ទីផ្សារកាបូនរបស់ចិន នឹងគ្របដណ្តប់ទៅលើមួយភាគបី នៃឧស្ម័នផ្ទះកញ្ចក់ ដែលប្រទេសចិនបញ្ចេញចោល ក្នុងមួយឆ្នាំៗ។
សព្វថ្ងៃនេះ ប្រទេសចិន នៅតែនាំមុខគេខាងបញ្ចេញឧស្ម័នកាបូនិក ដែលជាឧស្ម័នផ្ទះកញ្ចក់ ធ្វើឲ្យផែនដីឡើងកំដៅ។ នៅឆ្នាំ ២០១៩ ចិនបញ្ចេញឧស្ម័នកាបូនិក ជិត ១៤ពាន់លានតោន ដែលស្មើនឹង ២៩ភាគរយនៃការបញ្ចេញឧស្ម័នកាបូនិកសរុប ក្នុងពិភពលោក។
នៅ ខែកញ្ញា ឆ្នាំ ២០២០ ប្រធានាធិបតី ចិន លោកស៊ី ជីនពីង បានបង្កើតភាពភ្ញាក់ផ្អើលជាទូទៅមួយ ដោយបានប្រកាស ដាក់ផែនការថា ចិន នឹងអាចមានអព្យាក្រឹតកាបូន នៅឆ្នាំ ២០៦០។
អព្យាក្រឹតកាបូនគឺជាយន្តការ កាត់បន្ថយការបញ្ចេញឧស្ម័នឲ្យមកនៅកម្រិតទាបបំផុតតាមដែលអាចធ្វើទៅបាន ហើយក្នុងពេលជាមួយគ្នា បង្កើនសមត្ថភាពក្នុងការស្រូបយកឧស្ម័នកាបូនិក ពីបរិយាកាស នៅក្នុងបរិមាណស្មើនឹងឧស្ម័ន ដែលយើងមិនអាចកាត់បន្ថយបាន។ ការទូទាត់ចុងក្រោយ គឺការបញ្ចេញឧស្ម័នទៅក្នុងបរិយាកាសនឹងត្រូវធ្លាក់មកនៅត្រឹមកម្រិតសូន្យ។
សម្រាប់ Lauri Myllyvirta អ្នកវិភាគរបស់មជ្ឈមណ្ឌល ស្រាវជ្រាវស្តីពីថាមពល និងខ្យល់បរិសុទ្ធ ប្រទេសចិនអាច សម្រេចគោលដៅ របស់ខ្លួន ដើម្បីមានអព្យាក្រឹតកាបូន និងត្រលប់ទៅប្រើថាមពលស្អាតស្អំ ថាមពលកកើតឡើងវិញ។ ប៉ុន្តែ ទីផ្សារកាបូនរបស់ចិន បច្ចុប្បន្ននេះ មិនអាចជួយឲ្យចិនអាចសម្រេចមហិច្ឆតានេះ បាននៅឡើយទេ។
ដើម្បី ផលិតអគ្គិសនី រោងចក្រចិនពឹងផ្អែកលើទៅថាមពលបានមកពីការដុតធ្យូងថ្ម ដល់ទៅ ៦០ភាគរយ។ តាមអ្នកជំនាញរបស់អង្គការGreen Peace បើទោះបីជាសន្យាចូលរួមកាត់បន្ថយការបញ្ចេញឧស្ម័នកាបូនិក ប៉ុន្តែ រោងចក្រអគ្គិសនី ដើរដោយថាមពលធ្យូងថ្ម កំពុងកើន ដុះរីកដូចផ្សិត។ ក្រុមហ៊ុន រោងចក្រផលិតអគ្គិសនី ដែលបានមកពី ថាមពលធ្យូងថ្ម កំពុងចរចា ដាក់សម្ពាធ ធ្វើយ៉ាងណាឲ្យឥណទានកាបូនមានតម្លៃថោក ដើម្បីកុំឲ្យពួកគេត្រូវចំណាយលុយច្រើន បង់ថ្លៃសម្រាប់បរិមាណ កាបូនដែល គេបញ្ចេញហួសចំនួន កូតា ដែលកំណត់ដោយអាជ្ញាធរចិន។
ចំណែក អាជីវកម្មផលិតធ្យូងថ្ម កំពុងហក់ឡើង វិញ ក្នុងកម្រិតមួយខ្ពស់ ដូចចន្លោះឆ្នាំ ២០១២ និងឆ្នាំ ២០១៤ ជារយៈពេល ដែលការបញ្ចេញឧស្ម័នកាបូនិករបស់ចិន បានកើនឡើងដល់កម្រិតមួយដ៏ខ្ពស់ ខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ