ចិនទំនងជាយកវ៉ាក់សាំងកូវីដជាអាវុធដើម្បីស្តារមុខមាត់និងទាញផលចំណេញផ្នែកការទូត
ខណៈបណ្តាប្រទេសអ្នកមានជាច្រើនកំពុងព្យាយាមទិញថ្នាំវ៉ាក់សាំងដើម្បីទប់ស្កាត់ជំងឺកូវីដ១៩ ឲ្យបានឆាប់ ប្រទេសចិនឯណោះវិញកំពុងដាក់ចេញនូវផែនការផ្តល់ថ្នាំបង្ការកូវីដដោយឥតគិតថ្លៃដល់ក្រុមប្រទេសក្រីក្រក្នុងលោក។ យុទ្ធសាស្ត្ររបស់ចិននេះ ត្រូវអ្នកជំនាញលើកឡើងថាធ្វើឡើងដើម្បីទាញយកមកវិញនូវផលចំណេញខាងផ្នែកការទូតរយៈពេលវែង។
ចុះផ្សាយនៅថ្ងៃ៖
ស្តាប់ - ០២:២៧
យុទ្ធសាស្រ្តក្នុងការផ្តល់វ៉ាក់សាំងដោយឥតគិតថ្លៃដល់ប្រទេសក្រីក្រនេះ អាចនឹងហុចផលចំណេញជាច្រើនដល់ក្រុងប៉េកាំង។ ទី១ វាអាចបង្វែរកំហឹងនិងការរិះគន់លើចំណាត់គ្រប់គ្រងកូវីដដំបូងរបស់ចិន។ ទី២ លើកស្ទួយមុខមាត់មន្ទីរពិសោធន៍ចិន ចំណែកផលប្រយោជន៍ទី៣ គឺជួយក្រុងប៉េកាំងក្នុងការពង្រឹងនិងពង្រីកឥទ្ធិពលកាន់តែខ្លាំងជាងមុននៅក្នុងទ្វីបអាស៊ីនិងទ្វីបផ្សេងទៀត។
លោកហ័ង យានចុង (Huang Yanzhong) សមាជិកជាន់ខ្ពស់ផ្នែកសុខភាពពិភពលោកនៃក្រុមប្រឹក្សាទំនាក់ទំនងបរទេស (CFR) បានប្រាប់ទីភ្នាក់ងារព័ត៌មាន AFP ថាវាគ្មានអ្វីគួរឲ្យសង្ស័យនោះទេដែលថាចិនកំពុងយកវ៉ាក់សាំងប្រឆាំងកូវីដរបស់ខ្លួនជាអាវុធការទូត ដើម្បីជួលជុលស្តារមុខមាត់ ពង្រឹងនិងបង្កើនឥទ្ធិពលនៅក្នុងពិភពលោក។
ក្នុងគ្រាដំបូងដែលជំងឺកូវីដផ្ទុះឡើងជាសកល ខណៈបណ្តាប្រទេសលោកខាងលិចធំៗជាច្រើននៅជាប់ដៃប្រយុទ្ធទល់នឹងជំងឺកូវីដ ចិនបានប្រញាប់ប្រញាល់ដឹកម៉ាស់និងបរិក្ខារពេទ្យទៅលក់ឲ្យអឺរ៉ុបដូចជាអ៊ីតាលីជាដើមក្នុងតម្លៃទាប និងបានបញ្ជូនផងដែរក្រុមគ្រូពេទ្យចិនទៅជួយអឺរ៉ុប និងអាហ្វ្រិក។
ចំណែកបច្ចុប្បន្ននេះ នៅពេលដែលមន្ទីរពិសោធន៍ឱសថធំៗរបស់លោកខាងលិចចាប់ផ្តើមលក់វ៉ាក់សាំងរបស់ខ្លួនក្នុងតម្លៃមួយដ៏ថ្លៃ ចិនបែរបានប្រកាសលក់វ៉ាក់សាំងឲ្យប្រទេសកំពុងអភិវឌ្ឍក្នុងលោកក្នុងតម្លៃធូរថ្លៃ បើទោះបីជាប្រទេសខ្លះមានទំនាក់ទំនងមិនសូវជាល្អូកល្អិននឹងចិនក៏ដោយ។ ក្រៅពីនេះ រដ្ឋាភិបាលក្រុងប៉េកាំងក៏បានប្រកាសសន្យាផងដែរផ្តល់វ៉ាក់សាំងដោយឥតគិតថ្លៃដល់បណ្តាប្រទេសក្រីក្រ ។
អ្នកការទូតចិន បានចុះហត្ថលេខាលើកិច្ចព្រមព្រៀងជាមួយប្រទេសម៉ាឡេស៊ី និងហ្វីលីពីន ដែលសុទ្ធតែជាប្រទេសមានជម្លោះដណ្តើមទីប្រជុំកោះជាមួយចិននៅក្នុងសមុទ្រចិនខាងត្បូង។ បន្ថែមលើនេះ កាលពីខែសីហា ឆ្នាំ២០២០ លោកនាយករដ្ឋមន្រ្តីចិនលី ខឺឈាំង ក៏បានប្រកាសថាវ៉ាក់សាំងចិននឹងត្រូវផ្តល់ជាអាទិភាពដល់បណ្តាប្រទេសអនុតំបន់ទន្លេមេគង្គរួមមានកម្ពុជា ថៃ ឡាវ វៀតណាម និងភូមា។ ជាទីដែលទទួលរងគ្រោះរាំងស្ងួតធ្ងន់ធ្ងរដោយសារតែទំនប់របស់ចិនដែលបានសាងសង់នៅខ្សែទឹកខាងលើ។
ជារួមមកបើតាមក្រុមអ្នកជំនាញ អាទិភាពរបស់ចិនទាក់ទងនឹងវ៉ាក់សាំងប្រឆាំងកូវីដមិនមែនសំដៅខ្លាំងលើផលចំណេញផ្នែកលុយកាក់នោះទេ តែជាផលចំណេញផ្នែកការទូតរយៈពេលវែងដោយផ្តោតលើការស្តារមុខមាត់ លើកកិត្យានុភាព ពង្រឹង និងពង្រីកឥទ្ធិពលរបស់ចិនឲ្យកាន់តែខ្លាំងនៅលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ