ចិនសាទរចំពោះភាពជោគជ័យក្នុងការគ្រប់គ្រងកូវីដមុនការស៊ើបអង្កេតរបស់អង្គការសុខភាពពិភពលោក
ថ្នាក់ដឹកនាំបក្សកុម្មុយនិស្តចិនបានអបអរសាទរចំពោះភាពជោគជ័យដ៏ត្រចះត្រចង់របស់ពួកគេ ក្នុងការទប់ស្កាត់ការឆ្លងរីករាលដាលជំងឺកូវីដនៅក្នុងប្រទេស។ ការចេញមុខសាទរនេះ ធ្វើឡើងនៅមុនពេលដែលអង្គការសុខភាពពិភពលោកនឹងត្រូវទៅដល់ទីក្រុងវូហានប្រទេសចិនដើម្បីស្រាវជ្រាវស្វែងរកប្រភពដើមនៃកូវីដនៅខែមករា ដើមឆ្នាំ ២០២១។
ចុះផ្សាយនៅថ្ងៃ៖
ស្តាប់ - ០២:៤៩
រដ្ឋាភិបាលចិនធ្លាប់ប្រឈមមុខទៅនឹងការរិះគន់យ៉ាងខ្លាំងទាំងក្នុងនិងក្រៅប្រទេសទាក់ទងនឹងវិធានការឆ្លើយតបដំបូងប្រឆាំងទល់ទៅនឹងការឆ្លងរាតត្បាតជំងឺកូវីដ១៩ ដែលបានផ្ទុះឡើងនៅកណ្តាលទីក្រុងវូហានកាលពីខែធ្នូ ឆ្នាំ ២០១៩។
ការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិនដែលជាស្ថាប័នកំពូលមួយនៅក្នុងប្រទេសបាននិយាយកាលពីល្ងាចថ្ងៃសុក្រ ទី២៥ ធ្នូម្សិលមិញថាថ្នាក់ដឹកនាំបក្សបានដើរតួនាទីយ៉ាងសំខាន់ក្នុងការដឹកនាំចិនឲ្យយកឈ្នះលើហានិភ័យនិងបញ្ហាប្រឈមដ៏កម្រដូចជាជំងឺកូវីដនៅឆ្នាំ ២០២០។
“នៅវេលាលំបាក គណៈកម្មាធិការមជ្ឈិមបក្សបានសម្លឹងឃើញជាយូរមកហើយ…ពីការទទួលបានជ័យជម្នះដ៏ត្រចះត្រចង់បំផុតនាឆ្នាំនេះ”។ នេះគឺជាសេចក្តីរាយការណ៍របស់ទីភ្នាក់ងារព័ត៌មានស៊ីនហួដោយបានដកស្រង់សេចក្តីថ្លែងការណ៍មួយដែលមានចេញផ្សាយបន្ទាប់ពីកិច្ចប្រជុំរយៈពេលពីរថ្ងៃរបស់ថ្នាក់ដឹកនាំចិន។
គួរកត់សម្គាល់ថា ទីក្រុងប៉េកាំងបានគ្រប់គ្រងនិងទប់ស្កាត់ការឆ្លងរាលដាលជំងឺកូវីដប្រកបដោយជោគជ័យចាប់ខែមេសាមក ហើយចិនក៏ទំនងជាប្រទេសមហាអំណាចពិភពលោកតែមួយគត់ដែលមានអត្រាកំណើនសេដ្ឋកិច្ចវិជ្ជមាននៅឆ្នាំនេះ។
ក៏ប៉ុន្តែនៅគ្រាកន្លងមក អាជ្ញាធរចិនត្រូវបានប្រទេសជាច្រើនជាពិសេសប្រទេសលោកខាងលិច ចោទប្រកាន់ថាបានបិទបាំងអពីការផ្ទុះឡើងដំបូងនៃជំងឺកូវីដនិងថាចិនគឺជាអ្នករួមចំណែកធ្វើឲ្យជំងឺនេះឆ្លងរីករាតត្បាតខ្លាំងពាសពេញសកលលោក។ ចំណែកនៅក្នុងប្រទេសឯណោះវិញ ទីក្រុងប៉េកាំងបានព្យាយាមរឹតត្បិតមតិរិះគន់ដោយដាក់ទោសក្រុមអ្នកដែលហ៊ាននិយាយរិះគន់ខ្លួនយ៉ាងហោចណាស់ក៏ ៨ នាក់ដែរ។
ជាក់ស្តែង អ្នកកាសែតសញ្ជាតិចិនម្នាក់ដែលបានរាយការណ៍អំពីការផ្ទុះឡើងនៃជំងឺកូវីដ១៩ នៅទីក្រុងវូហានគឺលោកស្រីចាង ហ្សាន ត្រូវបានចាប់ឃុំខ្លួនចាប់តាំងពីខែឧសភា។ គេរំពឹងថាករណីរបស់លោកស្រីនឹងត្រូវជំនុំជម្រះនៅថ្ងៃចន្ទដើមសប្តាហ៍ក្រោយ។ នេះបើតាមការចុះផ្សាយរបស់ទីភ្នាក់ងារព័ត៌មានបារាំង AFP។
គួរជ្រាបថា កិច្ចប្រជុំនយោបាយរយៈពេល ២ ថ្ងៃរបស់ថ្នាក់ដឹកនាំចិនធ្វើឡើងភ្លាមៗនៅកៀកពេលដែលក្រុមអ្នកជំនាញអន្តរជាតិរបស់អង្គការសុខភាពពិភពលោកត្រូវទៅដល់ទីក្រុងវូហាននៃប្រទេសចិននៅខែមករា ឆ្នាំ២០២១ក្រោយដើម្បីស៊ើបអង្កេតពីប្រភពដើមនៃជំងឺកូវីដ។
សម្រាប់ដំណើរផ្លូវការទៅស្រាវជ្រាវរកប្រភពដើមនៃកូវីដនៅចិន អង្គការសុខភាពពិភពបានគូសបញ្ជាក់ថា វាមិនមែនជាការជីកឫសជីកគល់ស្វែងរកតើថាប្រទេសណាខុសពាក់ព័ន្ធនឹងការផ្ទុះឡើងនៃមេរោគកូវីដនោះទេ។ ជាមួយគ្នានេះ ក្រុមអ្នកជំនាញសង្ឈឹមថាបញ្ហានយោបាយនឹងមិននៅតាមជាប់ទាក់តៀមនឹងបេសកកម្មរបស់ពួកគេឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ