អង្គការសហប្រជាជាតិអំពាវនាវឲ្យសហគមន៍អន្តរជាតិកុំបំភ្លេចប្រទេសអាហ្វហ្កានីស្ថាន
សន្និសីទអន្តរជាតិនៃក្រុមប្រទេសផ្តល់ជំនួយសម្រាប់ប្រទេសអាហ្វហ្កានីស្ថានចាប់ផ្តើមពីថ្ងៃចន្ទ ទី២៣ វិច្ឆិកាក្នុងទីក្រុងហ្សឺណែវ ប្រទេសស៊្វីស។ តែនៅក្នុងបរិបទនៃជំងឺកូវីដ១៩ សន្និសីទលើកនេះរៀបចំតាមប្រព័ន្ធអនឡាញ។ ថ្លែងនៅមុនសន្និសីទចាប់ផ្តើម ប្រមុខអង្គការសហប្រជាជាតិទទួលបន្ទុកជនភៀសខ្លួនលោកហ្វីលីពប៉ូ ក្រង់ឌីបានអំពាវនាវឲ្យសហគមន៍អន្តរជាតិបន្តជួយប្រទេសអាហ្វហ្វានីស្ថាន។ ការអំពាវនាវរបស់លោកហ្វីលីពប៉ូបានធ្វើឡើងក្នុងពេលដែលអាហ្វហ្កានីស្ថានកំពុងបន្តស្គាល់កំណើនអំពើហិង្សា គម្រោងដកទ័ពអាមេរិក និងក្នុងពេលដែលកិច្ចចរចាសន្តិភាពរវាងក្រុមឧទ្ទាមតាលីបង់ និងរដ្ឋាភិបាលអាហ្វហ្កានីស្ថានកំពុងបន្តអូសជើង។
ចុះផ្សាយនៅថ្ងៃ៖
ស្តាប់ - ០២:៣៦
ការអំពាវនាវយ៉ាងទទូចរបស់លោកហ្វីលីពប៉ូ ក្រង់ឌីបានធ្វើឡើង បន្ទាប់ពីលោកបានទៅបំពេញទស្សនកិច្ចរយៈពេល ៥ថ្ងៃក្នុងទឹកដីអាហ្វហ្កានីស្ថាន។ « អនាគតពលរដ្ឋអាហ្វហ្កានីស្ថានរាប់សិបលាននាក់រំពឹងលើជោគជ័យនៃកិច្ចចរចាសន្តិភាពរវាងភាគីជម្លោះផ្ទៃក្នុងផង និងការសន្យារបស់សហគមន៍អន្តរជាតិដើម្បីជួយអភិវឌ្ឍប្រទេសផង » នេះជាការថ្លែងរបស់លោកហ្វីលីពប៉ូនៅក្នុងសេចក្តីប្រកាសព័ត៌មានមួយរបស់អង្គការសហប្រជាជាតិទទួលបន្ទុកជនភៀសខ្លួនហៅកាត់ HCR។ គួរបញ្ជាក់ថា សន្និសីទអន្តរជាតិនៃក្រុមប្រទេសផ្តល់ជំនួយសម្រាប់ប្រទេសអាហ្វហ្កានីស្ថានមានគោលដៅកំណត់កម្មវត្ថុរួមនៃការអភិឌ្ឍន៍ និងកិច្ចសន្យាផ្នែកហិរញ្ញវត្ថុសម្រាប់ឆ្នាំ ២០២១ ពីរដ្ឋាភិបាលអាហ្វហ្កានីស្ថាន និងសហគមន៍អន្តរជាតិ។
ប្រមុខ HCR លោកហ្វីលីពប៉ូបានគូសបញ្ជាក់ពីភាពបន្ទាន់បំផុតដែលក្រុមតាលីបង់ និងរដ្ឋាភិបាលអាហ្វហ្កានីស្ថានត្រូវសម្រេចឲ្យបានឆាប់នូវកិច្ចព្រមព្រៀងសន្តិភាពរវាងគ្នា។ តាមលោកហ្វីលីពប៉ូ កិច្ចព្រមព្រៀងសន្តិភាពជារឿងចាំបាច់ខ្លាំងណាស់ដើម្បីបិទបញ្ចប់ជម្លោះដែលមិនត្រឹមតែបំផ្លាញជីវិតមនុស្សប៉ុណ្ណោះទេ តែក៏ជាបុព្វហេតុចម្បងនៃបម្លាស់ទីដោយបង្ខំរបស់ពលរដ្ឋដែរ។ តាមប្រមុខ HCR រូបនេះដដែល ការអូសបន្លាយកិច្ចចរចា និងការប្រកាសដកទ័ពអាមេរិករបស់រដ្ឋបាលលោកត្រាំចេញពីអាហ្វហ្កានីស្ថានកំពុងធ្វើឲ្យរដ្ឋាភិបាលអាហ្វហ្កានីស្ថានសព្វថ្ងៃចុះខ្សោយថែមទៀត។ តែទន្ទឹមគ្នានេះ លោកហ្វីលីពប៉ូមិនភ្លេចបញ្ជាក់ទេថា កិច្ចព្រមព្រៀងសន្តិភាពត្រូវតែជាកិច្ចព្រមព្រៀងដែលធានាសន្តិសុខពិតប្រាកដ សុខុមាលភាព និងសិទ្ធិរបស់ស្ត្រី បុរសទាំងអស់នៅអាហ្វហ្កានីស្ថាន។
ក្រៅពីអំពាវនាវឲ្យសហគមន៍អន្តរជាតិកុំបំភ្លេចអាហ្វហ្កានីស្ថាន លោកហ្វីលីពប៉ូក៏បានអំពាវនាវឲ្យបញ្ឈប់ជាបន្ទាន់នូវអំពើហិង្សាដែលកំពុងបន្តកើនឡើង។ ជាក់ស្តែងក្នុងថ្ងៃសៅរិ៍ ទី២១ វិច្ឆិកា ពួកជីហាតអង្គការរដ្ឋអ៊ីស្លាមបានបាញ់គ្រាប់រ៉ូកែតជាច្រើនគ្រាប់ទៅលើតំបន់បៃតងដែលជាទីតាំងរបស់ស្ថានទូត និងក្រុមហ៊ុនបរទេសក្នុងទីក្រុងកាប៊ូលដោយបណ្តាលឲ្យមានមនុស្សស្លាប់ ១០នាក់ និងរបួសចំនួន ៥១នាក់។ តម្រូវការជំនួយសម្រាប់ពលរដ្ឋអាហ្វហ្កានីស្ថានមានទាំងពលរដ្ឋដែលបានភៀសខ្លួនគេចពីសង្រ្គាម និងពលរដ្ឋដែលកំពុងរស់ក្នុងស្រុក។ នៅក្នុងន័យនេះ លោកហ្វីលីពប៉ូបានបញ្ជាក់ជាថ្មីពីការប្តេជ្ញាចិត្តរបស់ HCR ក្នុងការបន្តជួយទំនុកបម្រុងដល់ពលរដ្ឋអាហ្វហ្កានីស្ថានចំនួន ២ ៤០០ ០០០នាក់ដែលបានភៀសខ្លួនគេចពីសង្រ្គាមទៅជ្រកកោននៅក្នុងប្រទេសក្បែរខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ