បរិស្ថាន៖ជប៉ុនប្តេជ្ញាកាត់បន្ថយឧស្ម័នផ្ទះកញ្ចក់ឲ្យដល់កម្រិតសូន្យនៅឆ្នាំ ២០៥០
នៅក្នុងប្រទេសជប៉ុន នាយករដ្ឋមន្រ្តីលោកយ៉ូស្ហ៊ីហ៊ីដេ ស៊ូហ្កាបានថ្លែងនៅក្នុងសភានាថ្ងៃចន្ទ ទី២៦ តុលាស្តីពីនយោបាយទូទៅ។ នៅក្នុងសុន្ទរកថា លោកស៊ូហ្កាបានកំណត់យកឆ្នាំ ២០៥០ ជាឆ្នាំដែលជប៉ុនឈប់ប្រើធ្យូងថ្មដើម្បីផលិតថាមពល។ ការប្រកាសរបស់លោកស៊ូហ្កាយ៉ាងដូចនេះបានទទួលការសាទរពីក្រុមអ្នកបរិស្ថាន និងអ្នកជំនាញអាកាសធាតុ ពិសេសពីអង្គការ Greenpeace។ សូមបញ្ជាក់ថា តាំងពីបានអង្គុយកៅអីនាយករដ្ឋមន្រ្តីក្នុងខែកញ្ញា នេះជាលើកទី១ ដែលលោកយ៉ូស្ហ៊ីហ៊ីដេ ស៊ូហ្កាបានថ្លែងសុន្ទរកថាស្តីពីនយោបាយទូទៅនៅក្នុងសភា។
ចុះផ្សាយនៅថ្ងៃ៖
ស្តាប់ - ០២:២៦
គោលដៅរបស់លោកយ៉ូស្ហ៊ីហ៊ីដេ ស៊ូហ្កា គឺចង់ឲ្យជប៉ុនដែលជាមហាសេដ្ឋកិច្ចទី៣ ក្នុងលោកក្លាយជាប្រទេសអព្យាក្រឹតការបោនចាប់ពីពេលនេះទៅឆ្នាំ ២០៥០។ តែកាលវិភាគ និងវិធានការជាក់ស្តែងដែលត្រូវអនុវត្តនាពេលខាងមុខមិនត្រូវបានលោកស៊ូហ្កាលំអិតទេ។ លោកស៊ូហ្កាបានត្រឹមឲ្យសារៈសំខាន់លើបច្ចេកវិទ្យាដើម្បីឈានទៅសម្រេចនូវកម្មវត្ថុនៃការកាត់បន្ថយការប្រើធ្យូងថ្មដើម្បីផលិតថាមពល។ « គន្លឹះសំខាន់គឺការច្នៃប្រឌិត » នេះជាការថ្លែងរបស់លោកស៊ូហ្កាដោយបានលើកឡើងពីអាគុយស្រូបកម្តៅព្រះអាទិត្យ។
បន្ទាប់មក លោកស៊ូហ្កាក៏បានលើកឡើងពីការបង្កើនការប្រើប្រាស់នូវថាមពលកកើតឡើងវិញ និងថាមពលនុយក្លេអ៊ែរជំនួសឲ្យថាមពលដែលបានមកពីធ្យូងថ្ម។ បើយោងតាមទីភ្នាក់ងារថាមពលអន្តរជាតិ ជប៉ុនជាប្រទេសស្ថិតលំដាប់ទី៦ ដែលបានចាក់ចោលឧស្ម័នផ្ទះកញ្ចក់ច្រើនជាងគេលើលោកក្នុងឆ្នាំ ២០១៨។ ថាមពលអគ្គិសនីប្រមាណ ១ភាគ៣ នៅជប៉ុនបានមកពីមជ្ឈមណ្ឌលប្រើធ្យូងថ្មទាំង ១៤០មជ្ឈមណ្ឌល ហើយធ្យូងថ្មជាវត្ថុធាតុដើមសំខាន់ទី២ ដែលជប៉ុនប្រើដើម្បីផលិតភ្លើងអគ្គិសនីបន្ទាប់ពីឧស្ម័នធម្មជាតិ។
អ្វីជាការកត់សម្គាល់ កម្មវត្ថុរបស់លោកស៊ូហ្កាដែលចង់ឃើញជប៉ុនក្លាយជាប្រទេសអព្យាក្រឹតការបោនចាប់ពីពេលនេះទៅឆ្នាំ ២០៥០ ក៏កម្មវត្ថុរបស់សហភាពអឺរ៉ុប និងប្រទេសអង់គ្លេសដែរ។ ក្រុមអ្នកបរិស្ថាន និងអ្នកជំនាញអាកាសធាតុបានសាទរចំពោះការប្រកាសរបស់នាយករដ្ឋមន្រ្តីជប៉ុន។ « អព្យាក្រឹត្យភាពកាបោនលែងជាសុបិន្តវែងឆ្ងាយទៀតឡើយ តែជាកិច្ចសន្យាមួយចាំបាច់ដែលមានចែងនៅក្នុងកិច្ចព្រមព្រៀងក្រុងប៉ារីសឆ្នាំ ២០១៥ ស្តីពីអាកាសធាតុ » នេះជាការថ្លែងរបស់នាយិកាប្រតិបត្តិនៃអង្គការ Greenpeace លោកស្រី Jennifer Morgan។ តែលោកស្រី Morgan បានបញ្ជាក់ថា ការបន្ថយប្រើធ្យូងថ្មដើម្បីផលិតថាមពលមិនមែនមានន័យបង្កើនការផលិតថាមពលដោយប្រើនុយក្លេអ៊ែរទេ។
« ជាកម្មវត្ថុប្រកបដោយមហិច្ឆតាខ្ពស់ » នេះជាចំណាប់អារម្មណ៍របស់លោកដៃស៊ូកេ តាណាកា អ្នកឯកទេសជប៉ុននៃវិទ្យស្ថានស្រាវជ្រាវ Daiwa។ លោកតាណាកាបានបន្ថែមថា ចាប់ពីពេលនេះទៅ ជប៉ុនត្រូវតែគោរពតាមការសន្យាដោយមិនអាចគេចខ្លួនបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ