ជប៉ុន ដាក់ឱ្យដំណើរការឡើងវិញប្រតិករនុយក្លេអ៊ែរ ដើម្បីបរិស្ថាន
បន្ទាប់ពីអាក់ខានគ្មានថាមពលនុយក្លេអ៊ែរអស់រយៈពេលពីរឆ្នាំ ជប៉ុនបានប្រកាស ដាក់ឱ្យដំណើរការឡើងវិញជាលើកទីមួយ ម៉ាស៊ីនប្រតិករនុយក្លេអ៊ែរ សិនដៃ ១ ចាប់ពីថ្ងៃអង្គារទី ១១សីហានេះទៅ។ ហើយចាប់ពីខែកញ្ញាទៅ ជប៉ុនរបស់លោកស៊ីនហ្សូ អាបេ សង្ឃឹមថានឹងអាចទាញថាមពលអគ្គីសនី ពីនុយក្លេអ៊ែរ មកបម្រើសេចក្តីត្រូវការជាធម្មតាឡើងវិញ ដូចកាលមុនគ្រោះមហន្តរាយនុយក្លេអ៊ែរនៅហ្វូគូស្ហ៊ីម៉ា។
ចុះផ្សាយនៅថ្ងៃ៖
ស្តាប់ - ០២:៣១
ក្នុងស្មារតីរក្សាសន្តិសុខជាអាទិភាពចំបង ដែលម៉ាស៊ីនប្រតិករនុយក្លេអ៊ែរ សិនដៃ ១ ដែលកំណើតជាលើកទីមួយនៅឆ្នាំ១៩៨៤ នឹងចាប់បញ្ឆេះឡើងវិញ វេលាម៉ោង ១០និង៣០ ម៉ោងក្នុងស្រុក ! ហើយនឹងអាចផ្តល់ថាមពលអគ្គីសនីចាប់ពីថ្ងៃទី ១៤ទៅ។ នេះជាប្រសាសន៍របស់អ្នកនាំពាក្យរដ្ឋាភិបាលជប៉ុន។
សិនដៃ២ និងម៉ាស៊ីនប្រតិករបីផ្សេងទៀត (តាខាហាម៉ា ៣-៤ នៅ ភាគខាងលិច អ៊ីកាតា ៣ នៅភាគខាងត្បូងប្រទេស) ក៏បានទទួលការអនុញ្ញាតពីផ្នែកបច្ចេកទេសឱ្យដំណើរការឡើងវិញដែរ។ ជាធម្មតា គ្រប់ម៉ាស៊ីនប្រតិករនុយក្លេអ៊ែរ តែងត្រូវឆ្លងកាត់ការត្រួតពិនិត្យសុវត្ថិភាពយ៉ាងទៀងទាត់ ស្របតាមកាលវិភាគ ដំណើរការ១២-១៣ខែ ពន្លត់បី-បួនខែ ប៉ុន្តែសិនដៃ១ ដែលបានពន្លត់ម៉ាស៊ីន តាមកាលកំណត់ នៅខែឧសភាឆ្នាំ២០១១ មិនអាចដាក់ដំណើរការវិញដូចទម្លាប់ទេ ដោយមានបម្រាបពីអាជ្ញាធរ។
សូមបញ្ជាក់ថា ក្រោយគ្រោះមហន្តរាយនៅហ្វូគូស្ហ៊ីម៉ា ខែមីនា២០១១ បទដ្ឋានសុវត្ថិភាពនុយក្លេអ៊ែរត្រូវបានរិតបន្តឹង និងចាប់ពីឆ្នាំ២០១៣មក ជប៉ុនបានផ្អាកដំណើរការថាមពលនុយក្លេអ៊ែរទាំងស្រុង សូម្បីតែមជ្ឈមណ្ឌលនុយក្លេអ៊ែរជំនាន់ចុងក្រោយគេ អូហ៊ី១ និង២ ក៏បានបិទនៅខែកញ្ញា ដើម្បីឆ្លងកាត់ការត្រួតពិនិត្យសុវត្ថិភាពនិងសន្តិសុខនុយក្លេអ៊ែរ។
ក្នុងរយៈពេលពីរឆ្នាំនេះ ជប៉ុនរស់ដោយគ្មានថាមពលនុយក្លេអ៊ែរសោះ។ ដើម្បីបំពេញកង្វះខាត ផ្នែកអគ្គីសនីបានមកថាមពលនុយក្លេអ៊ែរដែលតំណាងឱ្យ១ភាគបួននៃតម្រូវការ ជប៉ុនបានងាកទៅទៅបើមជ្ឈមណ្ឌលអគ្គិសនីដើរដោយកម្តៅ។ ថ្វីត្បិតតែគ្រប់គ្រាន់ គ្មានការដាច់ភ្លើងមែន ប៉ុន្តែរដ្ឋាភិបាលអភិរក្សនិយមរបស់លោក ស៊ីនហ្សូ អាបេ មានឆន្ទៈជានិច្ចចង់ប្រើមជ្ឈមណ្ឌលនុយក្លេអ៊ែរដើម្បីទាញយកថាមពល ព្រោះតម្លៃប្រេងចាក់ម៉ាស៊ីនអគ្គីសនីដើរដោយកម្តៅខ្ពស់ ប៉ះពាល់ដល់កំណើនសេដ្ឋកិច្ច។ ម្យ៉ាងទៀត ម៉ាស៊ីនអគ្គិសនីដើរដោយកម្តៅ ប៉ះពាល់ខ្លាំងដល់បរិស្ថាន រំខានជប៉ុនមិនឱ្យសម្រេចកម្មវត្ថុកាត់បន្ថយឧស្ម័នផ្ទះកញ្ចក់បាន ទើបសម្រេចវិលទៅប្រើថាមពលនុយក្លេអ៊ែរវិញ។
ប៉ុន្តែមានពលរដ្ឋជប៉ុនជាង៥៧% ប្រឆាំងនឹងដាក់មជ្ឈមណ្ឌលសិនដៃ១ឱ្យដំណើរឡើងវិញ។ ឯក្រុមអ្នកការពារបរិស្ថាន បានសម្តែងការស្តោកសា្តយ ជប៉ុនដែលមានសមត្ថភាពទាញយកថាមពលមិនចេញរីងស្ងួតបានដល់៥៦% នៅឆ្នាំ២០៣០ នៅតែជំពាក់ចិត្តខ្លាំងលើថាមពលនុយក្លេអ៊ែរនិងហ្វូស៊ីល ដើម្បីសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ