ហុងកុង៖ សកម្មជនប្រឆាំងនិរទេសខ្លួននៅបរទេស នៅតែត្រូវប្រឈមនឹងដីកាចាប់ខ្លួន
ក្រោយមានការលើកពេលបោះឆ្នោតនៅហុងកុង, ប៉ូលិសហុងកុង បានទទួលបញ្ជាតាមចាប់ខ្លួនក្រុមអ្នកប្រឆាំង ទាំងក្នុងនិងក្រៅក្រុងហុងកុង។ តាំងពីច្បាប់សន្តិសុខជាតិហុងកុងចូលជាធរមានមក គឺមានបេក្ខជនតំណាងរាស្ត្រ ដែលគាំទ្រប្រជាធិបតេយ្យ ជាច្រើននេះ ត្រូវដកហូតសិទ្ធិមិនឱ្យឈរឈ្មោះបោះឆ្នោត ហើយក៏មាននិស្សិតជាច្រើននាក់ ត្រូវចាប់ខ្លួន ដែលអ្នកខ្លះគ្រាន់តែសរសេរសារបញ្ចេញមតិ បង្ហោះតាមបណ្តាញសង្គម តែរដ្ឋអំណាចចាប់ខ្លួនពួកគេ ដោយសំអាងលើបទល្មើស«ញុះញង់ឱ្យធ្វើអប្បគមន៍»។
ចុះផ្សាយនៅថ្ងៃ៖
ស្តាប់ - ០២:២៧
ថ្នាក់ដឹកនាំមួយរូបនៃចលនាក្រុមសកម្មជនគាំទ្រប្រជាធិបតេយ្យ លោក Samuel Chu ជាពលរដ្ឋហុងកុងមានសញ្ជាតិអាមេរិក ត្រូវមានឈ្មោះក្នុងដីកាតាមចាប់ខ្លួន។ ពីវ៉ាស៊ីនតោន លោកលើកឡើងថា ប្រសិនបើពលរដ្ឋហុងកុងមានសញ្ជាតិអាមេរិកដូចរូបលោកទៅហើយ នៅតែត្រូវតាមចាប់ខ្លួនដោយនគរបាលហុងកុងទៀត នោះអាចនឹងមានពលរដ្ឋនៃប្រទេសផ្សេងទៀត មិនថាពលរដ្ឋហុងកុងមានសញ្ញាតិបរទេសនោះទេ ឱ្យតែនិយាយស្តីការពារប្រយោជន៍ហុងកុង គឺអាចនឹងត្រូវរងគ្រោះដែរ ជាមិនខាន។
លោក Samuel Chu ជាផ្ទាំងស៊ីបមួយ ដែលជាប់ឈ្មោះបញ្ជីខ្មៅ ត្រូវតាមរកចាប់ខ្លួនពីសំណាក់ប៉ូលិសហុងកុង ប៉ុន្តែក៏មិនមែនតែជាមុខសញ្ញាតែមួយនោះទេ គឺនៅមានច្រើននាក់ទៀត។ បើតាមកាសែតរដ្ឋចិន យ៉ាងហោចក្បាលម៉ាស៊ីនធំៗ ៥-៦នាក់ទៀត ដែលសុទ្ធតែមានសញ្ញាតិបរទេស ដែលជាមុខសញ្ញាត្រូវតាមចាប់ខ្លួន។ ក្នុងនោះ មាន Nathan Law មានសញ្ញាតិអង់គ្លេស ដែលបានរត់គេចខ្លួនទៅអង់គ្លេស ដូចគ្នាដែរ Simon Cheng អតីតតំណាងរាស្ត្រហុងកុង បានទទួលសិទ្ធជ្រកកោននយោបាយនៅចក្រភពអង់គ្លេស។
ច្បាប់សន្តិសុខជាតិនៅហុងកុង ដែលគេសង្ស័យថាសរសេរដោយក្រុងប៉េកាំង មានគោលដៅប្រឆាំងនឹងអំពើវិទ្ធង្សនា បះបោរ អប្បគមន៍បំបែករដ្ឋ អំពើភេរវកម្ម និងការឃុបឃិតជាមួយកម្លាំងបរទេស ហើយដែលអាចនឹងដាក់ទណ្ឌកម្មរហូតឱ្យជាប់ពន្ធនាគារអស់មួយជីវិត។ បើតាមក្រុមការពារសិទ្ធិមនុស្សនិងប្រជាធិបតេយ្យហុងកុង គឺច្បាប់ថ្មីដែលអនុម័តប្រមាណជាមួយខែនេះ ជាអាវុធសម្រាប់បំបាត់សំឡេងក្រុមប្រឆាំង។
ប្រទេសអាល្លឺម៉ង់ តាមរយៈរដ្ឋមន្ត្រីការបរទេស បានប្រកាសដាច់ណាត់ហើយថា ព្យួរកិច្ចព្រមព្រៀមធ្វើបត្យាប័ន គឺមិនបញ្ចូនពលរដ្ឋហុងកុង ទៅឱ្យរដ្ឋអំណាចិន ឬប៉ូលិសហុងកុង នោះឡើយ។ ជំហរនេះ ធ្វើឱ្យរដ្ឋធានីប៉េកាំង ខ្ញាល់ខឹងសង្ក្រឺតធ្មេញដាក់ក្រុងប៊ែរឡាំង ហើយឯកអគ្គរដ្ឋទូតចិននៅអាល្លឺម៉ង់ ថាអាល្លឺម៉ង់កំពុងរំលោភច្បាប់អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ