ចិនគាំទ្រការលើកពេលបោះឆ្នោតនៅហុងកុង ចលនាប្រជាធិបតេយ្យប្តេជ្ញាបន្តការតស៊ូរើបម្រាស់ពីចិន
ចិនបានបង្ហាញការគាំទ្រទាំងស្រុង នៅថ្ងៃសុក្រទី ៣១កក្កដា២០២០ ចំពោះសេចក្តីសម្រេចលើកពេលបោះឆ្នោតសភានៅ ហុងកុង ទៅធ្វើនៅឆ្នាំក្រោយ។ សម្រាប់លោកស្រីប្រមុខដឹកនាំរដ្ឋាភិបាលហុងកុង ការី ឡាំ មូលហេតុនៃការលើកពេលគឺបណ្តាលមកពីការកើនឡើងយ៉ាងឆាប់រហ័សនៃករណីកូវីដ១៩។ ក្រុមចលនាប្រជាធិបតេយ្យនៅហុងកុង បានបរិហារសេចក្តីសម្រេចចិត្តនេះ និងបានសន្យាបន្តការតស៊ូដើម្បីបុព្វហេតុសេរីភាពហុងកុង ពីការគៀបសង្កត់របស់ចិន។
ចុះផ្សាយនៅថ្ងៃ៖
ប្រជាធិបតេយ្យនៅហុងកុង រួញទៅៗ។ បន្ទាប់ពីមានការចាប់ខ្លួនសកម្មជនជានិស្សិត ការដកសិទ្ធិពីសកម្មជនប្រជាធិបតេយ្យជាច្រើននាក់មិនឱ្យឈរឈ្មោះបោះឆ្នោតសភា និងការនិរទេសខ្លួនរបស់តំណាងបក្សប្រឆាំងជាច្រើនរូប ហុងកុងត្រូវលើកពេលបោះឆ្នោតទៀត។ នៅថ្ងៃសុក្រទី ៣១កក្កដា២០២០នេះ ប្រមុខរដ្ឋាភិបាលហុងកុង បានប្រកាសលើកពេលបោះឆ្នោតសភា ដែលនឹងប្រព្រឹត្តទៅនៅខែកញ្ញា ទៅធ្វើនៅឆ្នាំក្រោយវិញ ដោយមូលហេតុមានការចម្លងកូវីដ១៩កើនខ្លាំងរហ័សពេក។ ដោយគ្មានបង្អង់ ប៉េកាំងបានចេញសេចក្តីថ្លែងការណ៍ខ្លីផ្តល់ការគាំទ្រចំពោះរដ្ឋាភិបាលហុងកុងភ្លាម ដោយចាត់ទុកការលើកពេលបោះឆ្នោតនេះ ថាសេចក្តីសម្រេចចិត្តដ៏ត្រឹមត្រូវ សមហេតុផល និងស្របច្បាប់។
ប៉ុន្តែគ្មានអ្វីគួរភ្ញាក់ផ្អើលទេ បក្សប្រឆាំងសង្ស័យតាំងពីយូរមកហើយថារដ្ឋាភិបាលនឹងយកបញ្ហាកូវីដ១៩មកធ្វើលេសលើកពេលបោះឆ្នោតសភា ដែលបក្សកាន់អំណាចអាចនឹងត្រូវបរាជ័យខ្លាំង។
តាំងពីមុនសេចក្តីប្រកាសរបស់រដ្ឋាភិបាល សមាជិកសភាបក្សប្រឆាំង២២រូប បានចេញសេចក្តីថ្លែងការណ៍រួមមួយថា ការលើកពេលបោះឆ្នោតជាទម្រង់មួយនៃរដ្ឋប្រហារ វាអាចនឹងបង្កឱ្យមានវិបត្តិធម្មនុញ្ញដែលអាចប៉ះពាល់ដល់មូលដ្ឋានគ្រឹះនៃតំបន់មានរដ្ឋបាលពិសេស។ ការលើកពេល ជាសេចក្តីសម្រេចបែបនយោបាយ ម៉ាក់ងាយស្ថានការណ៍ តែមានហានិភ័យខ្ពស់អាចនឹងធ្វើកំហឹងប្រជាជនផ្ទុះឡើង។ នេះបើតាមពាក្យព្រមានរបស់អ្នកតំណាងរាស្ត្របក្សប្រឆាំង ដែលជំរុញឱ្យលោកស្រី ការី ឡាំ កុំយកកូវីដ១៩មកបម្រើហិបឆ្នោត។ ក្នុងសម្លៀកបំពាក់អាវយឺតខ្មៅ សរសេរថា “គេមិនអាចសម្លាប់យើងអស់” មេដឹកនាំចលនាឆ័ត្រលោក Joshua Wong ដែលអាជ្ញាធរហុងកុងទើបដកសិទ្ធិមិនឱ្យឈរឈ្មោះជាតំណាងរាស្ត្រ បានប្រកាសប្តេជ្ញាថាចលនាតស៊ូរបស់ក្រុមអ្នកប្រជាធិបតេយ្យហុងកុងនៅតែបន្ត ហើយសង្ឃឹមថាពិភពលោកនឹងគាំទ្រសកម្មភាពតស៊ូរបស់ពួកគេ។
ក្រោយទទួលបានជោគជ័យយ៉ាងលើសលុបនៅក្នុងការបោះឆ្នោតឃុំសង្កាត់ កាលពីខែវិច្ឆិកា២០១៩ និងធ្វើបាតុកម្មអស់ពេញមួយឆ្នាំមក គណបក្សប្រឆាំងសង្ឃឹមលើការបោះឆ្នោត ខែកញ្ញា២០២០ ដើម្បីមានតំណាងរបស់ខ្លួននៅក្នុងសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ