ដោយហេតុកូវីដ ចិនបិទការនាំចូលសាច់សត្វ កាន់តែច្រើនឡើងៗ ពីបរទេស
ចុះផ្សាយនៅថ្ងៃ៖
ស្តាប់ - ០៤:៣៧
សាច់ជ្រូកសាច់គោប្រេស៊ីល អាល្លឺម៉ង់ ហូឡង់ ... មិនត្រូវបានអនុញ្ញាតឲ្យនាំចូលទៅប្រទេសចិន ដែលនិយមសាច់បំផុតនោះទេ។ ជាសរុប ចិនបានបិទព្រំប្រទល់ជាមួយប្រទេសចំនួន៩ ដែលមានបុគ្គលិកធ្វើការនៅរោងចក្រកាប់ជ្រូកឆ្លងជំងឺកូវីដ១៩។
បញ្ជីឈ្មោះរោងចក្រកាប់សាច់សត្វបរទេសដែលចិនហាមលែងឲ្យនាំចូលមកក្នុងទឹកដីខ្លួន អូសបន្លាយកាន់តែវែងឡើងៗ។ តាំងពីរកឃើញមានដានមេរោគកូរ៉ូណាថ្មី ជាប់នៅលើជ្រុញហាន់ត្រីសូម៉ុង ដែលនាំចូលពីបរទេសកាលពីខែមុនមក អាជ្ញាធរ ចិនបានវិធានការ រឹតបន្តឹងកាន់តែខ្លាំងវិស័យនាំចូលសាច់ត្រី ព្រមទាំងការនាំចូលសាច់សត្វផ្សេងទៀត មានជាអាទិ៍សាច់ជ្រូក។
ចិនបានចោះឆ្កឹះយកសាច់នាំចូលមកពីបរទេសទាំងឡាយ តាមកុងតឺណឺផ្សេងៗយកទៅសិក្សាក្រែងមានមេរោគកូរ៉ូណា។ ការវិភាគសាច់ចំនួនជាង៥ម៉ឺនករណី បានបង្ហាញថាគ្មានសាច់នាំចូលណាមួយមានឆ្លងឬដានកូវីដ១៩សោះ។ ប៉ុន្តែទោះបីផ្តល់លទ្ធផលអវិជ្ជមានទាំងអស់ ទោះបីអង្គការអន្តរជាតិ ដូចជាអង្គការស្បៀងអាហារពិភពលោក អង្គការសុខភាពពិភពលោក បានអះអាងហើយអះអាងទៀតថា គ្មានសញ្ញាណាមួយគួរឱ្យសង្ស័យអំពីករណីចម្លងកូវីដ១៩តាមរយៈចំណីអាហារនិងសាច់មកមនុស្សយ៉ាងណាក៏ដោយ ក៏ចិននៅតែស្នើសុំនិងដាក់លក្ខខណ្ឌដល់ក្រុមហ៊ុនអ្នកផ្គត់ផ្គង់ចំណីអាហារនាំចូលមកចិន ត្រូវធ្វើកិច្ចសន្យាចុះហត្ថលេខាលើឯកសារមួយបញ្ជាក់ថា ទំនិញរបស់ពួកគេគ្មានឆ្លងកូរ៉ូណាវីរុសថ្មីទេ។
ដោយគ្មានបង្អង់ រោងចក្រកាប់សត្វប្រេស៊ីល បានសម្របខ្លួនគោរពតាមសំណើរបស់ចិនភ្លាម ព្រោះចិនជាអតិថិជនលំដាប់ទីមួយរបស់ខ្លួន។ ប៉ុន្តែទោះជាយ៉ាងដូច្នេះក្តី ក៏ក្រុមហ៊ុនយក្សផ្នែកកាប់ជ្រូក កាប់គោរបស់ប្រេស៊ីលចំនួន ៥ ដូចជា Marfrig, Agra ឬ JBS ជាដើម។ល។ បានជាប់បម្រាមចិន មិនអាចនាំសាច់ជ្រូក សាច់គោ សាច់មាន់/ទា ទៅលក់នៅលើទីផ្សារចិនបានទេ។
ចិនសម្រេចផ្អាកការនាំចូលសាច់ពីប្រេស៊ីល ក៏ព្រោះតែកម្មករប្រេស៊ីលនៅរោងចក្រកាប់សាច់ ជាច្រើននាក់ណាស់បានឆ្លងនិងឈឺកូវីដ១៩។ ជាការពិតដែលថាប្រេស៊ីលជាប្រទេសមួយក្នុងចំណោមប្រទេសដែលរងគ្រោះដោយកូវីដ១៩ខ្លាំងជាងគេមួយនោះ។ គិតត្រឹមណេះ ចិនពិតជាមានភាពប្រុងប្រយ័ត្នខ្ពស់មែន។ ប៉ុន្តែ សហរដ្ឋអាមេរិកក៏រងការរាតត្បាតខ្លាំងនិងធ្ងន់ធ្ងរ មិនចាញ់ប្រេស៊ីលឡើយ។ កម្មករធ្វើការនៅរោងចក្រកាប់សាច់ ជាច្រើនបានឆ្លងកូវីដ១៩ តែគួរឱ្យចម្លែក ប្លែកខុសពីករណីប្រេស៊ីល ចិនបែរជាចំហផ្លូវយ៉ាងធំឱ្យអាមេរិកដដែល។ ប៉េកាំងបានសម្រេចបិទមិនទទួលការនាំចូលពីក្រុមហ៊ុនអាមេរិកតែមួយគត់ គឺក្រុមហ៊ុនចិញ្ចឹមសត្វមាន់ទា Tyson Foods។
បើពិនិត្យពិច័យបញ្ជីឈ្មោះហាមឃាត់ទៅ ចិនប្រុងប្រយ័ត្ន និងចាត់វិធានការតឹងតែងខ្លាំងរឿងនាំចូលសាច់ ដោយរើសមុខ និងដៅជាពិសេសតែលើក្រុមប្រទេសមួយចំនួន គឺប្រេស៊ីល និងអឺរ៉ុបជាងគេ។ រោងចក្រកាប់សាច់ប្រេស៊ីល ចំនួន ៥ ក្រុមហ៊ុនកាប់ជ្រូកអាល្លឺម៉ង់បី ហូឡង់បួន អង់គ្លេសពីរ ... មិនអាចនាំសាច់ចូលទៅចិនបានទេ។ សម្រាប់ពេលនេះ រោងចក្រកាប់សាច់បារាំង ដែលមិនសូវរងការប៉ះពាល់ដោយកូវីដ១៩ គ្មានឈ្មោះក្នុងបញ្ជីខ្មៅរបស់ចិនទេ ប៉ុន្តែមិនដឹងថាទ្រទ្រង់បានយូរប៉ុណ្ណាឡើយ។
មានន័យថា មូលហេតុកូវីដ១៩ អាចគ្រាន់តែជាលេសមួយរបស់ប៉េកាំងតែប៉ុណ្ណោះ។ វិបត្តិកូវីដ ជាឱកាសមួយសម្រាប់ចិន បន្ថយការនាំចូលសាច់ជ្រូកប្រេស៊ីល ហើយងាកទៅបង្កើនការនាំចូលសាច់ពីសហរដ្ឋអាមេរិក ដើម្បីអាចបំពេញកិច្ចសន្យា ដែលប៉េកាំងបានចុះកិច្ចព្រមព្រៀងពាណិជ្ជកម្មដំណាក់កាលទីមួយ ជាមួយអាមេរិក កាលពីខែមករាដើមឆ្នាំ។ ក្នុងក្របខ័ណ្ឌនៃការសម្របសម្រួលគ្នាបញ្ចប់សង្គ្រាមពាណិជ្ជកម្ម ចិនបានសន្យាបង្កើនការនាំចូលទំនិញកសិកម្មអាមេរិកឱ្យបានច្រើនជាងមុន។
ចុះជាមួយអឺរ៉ុបតើចិនសំឡឹងឃើញប្រយោជន៍អ្វីបានជាបិទផ្លូវនាំចូលសាច់ ? ជាមួយអឺរ៉ុប ជាឱកាសដែលចិនចង់បំបែកបំបាក់សហភាពអឺរ៉ុប ដើម្បីងាយជ្រៀតចូលក្នុងទីផ្សារ ជាពិសេសគឺដើម្បីដណ្តើមគ្រប់គ្រងទីផ្សារទូរគមនាគមន៍៥Gតែម្តង។ ជាចុងក្រោយ ចិនចង់ឆក់ឱកាសនេះ ដើម្បីតម្រឹមតម្លៃសាច់នៅលើទីផ្សារ។ បន្ទាប់ពីជ្រួលច្របល់ខ្លាំងដោយវិបត្តិកូវីដ១៩ សេចក្តីត្រូវការផ្នែកសាច់ជ្រូក ដែលប្រជាពលរដ្ឋចិននិយមបរិភោគបំផុត ចាប់ផ្តើមស្ងប់ស្ងាត់បន្តិច និងចុះថយ តែរដ្ឋាភិបាលបានប្រមូលទិញសាច់សត្វ បំពេញស្តុកចំណីអាហារក្នុងបរិមាណដ៏ច្រើនជាអតិបរិមាបំផុត នារយៈពេល៥ខែដើមឆ្នាំកន្លងមកនេះ។ ហើយឥលូវ ចិនមានស្តុកស្បៀងអាហារគ្រប់គ្រាន់ហើយ ស្បៀងអាហារអាចត្រូវបានមកប្រើជាអាវុធសម្រាប់ចរចាការទូតនិងពាណិជ្ជកម្មវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ