ក្រុមហ៊ុនឱសថដ៏ធំមួយរបស់ចិន ត្រៀមខ្លួនផលិតវ៉ាក់សាំងកូវីដ១៩ ទ្រង់ទ្រាយធំ
នៅក្នុងប្រទេសចិន ក្រុមហ៊ុនថ្នាំដ៏ធំមួយរបស់ចិន បានចាប់ផ្តើមដំណើរការផលិតវ៉ាក់សាំងកូវីដ១៩ទ្រង់ទ្រាយធំ បើទោះបីជាវ៉ាក់សាំងនេះ នៅមិនទាន់ទទួលបានលទ្ធផលពីការធ្វើតេស្តលើមនុស្សនៅឡើយក៏ដោយ។ ស្របពេលប្រាប់ថា វ៉ាក់សាំងដែលត្រៀមផលិតនេះឈ្មោះ ”កូរ៉ូណាវ៉ាក់” “Coronavac” អ្នកស្រាវជ្រាវចិនម្នាក់ បានសម្តែងពីក្តីសង្ឃឹមខ្ពស់ចំពោះគុណភាពរបស់កូរ៉ូណាវ៉ាក់ ក្នុងការប្រឆាំងទល់នឹងមេរោគកូរ៉ូណាថ្មី ដែលកំពុងរាតត្បាតខ្លាំងក្នុងសកលលោក។
ចុះផ្សាយនៅថ្ងៃ៖
ស្តាប់ - ០១:៥៤
Sinovac Biotech ដែលជាក្រុមហ៊ុនផលិតឱសថដ៏ធំរបស់ចិន បានអះអាងប្រាប់ថា ការស្រាវជ្រាវលើវ៉ាក់សាំងប្រឆាំងនឹងកូវីដ១៩ របស់ខ្លួនដំណើររលូនល្អ និងទទួលបានជោគជ័យក្នុងការធ្វើតេស្តលើសត្វស្វា។
ក្រុមហ៊ុនថ្នាំចិននេះ បានឲ្យដឹងដែរថា ខ្លួនបានត្រៀមរួចជាស្រេចក្នុងការផលិតវ៉ាក់សាំងឱ្យបានចំនួន ១០០ លានក្នុងមួយឆ្នាំ ដើម្បីប្រយុទ្ធប្រឆាំងនឹងវីរុសកូវីដ១៩។ កូវីដ១៩ ដែលបានផ្ទុះឡើងដំបូងនៅក្នុងទីក្រុងវូហាន ប្រទេសចិន កាលពីចុងឆ្នាំ ២០១៩ មុនពេលរាលដាលពាសពេញពិភពលោក និងបានសម្លាប់ជីវិតមនុស្សសរុបជាង ២២ ម៉ឺននាក់។
គួរកត់សម្គាល់ថា ទោះបីជាទើបតែបានផ្តើមការសាកល្បងលើមនុស្ស និងនៅមិនទាន់ទទួលបានលទ្ធផលយ៉ាងណាក្តី នាខណៈនេះក្រុមហ៊ុន Sinovac Biotech របស់ចិន បានផលិតវ៉ាក់សាំងចំនួនរាប់ពាន់រួចទៅហើយ។ វ៉ាក់សាំងនេះ ត្រូវបានផលិត និងវេចខ្ចប់ដោយមានស្រោមពណ៌សលាយពណ៌ទឹកក្រូច និងមានបិទឈ្មោះថា “កូរ៉ូណាវ៉ាក់”។
គួរជ្រាបថា នេះមិនមែនជារឿងចម្លែកទេដែលក្រុមហ៊ុនចិនចាប់ផ្តើមដំណើរការផលិតវ៉ាក់សាំងទាំងមិនទាន់ទទួលបានលទ្ធផលធ្វើតេស្តលើមនុស្ស និងទាំងមិនទាន់ទទួលបានការអនុញ្ញាតជាផ្លូវការ។
បើតាមការចុះផ្សាយរបស់ទីភ្នាក់ងារសារព័ត៌មានបារាំង AFP ជាទូទៅ គេ ត្រូវការពេលវេលាយូរមុននឹងទទួលបានការអនុញ្ញាតឲ្យផលិតថ្នាំព្យាបាលរោគអ្វីមួយ។ មួយវិញទៀត មុននឹងមានសិទ្ធិផលិតថ្នាំអ្វីមួយ ក្រុមហ៊ុនឱសថ ត្រូវតែអាចបង្ហាញថា ខ្លួនមានសមត្ថភាពគ្រប់គ្រាន់អាចផលិតវាបានក្នុងទ្រង់ទ្រាយធំ ហើយចាំបាច់ត្រូវឆ្លងការត្រួតពិនិត្យដោយអាជ្ញាធរជំនាញ។
គួររំឭកជូនថា Sinovac Biotech គឺជាក្រុមហ៊ុនផលិតថ្នាំដ៏ធំបំផុតមួយរបស់ចិន និង មានបុគ្គលិកធ្វើការប្រមាណជា ១ ពាន់នាក់។ ក្រុមហ៊ុននេះ ធ្លាប់មានបទពិសោធន៍ ក្នុងការផលិតវ៉ាក់សាំងប្រឆាំងជំងឺផ្តាសាយបក្សី H1N1 ក្នុងឆ្នាំ ២០០៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ