កូវីដ១៩៖ វៀតណាម ផ្តើមបើកសកម្មភាពសេដ្ឋកិច្ចឡើងវិញ
ជំងឺកូវីដ១៩ នៅវៀតណាម បានធូរស្រាល។ រដ្ឋបាលក្រុងហាណូយ បានផ្តើមលើកបម្រាមហាមឃាត់ប្រជាជនឱ្យសម្ងំនៅផ្ទះ ចេញជាបណ្តើរៗ ហើយ រដ្ឋាភិបាលវៀតណាម ថែមទាំងចាប់ផ្តើមបើកសកម្មភាពសេដ្ឋកិច្ចឡើងវិញ ជាបណ្តើរៗ នៅថ្ងៃព្រហស្បតិ៍ទី២៣មេសានេះ។ វៀតណាមហាក់បានស្តែងពីអំណួតនៃការចាត់ចែងទប់ស្កាត់ជំងឺកូវីដ១៩ បានដោយជោគជ័យប្រសើរ ព្រោះតាមព័ត៌មានផ្លូវការរបស់អាជ្ញាធរវៀតណាម គឺគ្មានអ្នកស្លាប់ដោយសារតែកូវីដ១៩ សូម្បីម្នាក់ ហើយអ្នកឆ្លងមេរោគនេះ មានមិនដល់៣០០ករណីផងទេ។
ចុះផ្សាយនៅថ្ងៃ៖
ស្តាប់ - ០២:២៣
តាមព័ត៌មានផ្លូវការរបស់រដ្ឋអំណាច, វៀតណាមគ្មានករណីឆ្លងថ្មីទេ រយៈមួយសប្តាហ៍មកហើយ។ អាជ្ញាធរវៀតណាម ហាក់សម្តែងពីមោទនភាពជាតិ ដោយសារតែនយោបាយគត់មុត ប្រឆាំងទប់ស្កាត់មេរោគកូវីដ១៩ យ៉ាងតែងតែងតាំងពីដំបូង ហើយប្រើកណ្តាប់ដៃដែក បិទព្រំដែន ផ្លូវគោក និងផ្លូវអាកាស ជាមួយមហាអំណាចចិន ហើយវៀតណាម បានចេញវិធានការដាក់បម្រាមឱ្យប្រជាជនសម្ងំដេកផ្ទះ។ យន្តការតឹងតែងនេះបានហុចផលផ្លែផ្កា ទើបហេតុនេះ ចាប់ពីថ្ងៃព្រហស្បត្តិ៍ ទី២៣មេសា របបកុម្មុនីស្តសង្គមនិយមវៀណាម បានអនុញ្ញាតឱ្យប្រជាជនផ្តើមសកម្មភាពសេដ្ឋកិច្ចឡើងវិញហើយ ជាពិសេស គឺនៅរដ្ឋធានី ហាណូយ និងក្រុងហូជីមីញ។
គួរគូសបញ្ជាក់ថា វៀតណាម បានបិទជើងហោះហើរពីស្រុកចិន តាំងពីដើមខែកុម្ភៈ ហើយនិងបិទព្រំដែនគោក ជាប់ជាមួយចិន ចម្ងាយ១ ៣០០គីឡូម៉ែត្រ។ លើសពីនេះ គ្រឹះស្ថានសិក្សា សាលារៀន ក៏ត្រូវបង្ខំឱ្យបិទទ្វារតាំងតែពីអំឡុងពេលបុណ្យចូលឆ្នាំថ្មីប្រពៃណីវៀតណាម ចុងខែមករាមកម្ល៉េះ។ វៀតណាម គ្មានលទ្ធភាពធ្វើតេស្តរកមេរោគកូវីដ១៩ ចំពោះពលរដ្ឋជាទូទៅ ដូចករណីកូរ៉េខាងត្បូងនោះទេ ក៏ប៉ុន្តែវៀតណាមមានលទ្ធភាពនិងអំណាចខ្លាំងក្នុងការចេញវិធានការម៉ឺងម៉ាត់ ចាប់បង្ខាំងអ្នកឆ្លង និងពលរដ្ឋទូទៅ ឱ្យសម្ងំដេកផ្ទះ។
អ្នកជំនាញរបស់អង្គការសុខភាពពិភពលោក ប្រចាំតំបន់អាស៊ីប៉ាស៊ីហ្វិក Takeshi Kasai បានកត់សម្គាល់ឃើញពីយន្តការតឹងដ៏វិជ្ជមានរបស់វៀតណាម ក្នុងការទប់ទល់នឹងមេរោគ ដូចជាការដាក់បង្ខាំងប្រជាជនទាន់ពេលវេលា ទើបមិនសូវមានករណីឆ្លងច្រើននិងរហ័ស។ ទោះយ៉ាងនេះក្តី អ្នកជំនាញរបស់អង្គការសុខភាពពិភពលោក នៅតែសម្តែងក្តីព្រួយបារម្ភ ថាការបើកដំណើរការប្រទេសឡើងវិញ របស់វៀតណាម នៅពេលនេះ គឺហាក់ដូចជា«ឆាប់ពេកហើយ»។ ភាពលឿនប្រញាប់ឆាប់ពេកក្នុងបើកដំណើរសេដ្ឋកិច្ចនេះ គឺអង្គការសុខភាពពិភពលោក តែងតែដាស់តឿនជារឿយៗ ម្តងហើយម្តងទៀត មិនចំពោះតែប្រទេសណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ