ប្រឆាំងកូវីដ-១៩៖ ក្រៅពីចិន ជប៉ុន អាមេរិកនិងអាល្លឺម៉ង់ វៀតណាមក៏ប្រកាសផ្តល់ជំនួយដល់កម្ពុជាដែរ
រដ្ឋាភិបាលវៀតណាមបានសម្រេចផ្តល់ជំនួយថវិកាចំនួន២០ម៉ឺនដុល្លារអាមេរិកដល់រដ្ឋាភិបាលកម្ពុជា និងឡាវ ដើម្បីប្រយុទ្ធប្រឆាំងនឹងការរីករាលដាលនៃជំងឺកូវីដ-១៩។ មិនត្រឹមតែជំនួយថវិកាទេ វៀតណាមក៏ត្រៀមបញ្ជូនអ្នកជំនាញវជ្ជសាស្រ្តរបស់ខ្លួនមកជួយដល់កម្ពុជា និងឡាវថែមទៀត។ សម្រាប់កម្ពុជា ជំនួយនេះធ្វើឱ្យវៀតណាមក្លាយជាប្រទេសទី៥ហើយដែលបានជួយដល់កម្ពុជា ដើម្បីប្រឆាំងនឹងកូវីដ-១៩ បន្ទាប់ពីចិន អាមេរិក អាល្លឺម៉ង់ និង ប្រទេសជប៉ុន។
ចុះផ្សាយនៅថ្ងៃ៖
ស្តាប់ - ០២:៤៥
ការប្រកាសផ្តល់ជំនួយរបស់រដ្ឋាភិបាលវៀតណាមនេះ ត្រូវបានចុះផ្សាយឱ្យដឹងដោយសារព័ត៌មានវៀតណាមឈ្មោះកាត់ថា VGP News កាលពីថ្ងៃទី២៦ ខែមីនា។ VGP News បានអះអាងថា នាយករដ្ឋមន្រ្តីវៀតណាមបានទាក់ទងតាមទូរស័ព្ទមកកាន់នាយករដ្ឋមន្រ្តីកម្ពុជា និងឡាវ ដើម្បីប្រាប់ពីការផ្តល់ជំនួយថវិកានេះកាលពីថ្ងៃព្រហស្បតិ៍។ នៅក្នុងជំនួបតាមទូរស័ព្ទជាមួយនាយករដ្ឋមន្រ្តីកម្ពុជា លោកនាយករដ្ឋមន្រ្តីវៀតណាមបានស្នើឱ្យអាជ្ញាធរទាំងសងខាងសហការគ្នាយ៉ាងសកម្មក្នុងការទប់ស្កាត់ការរីករាលដាលនៃជំងឺកូវីដ-១៩នេះ ដោយធានាឱ្យមានការផ្លាស់ប្តូរព័ត៌មានដោយរលូនទៅវិញទៅមក ដោះស្រាយនូវរាល់ឧបសគ្គនានាដោយផ្អែកលើស្មារតីនៃកិច្ចសហប្រតិបត្តិការ និងការយោគយល់គ្នា។
ជាមួយគ្នានេះ លោកនាយករដ្ឋមន្រ្តីវៀតណាម ក៏បានបញ្ជាក់ដែរថា វៀតណាមបានត្រៀមខ្លួនរួចជាស្រេចដើម្បីធ្វើការជាមួយភាគីកម្ពុជាក្នុងការធ្វើមាតុភូមិនិវត្តប្រជាពលរដ្ឋកម្ពុជាដែលបានដាក់ឱ្យនៅដាច់ដោយឡែកពីគេនៅវៀតណាម ហើយមានបំណងត្រឡប់មកប្រទេសកម្ពុជាវិញ។ ជាការឆ្លើយតប លោកនាយករដ្ឋមន្រ្តីកម្ពុជាហ៊ុន សែន បានវាយតម្លៃខ្ពស់ចំពោះវិធានការរបស់រដ្ឋាភិបាលវៀតណាមនេះ និង ការឆ្លើយតបទៅនឹងអ្វីដែលជាការស្នើសុំរបស់រដ្ឋាភិបាលកម្ពុជា។ លោកនាយករដ្ឋមន្រ្តីកម្ពុជាក៏បានសង្កត់ធ្ងន់ថា រដ្ឋាភិបាល និង ប្រជាជនកម្ពុជាតែងតែចាត់ទុកពលរដ្ឋវៀតណាមដែលរស់នៅកម្ពុជាជាអ្នកស្រុកជាមួយគ្នាដែរ។ នេះបើតាមការចុះផ្សាយរបស់សារព័ត៌មានវៀតណាម VGP News។
ជាការកត់សម្គាល់ថា វៀតណាម គឺជាប្រទេសទី៥ហើយដែលប្រកាសផ្តល់ជំនួយដល់កម្ពុជា ដើម្បីប្រយុទ្ធប្រឆាំងនឹងជំងឺកូវីដ-១៩។ មុនវៀតណាម មានចិន អាមេរិក អាល្លឺម៉ង់ និង ជប៉ុន។ ជប៉ុនបានផ្តល់ឱ្យរដ្ឋាភិបាលកម្ពុជានូវសម្ភារបរិក្ខារពេទ្យមាន អាវបំពង់ អាកុលសម្អាតដៃ វ៉ែនតាការពារសុវត្ថិភាព និងស្រោមដៃ។ ចិនបានបញ្ជូនក្រុមពេទ្យេជំនាញ៧នាក់បូករួមនឹងពេទ្យយោធា៤នាក់ និង សម្ភារវេជ្ជសាស្ត្រមួយចំនួនទៀតដល់កម្ពុជា។ ចំណែក អាមេរិកវិញ បានផ្តល់ជំនួយជាទឹកប្រាក់ចំនួន២លានដុល្លារ ខណៈអាល្លឺម៉ងបានផ្តល់ទឹកប្រាល់ដល់កម្ពុជាប្រមាណជា១លាន ៦សែនដុល្លារអាមេរិក។
ដោយឡែក រដ្ឋាភិបាលកម្ពុជាខ្លួនឯងវិញ បានបញ្ចេញកញ្ចប់ថវិកាចំនួន៣០លានដុល្លារអាមេរិកដល់ក្រសួងសុខាភិបាល ដើម្បីប្រើប្រាស់ក្នុងការទប់ស្កាត់ជំងឺកូវីដ-១៩។ រដ្ឋាភិបាលកម្ពុជាក៏ទទួលបានថវិកាជំនួយសប្បុរសធម៌ក្នុងស្រុកបានជិត៩លានដុល្លារអាមេរិកថែមទៀត។ បន្ថែមលើនេះ រដ្ឋាភិបាលកម្ពុជា ក៏បានត្រៀមបម្រុងទឹកប្រាក់ពីចន្លោះ៨រយទៅ២ពាន់លានដុល្លារផងដែរ គឺដើម្បីសង្រ្គោះសេដ្ឋកិច្ចកម្ពុជាដែលរងការវាយប្រហារដោយជំងឺកូវីដ-១៩នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ