កូរ៉េខាងជើង៖តើលោកគីម ជុងអ៊ុនកំពុងមានបញ្ហាសុខភាពធ្ងន់ធ្ងរឬ?
ចុះផ្សាយនៅថ្ងៃ៖
ស្តាប់ - ០៣:៥២
ខណៈដែលពិភពលោកកំពុងប្រឈមនឹងវិបត្តិកូវីដ-១៩ មានព័ត៌មានលេចឡើងស្តីពីស្ថានភាពសុខភាពរបស់មេដឹកនាំកូរ៉េខាជើងលោកគីម ជុងអ៊ុនដែលថា លោកទើបបានទទួលការព្យាបាលបេះដូង និងកំពុងឈប់សម្រាកយកកម្លាំងនៅក្នុងស្រុកមួយនៃខេត្តព្យុងហ្កាន។ តែនៅថ្ងៃអង្គារ ទី២១ មេសា កូរ៉េខាងត្បូងហាក់មិនសូវឲ្យតម្លៃ និងមានការប្រយ័ត្នប្រយែងខ្លាំងចំពោះព័ត៌មានមួយនេះ។ ដោយឡែក ក្រុមអ្នកសង្កេតការណ៍មួយចំនួនបានចោទសួរពីអវត្តមានរបស់លោកគីម ជុងអ៊ុនកាលពីសប្តាហ៍កន្លងទៅនាឱកាសពិធីប្រារព្ធខួបកំណើតគម្រប់ ១០៨ឆ្នាំនៃសពលោកគីម អ៊ីលស៊ុង។ គួររម្លឹកថា គេបានឃើញមុខលោកគីម ជុងអ៊ុនជាសាធារណៈចុងក្រោយក្នុងថ្ងៃទី១១ មេសានាឱកាសដែលលោកដឹកនាំកិច្ចប្រជុំការិយាល័យនយោបាយមជ្ឈិមបក្សដើម្បីចាត់វិធានការទប់ស្កាត់កូវីដ-១៩។ តើលោកគីម ជុងអ៊ីលបានបាត់មុខទៅណា និងថា តើលោកពិតជាមានបញ្ហាសុខភាពធ្ងន់ធ្ងរមែន ឬយ៉ាងណា?
នៅប្រទេសណាមិនដឹងទេ តែបើនៅកូរ៉េខាងជើង ១៥ មេសា គឺជាកាលវិភាគនយោបាយដ៏សំខាន់ខ្លាំងណាស់។ សំខាន់ព្រោះជាថ្ងៃកំណើតរបស់សពលោកគីម អ៊ីលស៊ុងដែលជាជីតារបស់លោកគីម ជុងអ៊ុន និងជាស្ថាបនិកនៃរបបសាធារណរដ្ឋប្រជាមានិតប្រជាធិបតេយ្យកូរ៉េបច្ចុប្បន្ន។ នៅរៀងរាល់ឆ្នាំក្នុងថ្ងៃទី១៥ មេសា របបក្រុងព្យុងយ៉ាងតែងរៀបចំប្រារព្ធខួបកំណើតលោកគីម អ៊ីលស៊ុងយ៉ាងអធិកអធម ហើយមេដឹកនាំកូរ៉េខាងជើងតាំងពីជំនាន់លោកគីម ជុងអ៊ីលជាកូន និងលោកគីម ជុងអ៊ុនជាចៅតែងមានវត្តមានមិនអាចខ្វះបាន។ តែចំឡែកអីក្នុងឆ្នាំ ២០២០ ដែលជាខួបកំណើត ១០៨ឆ្នាំរបស់សពលោកគីម អ៊ីលស៊ុង គេមិនបានឃើញមុខលោកគីម ជុងអ៊ុនទេ។
បើគេជឿលើព័ត៌មានចុះផ្សាយដោយកាសែត Daily NK ដែលជាកាសែត online របស់ប្រជាជនកូរ៉េខាងជើងផ្តាច់ខ្លួន លោកគីម ជុងអ៊ុនមានបញ្ហាបេះដូងដែលទើបទទួលការព្យាបាលក្នុងខែមេសា និងកំពុងសម្រាកយកកម្លាំងនៅក្នុងស្រុកមួយស្ថិតក្នុងខេត្តព្យុងហ្កាន។ Daily NK ដែលបានស្រង់ប្រភពព័ត៌មានមួយនៅកូរ៉េខាងជើងមិនបញ្ចេញឈ្មោះឲ្យដឹងបន្ថែមទៀតថា មូលហេតុដែលជំរុញឪ្យលោកគីម ជុងអ៊ុនចូលពេទ្យព្យាបាលបេះដូងមកពីលោកជក់បារីច្រើនជ្រុល ធាត់ខ្លាំងពេក និងចេះតែអស់កម្លាំង។
ដោយឡែក ព័ត៌មានស្តីពីស្ថានភាពសុខភាពរបស់លោកគីម ជុងអ៊ុនក៏ត្រូវបានផ្សព្វផ្សាយដោយទូរទស្សន៍ CNN ដែរ។ CNN បានស្រង់សម្តីអ្នកទទួលខុសត្រូវអាមេរិកម្នាក់ដែលថា ក្រុងវ៉ាស៊ីនតោនកំពុងសិក្សាលើព័ត៌មានដែលនិយាយពីលោកគីម ជុងអ៊ុនកំពុងស្ថិតក្នុងគ្រោះថ្នាក់ធ្ងន់ធ្ងរនៅក្រោយការវះកាត់។
តែគេមិនដឹងថា តើ CNN បានព័ត៌មាននេះពីណាមកទេ ជាព័ត៌មានដែលគ្រាន់តែស្រង់ចេញពីកាសែត Daily NK ឬមួយក៏បានមកពីប្រភពផ្សេង។ យ៉ាងណាក៏ដោយនៅពេលនេះ ព័ត៌មានស្តីពីស្ថានភាពសុខភាពរបស់លោកគីម ជុងអ៊ុននៅមិនទាន់បានបញ្ជាក់ដោយប្រភពណាមួយទេ ពីកូរ៉េខាងជើងក៏គ្មាន ហើយពីកូរ៉េខាងត្បូងក៏អត់ដែរ។ « យើងគ្មានអ្វីដែលត្រូវបញ្ជាក់ ហើយគ្មានសកម្មភាពណាមួយដែលយើងបានសង្កេតឃើញនៅកូរ៉េខាងជើងទេ » នេះជាការថ្លែងរបស់អ្នកនាំពាក្យវិមានប្រធានាធិបតីកូរ៉េខាងត្បូង។ ចំណែកលោកមូន ជុងអ៊ីន ទីប្រឹក្សាសន្តិសុខប្រធានាធិបតីកូរ៉េខាងត្បូងបាននិយាយប្រាប់ AFP ពីការគ្មានព័ត៌មានពិសេសអ្វីស្តីពីសុខភាពលោកគីម ជុងអ៊ុន។ រីឯក្រសួងបង្រួបបង្រួមនៅកូរ៉េខាងត្បូងដែលទទួលបន្ទុកសំណុំរឿងអន្តរកូរ៉េបានបដិសេធមិនធ្វើអត្ថាធិប្បាយអ្វីទាំងអស់។
តាមពិតទៅ នេះមិនមែនជាលើកទី១ ទេដែលការបាត់មុខលោកគីម ជុងអ៊ុនបានបង្កឲ្យមានពាក្យចចាមអារ៉ាមយ៉ាងផុសផុល។ ក្នុងឆ្នាំ ២០១៤ លោកបានអវត្តមានជាសាធារណៈអស់រយៈពេល ៦សប្តាហ៍ មុននឹងលេចមុខជាថ្មីជាមួយនឹងដៃកាន់ឈើច្រត់។ កាលណោះ កាសែតកូរ៉េខាងត្បូងឈ្មោះ Yonhap បានបញ្ជាក់ថា លោកគីម ជុងអ៊ុនបានទទួលការវះកាត់យកដុំសាច់ចេញពីក ជើង។ តើលោកគីម ជុងអ៊ុនបានបាត់មុខទៅណាទៀតហើយ និងថា តើលោកពិតជាមានបញ្ហាសុខភាពធ្ងន់ធ្ងរមែន ឬ?។ អត់មានចម្លើយ ហើយក៏គ្មានអ្នកណាម្នាក់ហ៊ានឆ្លើយដែរ។
នៅកូរ៉េខាងជើង គេពិបាកនឹងរកបានព័ត៌មានពិតទាក់ទងនឹងជីវិតឯកជនរបស់លោកគីម ជុងអ៊ុនណាស់ ព្រោះជាព័ត៌មានសម្ងាត់មួយក្នុងចំណោមព័ត៌មានសម្ងាត់ផ្សេងទៀតដែលរបបបានលាក់ជិតល្អណាស់។ យ៉ាងណាក៏ដោយ គ្រប់គ្នាមានការប្រយ័ត្នប្រយែងខ្លាំងណាស់ចំពោះព័ត៌មានស្តីពីសុខភាព ក៏ដូចជាការបាត់មុខលោកនៅពេលនេះ។ វាហាក់ដូចជារហ័សពេកដែលគេហ៊ានសន្និដ្ឋានយ៉ាងណានោះ ព្រោះលោកគីម ជុងអ៊ុនដែលធ្លាប់បានអវត្តមានជាសាធារណៈ តែនៅទីបំផុតទៅ តែងលេចមុខជាថ្មីឡើងវិញជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ