មិនខុសពីបណ្ដាប្រទេសអឺរ៉ុបធំៗ រួមមានបារាំង អាល្លឺម៉ង់ និងអ៊ីតាលី, ស៊្វីស ជាប្រទេសមួយ ដែលមានប្រព័ន្ធផ្លូវដែក រត់ពាសពេញផ្ទៃប្រទេស និងមានដំណើរការប្រកបដោយប្រសិទ្ធិភាពខ្ពស់បំផុត។ ការអភិវឌ្ឍផ្លូវដែក បានបង្កជាភាពងាយស្រួល និងភាពទាក់ទាញយ៉ាងចម្បង ដល់វិស័យទេសចរណ៍ ព្រោះអ្នកដំណើរ អាចចំណាយប្រាក់សមរម្យ ធ្វើដំណើរក្នុងល្បឿនលឿន និងមានឱកាសដើរលេងកំសាន្ដច្រើនកន្លែង។
ប្រព័ន្ធផ្លូវដឹកជញ្ជូន និងវិស័យទេសចរណ៍ មានទំនាក់ទំនងគ្នាយ៉ាងជិតស្និទ្ធ ក្នុងហេតុផលមួយដ៏សាមញ្ញ ព្រោះថា ប្រព័ន្ធផ្លូវដឹកជញ្ជូន ជាធាតុមួយដ៏សំខាន់ សម្រាប់វិស័យទេសចរណ៍ អមជាមួយនឹងធាតុសំខាន់ពីរផ្សេងទៀត រួមមាន ភ្ញៀវទេសចរ និងតំបន់ទេសចរណ៍។ ផ្អែកតាមលទ្ធផលនៃការសិក្សាស្រាវជ្រាវយ៉ាងច្រើន បង្ហាញថា វិស័យទេសចរណ៍មិនអាចអភិវឌ្ឍបានដល់កម្រិតមួយល្អនោះទេ ដរាបណា គ្មានការអភិវឌ្ឍប្រព័ន្ធផ្លូវដឹកជញ្ជូន។ លើសពីនេះ ការអភិវឌ្ឍប្រព័ន្ធដឹកជញ្ជូនបានល្អ វាមិនត្រឹមតែអាចរួមចំណែក បង្កើនចំនួនភ្ញៀវទេសចរ បង្កើតជម្រើសទេសចរណ៍ថ្មីៗ ឬក៏បង្កើនភាពទាក់ទាញ និងការប្រកួតប្រជែង ក្នុងវិស័យទេសចរណ៍ជារួមប៉ុណ្ណោះទេ ក៏ប៉ុន្តែ វាក៏អាចរុញច្រានឱ្យមានការអភិវឌ្ឍប្រកបដោយស្ថិរភាពនៃវិស័យនេះផងដែរ។
នៅក្នុងប្រទេសដែលមានកម្រិតនៃការអភិវឌ្ឍខ្ពស់ តួយ៉ាង ប្រទេសស៊្វីស ដំណើរកំសាន្តទេសចរណ៍ អាចកើតឡើងទៅបាន សម្រាប់ប្រជាជនទូទៅក្នុងស្រុក ឬក៏ភ្ញៀវទេសចរបរទេស ក៏ដោយសារប្រទេសស៊្វីស មានប្រព័ន្ធផ្លូវដែករត់ខ្វាត់ខ្វែងពាសពេញផ្ទៃប្រទេស។ ហេតុផលសាមញ្ញ គឺ ផ្លូវដែកមានន័យស្មើនឹងការចំណាយសមរម្យ ការធ្វើដំណើរក្នុងល្បឿនលឿន និងការមានឱកាសដើរលេងកំសាន្ដច្រើនកន្លែង។ នៅស៊្វីស ឬប្រទេសអឺរ៉ុបផ្សេងទៀត តួយ៉ាង បារាំង អាល្លឺម៉ង់ និងអ៊ីតាលី គេអាចធ្វើដំណើរក្នុងល្បឿនលឿន រហូតដល់ប្រហែល ៣០០គីឡូម៉ែត្រ ក្នុងមួយម៉ោង។ ឧទាហរណ៍ ពីភ្នំពេញទៅក្រុងព្រះសីហនុ ដែលចំណាយផ្លូវប្រហែល ២១៤គីឡូម៉ែត្រ គេត្រូវធ្វើដំណើរមិនដល់មួយម៉ោងផង ប្រសិនបើគេធ្វើដំណើរតាមផ្លូវដែក ក្នុងល្បឿនលឿនដូចនៅអឺរ៉ុប។
នៅប្រទេសកម្ពុជា ដោយសារគ្មានផ្លូវដែកល្បឿនលឿន ភ្ញៀវទេសចរជាទូទៅមិនអាចធ្វើដំណើរកំសាន្ដបានច្រើនកន្លែងនោះទេ។ ជាបទពិសោធន៍របស់ភ្ញៀវទេសចរខ្លះ ត្រឹមចម្ងាយពីប៉ៃលិន មកទីក្រុងភ្នំពេញ តាមឡានក្រុងធំៗ គេត្រូវចំណាយពេលធ្វើដំណើរ តាំងពីរសៀលថ្ងៃត្រង់ រហូតដល់ពាក់កណ្ដាលយប់ក៏មាន។ អាចមានបញ្ហាច្រើនផ្សេងទៀត ក៏ប៉ុន្តែ ត្រឹមតែបញ្ហាផ្លូវដែកមួយខាងលើ វាល្មមសមរម្យឱ្យប្រទេសកម្ពុជា ក្លាយជា ប្រទេសទេសចរណ៍ឆ្លងកាត់រយៈពេលខ្លី។ ត្រង់នេះគឺមានន័យថា ភ្ញៀវទេសចរបរទេសស្នាក់នៅកំសាន្ដត្រឹមរយៈពេលខ្លីក្នុងប្រទេសកម្ពុជា ហើយធ្វើដំណើរហួសទៅវៀតណាម ឬថៃ តែម្ដង។
ងាកទៅផ្តោតលើករណីប្រទេសស៊្វីស បណ្តាញផ្លូវដែកនៃប្រទេសមួយនេះ បានទទួលការកត់សម្គាល់យ៉ាងខ្លាំង ពីពិភពលោកទាំងមូល ផ្អែកលើចំណុចពិសេសៗយ៉ាងច្រើន រួមមាន ការធ្វើដំណើរទូទៅ ការសម្របសម្រួលសេវាកម្ម ការបញ្ចូលជាមួយមធ្យោបាយដឹកជញ្ជូនផ្សេងៗ ភាពរហ័សទាន់ចិត្ត និងទៀងពេលវេលា ហើយនិងការធ្វើដំណើរឆ្លងកាត់ទៅកាន់ប្រទេសអឺរ៉ុបផ្សេងៗ។ លទ្ធផលរបៀបនេះ អាចកើតឡើងទៅបាន ក៏ដោយសារ ស៊្វីសមានបទប្បញ្ញត្តិដ៏តឹងរ៉ឹងលើប្រព័ន្ធនៃការធ្វើដំណើរជារួម និងការអនុវត្តប្រកបដោយប្រសិទ្ធិភាពខ្ពស់ ពីសំណាក់អាជ្ញាធរស៊្វីសផងដែរ។
គិតត្រឹមឆ្នាំ២០១៥ បណ្តាញផ្លូវដែកក្នុងប្រទេសស៊្វីស មានប្រវែងជាងប្រាំពាន់គីឡូម៉ែត្រ។ ប្រទេសស្វីស មិនត្រឹមតែមានបណ្តាញផ្លូវដែក ដែលរត់ខ្វាត់ខ្វែងច្រើនជាងគេបំផុត នៅលើពិភពលោកប៉ុណ្ណោះទេ បើទោះបីជា ប្រទេសមួយនេះត្រូវលាតសន្ធឹងដោយជួរភ្នំ Alpes ដែលគ្របដណ្ដប់លើផ្ទៃដីជាង៦០ភាគរយក៏ដោយ, ក៏ប៉ុន្តែ ប្រទេសស៊្វីសនៅតែជាប្រទេសនាំមុខគេផងដែរ លើពិភពលោក បើគិតពីចម្ងាយនៃការធ្វើដំណើរដ៏ច្រើនបំផុតរបស់ប្រជាជនស៊្វីសម្នាក់ៗ។ ប្រជាជនស៊្វីសម្នាក់ៗ ធ្វើដំណើរតាមផ្លូវដែក ក្នុងចម្ងាយប្រមាណជិត ពីរពាន់ប្រាំរយគីឡូម៉ែត្រ ក្នុងមួយឆ្នាំ។ នេះបើយោងតាម ទិន្នន័យផ្លូវការ កាលពីឆ្នាំ២០១៥។
ស្ទើរតែមួយរយភាគរយ នៃបណ្តាញផ្លូវដែករបស់ស៊្វីស ដំណើរការដោយថាមពលអគ្គីសនី លើកលែងតែ ផ្លូវដែកមួយចំនួន ដែលដំណើរការដោយ ម៉ាស៊ីនប្រើចំហាយទឹក សម្រាប់តែគោលបំណងទេសចរណ៍ប៉ុណ្ណោះ។ មានក្រុមហ៊ុនផ្លូវដែកចំនួន ៧៤នៅក្នុងប្រទេសស្វីស។ ចំណែកឯ ប្រជាជនស៊្វីស ធ្វើដំណើរទៅធ្វើការ ដោយប្រើប្រាស់ប្រព័ន្ធដឹកជញ្ជូនសាធារណៈ (ជាមធ្យោបាយដឹកជញ្ជូនចម្បង) តំណាងជាង ៣០ភាគរយ។ ប្រទេសស្វីស ក៏ជាប់ចំណាត់ថ្នាក់លេខមួយផងដែរ ក្នុងចំណោមប្រព័ន្ធផ្លូវដែកអឺរ៉ុប ផ្អែកលើសន្ទស្សន៍លទ្ធផលផ្លូវដែកអឺរ៉ុប នៅឆ្នាំ២០១៧ សម្រាប់ការធ្វើដំណើរទូទៅ គុណភាពសេវាកម្ម និងចំណាត់ថ្នាក់សុវត្ថិភាពខ្ពស់បំផុត។
សរុបជារួម ដោយសារប្រសិទ្ធិភាពនៃប្រព័ន្ធរដ្ឋបាលល្អ ប្រទេសស៊្វីសបានអភិវឌ្ឍប្រព័ន្ធផ្លូវដែកដ៏ល្អឥតខ្ចោះ ហើយវាបានរួមចំណែកយ៉ាងចម្បង ក្នុងការអភិវឌ្ឍវិស័យទេសចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ