តើការលើកតម្កើងស្រ្តីអាចធ្វើអោយលោកស្រី ហ៊ីឡារី គ្លីនតុន ទទួលជោគជ័យឬទេ?
ចុះផ្សាយនៅថ្ងៃ៖
ស្តាប់ - ០៣:៣៧
កាលពីឆ្នាំ២០០៨ លោកស្រី ហ៊ីឡារី គ្លីនតុន នៅជាសមាជិកព្រឹទ្ធសភាប្រចាំរដ្ឋញូវយ៉កនៅឡើយ។ ហើយលោកស្រីបានឈរឈ្មោះប្រកួតប្រជែង ក្នុងការបោះឆ្នោតជ្រើសរើសអ្នកតំណាងបក្សប្រជាធិបតេយ្យ សំរាប់ការបោះឆ្នោតប្រធានាធិបតីអាមេរិក។ នាកាលនោះ លោកស្រីពុំសូវប្រើប្រាស់រូបភាព ឬលើកយកប្រធានបទស្តីពីស្រ្តីមកដាក់បញ្ចូលក្នុងយុទ្ធនាការឃោសនាឡើយ។ ជាលទ្ធផល លោក បារ៉ាក់ អូបាម៉ា ត្រូវបានជ្រើសរើសជាបេក្ខជនផ្លូវការតំណាងអោយគណបក្សប្រជាធិបតេយ្យ។ បច្ចុប្បន្ននេះ លោកស្រី ហ៊ីឡារី គ្លីនតុន កំពុងលើកយកប្រធានបទស្រ្តីមកធ្វើជាប្រធានបទចំបងក្នុងការឃោសនា។
មេរៀនអតីតកាល
ចន្លោះពីឆ្នាំ២០០៩ ដល់ឆ្នាំ២០១៣ នៅពេលដែលបានក្លាយខ្លួនជារដ្ឋមន្រ្តីការបរទេសអាមេរិក ពេលនោះទើបលោកស្រី ហ៊ីឡារី គ្លីនតុន ទទួលបានមេរៀនច្បាស់លាស់មួយ។ ពោលគឺ លោកស្រីបានយល់ច្បាស់ថា ប្រធានបទយេនដ័រលើកតម្កើងស្រ្តីមិនមែនជារឿងបន្ទាប់បន្សំឡើយ។ សព្វថ្ងៃនេះ ទ្រឹស្តីស្រ្តីនិយម គឺជាប្រធានបទចម្បងមួយនៅក្នុងយុទ្ធនាការឃោសនារបស់គាត់។ គឺប្រធានបទនេះហើយដែលកំពុងតែធ្វើអោយការឃោសនារបស់លោកស្រីមានសន្ទុះកាន់តែខ្លាំង។
ឥឡូវនេះ ក្នុងផ្នត់គំនិតពលរដ្ឋអាមេរិក ដែលស្រលាញ់គាំទ្រលោកស្រី ហ៊ីឡារី គ្លីនតុន គឺ លោកស្រីមានតួនាទីនៅក្នុងគ្រប់ប្រធានបទសង្គមទាំងអស់។ សំរាប់ពួកគេ លោកស្រីមានតួនាទីជាកូនស្រីផង ដែលមានម្តាយចាស់ជរា។ ហើយលោកស្រីក៏ជាម្តាយគេផង ដោយមានកូនតែម្នាក់គត់ គឺនាង ឆែលស៊ី គ្លីនតុន។ ក្នុងនាមជាជីដូន នាពេលឆាប់ៗនេះ លោកស្រីក៏នឹងមានចៅទីពីរផងដែរ។ លើសពីនេះ លោកស្រី ហ៊ីឡារី គ្លីនតុន ក៏ជាស្រ្តីការពារសិទ្ធិស្រ្តីដូចគ្នា ហើយក៏កំពុងដើរតួជាស្រ្តីគំរូផងដែរ។ និយាយរួម គឺលោកស្រី គ្លីនតុន មានតួនាទីសំខាន់មិនអាចមើលរំលងបានឡើយ។
ម្តាយរបស់ពលរដ្ឋអាមេរិកទូទៅ
គ្រួសារ និងការអប់រំ គឺជាប្រធានបទ ដែលលោកស្រី គ្លីនតុន បានដឹកនាំឃោសនាតាំងពីយូរយារណាស់មកហើយ។ កាលពីឆ្នាំ ១៩៩៦ លោកស្រីធ្លាប់បានសរសេរសៀវភៅមួយក្បាល ដែលមានចំណងជើងថា គេត្រូវការមួយភូមិ (It Takes a Village)។ ខ្លឹមសារនៃសៀវភៅនេះត្រូវបានយកមកដាក់បញ្ចូលក្នុងយុទ្ធនាការនាពេលបច្ចុប្បន្ននេះ។ ខ្សែរវីដេអូខ្លីមួយមានចំណងជើងថា កុមារ (Children) បានបង្ហាញពីការសន្យារបស់លោកស្រី គ្លីនតុន ក្នុងការតស៊ូមតិដើម្បីផលប្រយោជន៍កុមារ ជាពិសេសការជួយលើកស្ទួយជីវភាពមាតា និងកុមារ។។ រូបភាពវីដេអូនេះត្រូវបានថតតាំងពីទសវត្សន៍ទី៧០ មកម្ល៉េះ ដែលកាលនោះលោកស្រីនៅជាមេធាវីវ័យក្មេងនៅឡើយ។
នៅក្នុងឃ្លីបវីដេអូខ្លីមួយទៀតកាលពីឆ្នាំ២០១៥ ក្នុងឱកាសបុណ្យមាតា លោកស្រី គ្លីនតុន បានផ្ញើសារសំខាន់ពីរជូនគ្រួសារពលរដ្ឋអាមេរិកទូទៅ។ សារទីមួយ គឺលោកស្រីសន្យាបង្កើតកម្មវិធីឈប់សំរាកដល់មាតាដែលទើបឆ្លងទន្លេ។ សូមបញ្ជាក់ថា បើប្រៀបធៀបជាមួយប្រទេសអភិវឌ្ឍន៍ដទៃទៀត សហរដ្ឋអាមេរិកគ្មានកម្មវិធីថ្នាក់ជាតិបែបនេះឡើយ។ សព្វថ្ងៃនេះ គឺពួកនិយោជក់ជាអ្នកសំរេចផ្តល់ការឈប់សំរាកដល់បុគ្គលិកស្រ្តីដែលទើបឆ្លងទន្លេ។ ក្រុមហ៊ុនខ្លះអោយឈប់បានតិច ឬច្រើនអាស្រ័យលើគោលនយោបាយរបស់ក្រុមហ៊ុន។ សារទីពីរ គឺការសន្យាបង្កើតកម្មវិធីសង្គមដើម្បីជួយដល់ស្រ្តីរស់នៅម្នាក់ឯង ហើយដែលមានបន្ទុកគ្រួសារធ្ងន់ធ្ងរ។ លោកស្រី ហ៊ីឡារី គ្លីនតុន បានរំលឹកពីយុវភាពរស់នៅក្នុងគ្រួសារក្រីក្រលំបាកមួយ ក្រោមអំរែកតែម្នាក់គត់របស់អ្នកម្តាយឈ្មោះ ដូរ៉ូទី។ លោកស្រីបានរំលឹកថា ម្តាយលោកស្រីបានទទួលជំនួយសង្គម ដែលអនុញ្ញាតអោយជីវភាពគ្រួសារគាត់បានប្រសើរ។
ចំនុចខ្លាំងមួយទៀតរបស់លោកស្រី គ្លីនតុន គឺរូបភាពជាអ្នកការពារសិទ្ធិស្រ្តី។ ឆ្លងតាមរយៈយុទ្ធនាការឃោសនាកន្លងមក គេតែងឃើញលោកស្រីបានរិះគន់យ៉ាងចាស់ដៃចំពោះទស្សនៈអភិរក្សនិយមចាស់គំរិលរបស់ពួកសាធារណរដ្ឋ។ ខណៈពេលដែលបេក្ខជនសាធារណរដ្ឋចង់លប់បំបាត់ ឬកាត់បន្ថយថវិកាសង្គមនានា លោកស្រី គ្លីនតុន តែងការពារ និងសន្យាឧបត្ថម្ភបន្តទៀតដល់កម្មវិធីពន្យាកំណើត ការរំលូតកូន និងការទាមទារប្រាក់បៀរវត្សស្មើបុរស។ កាសែត New York Times សហការគ្មាជាមួយសាកលវិទ្យាល័យកាលីហ្វ័រញ៉ាក្រុងឡូអង់ជឺឡែស (UCLA) បានសិក្សាស្តីពីប្រសិទ្ធភាពនៃការឃោសនាវីដេអូគាំទ្រលោកស្រី គ្លីនតុន។
ក្រុមអ្នកស្រាវជ្រាវបានទាញសន្និដ្ឋានថា ប្រជាប្រិយភាពរបស់លោកស្រី គ្លីនតុន គឺជាលទ្ធផលនៃការវាយប្រហារ និងការរិះគន់ចំពោះស្រ្តីពីសំណាក់ពួកគណបក្សសាធារណរដ្ឋ។ តួយ៉ាងដូចជាលោក ថេត គ្រូស និងលោក ប៊ែន ខាសិន តែងឃោសនាធ្វើយ៉ាងណាអោយពលរដ្ឋអាមេរិក ជាពិសេសស្រ្តីរក្សាតម្លៃគ្រួសារតាមបែបបុរាណតាមគន្លងគ្រិស្តសាសនា។ហើយ លោក ដូណាស់ ត្រាំ តែងប្រើពាក្យពេចន៍ជេរប្រទេចផ្តាសារមើលងាយស្រ្តី។ ផ្ទុយទៅវិញ លោកស្រី គ្លីនតុន តែងលើកវិធានការណ៍ ឬស្នើកម្មវិធីនយោបាយទាន់សម័យការពារស្រ្តីផង និងគ្រួសារពលរដ្ឋអាមេរិកផង។ ពោល គឺលោកស្រីផ្តោតលើអនាគតរបស់សហរដ្ឋអាមេរិក ជាពិសេសផ្តល់ក្តីសង្ឃឹមដល់ពលរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ