ប្រមុខដឹកនាំប៉ាឡេស្ទីន ធ្វើដំណើរទៅ ហ្សេនីន និងសន្យាកសាងកន្លែងនេះឡើងវិញ
ថ្ងៃពុធ ប្រមុខដឹកនាំអាជ្ញាធរប៉ាឡេស្ទីន បានអញ្ជើញធ្វើដំណើរទៅកាន់ជំរំក្រុង ហ្សេនីន នៅក្នុងតំបន់ស៊ីហ្សកដានីខាងជើង។ ជាដំណើរដ៏ភ្ញាក់ផ្អើល បន្ទាប់ពី លោកខកខានមិនបានទៅជាន់ទីនោះ ប្រមាណជា ១០ឆ្នាំមកហើយ។ ដំណើរដ៏កម្រនេះ គឺក្រោយពី ពួកទាហានអ៊ីស្រាអែល បានវាយប្រហារកម្ទេចជំរំជនភៀសខ្លួន ហ្សេនីន កាលពីដើមសប្តាហ៍មុន។
ចុះផ្សាយនៅថ្ងៃ៖
មុននឹងថ្លែងសារនយោបាយ ប្រមុខដឹកនាំអាជ្ញាធរប៉ាឡេស្ទីន ម៉ះមូដ អាបាស់ (Mahmoud Abbas) បានដាក់កម្រងផ្កា រំលឹកវិញ្ញាណក្ខន្ធជនរងគ្រោះ ស្លាប់នៅជំរំហ្សេនីន។ ហ្សេនីន ទីដែលលោកបានចាត់ទុកថាជានិមិត្តរូបនៃការតស៊ូប្រយុទ្ធរបស់ពលរដ្ឋប៉ាឡេស្ទីន។ លោកសន្យាកសាងហេដ្ឋារចនាសម្ព័ន្ធទីកន្លែងនេះ ឲ្យបានល្អដូចដើម ឬក៏ល្អជាងពីមុនផង។ ប្រទេសអារ៉ាប់ផ្សេងៗ ក៏បានឲ្យដំណឹងពីគម្រោងជួយឧបត្ថម្ភសាងសង់កន្លែងនេះដែរ។
ដើមសប្តាហ៍មុននេះ ទាហានអ៊ីស្រាអែល បានធ្វើប្រតិបត្តិការ៤៨ម៉ោង វាយប្រហារកម្ទេចជំរំហ្សេនីន។ ទង្វើនេះ ត្រូវរងការរិះគន់ជាខ្លាំង អំពីសហភាពអឺរ៉ុប និងអង្គការសហប្រជាជាតិ។ បើតាមទីភ្នាក់ងារអង្គការសហប្រជាជាតិដើម្បីជនភៀសខ្លួនប៉ាឡេស្ទីន គឺ ក្នុងប្រតិបត្តិការវាយកម្ទេចពីសំណាក់អ៊ីស្រាអែល នោះ បានបណ្តាលឲ្យផ្ទះសម្បែង ជាង១០០ ត្រូវខូចខាត។ សាលារៀនមួយចំនួន ក៏ត្រូវបំផ្លាញ ហើយនិង ហេដ្ឋារចនាសម្ព័ន្ធទឹកភ្លើង ក៏រងការប៉ះពាល់ដែរ។
គួររំលឹកជូនថា ហ្សេនីន ជាជំរំជនភៀសខ្លួន បង្កើតឡើងនៅឆ្នាំ១៩៥៣ សម្រាប់ទទួលជនភៀសខ្លួនប៉ាឡេស្ទីន ប្រមាណជា ៧៦០ ០០០ នាក់ ដែលត្រូវ អ៊ីស្រាអែល បណ្តេញចេញ បន្ទាប់ពីបង្កើតរដ្ឋអ៊ីស្រាអែល នាឆ្នាំ១៩៤៨។ បន្តិចម្តងៗ ហ្សេនីន ក៏ប្រែពីជំរំជនភៀសខ្លួន ទៅជាទីប្រជុំជន ហើយនិងក្រោយមកទៀត មានផ្ទះសម្បែងជាហូរហែ។ នាឆ្នាំ១៩៦៧ តំបន់នេះ ធ្លាក់ខ្លួនឋិតក្រោមការត្រួតត្រារបស់អ៊ីស្រាអែល។ សព្វថ្ងៃនេះ បើគ្រាន់តែពី ជំរំក្រុង ហ្សេនី ផ្ទៃដីមិនដល់ ១គីឡូម៉ែត្រការ៉េផង មានពលរដ្ឋប៉ាឡេស្ទីន ប្រមាណ ១៨ ០០០ នាក់រស់នៅផ្តុំគ្នា និងដែលត្រូវគេវាយតម្លៃថា ជាកន្លែងដែលក្រីក្រខ្លាំងបំផុត។
វ័យ ៨៧ ឆ្នាំ ប្រមុខដឹកនាំអាជ្ញាធរប៉ាឡេស្ទីន ម៉ះមូដ អាបាស់ កម្រនឹងអញ្ជើញទៅទីក្រុងហ្សេនីនណាស់។ ដំណើរទៅជំរំភៀសខ្លួនហ្សេនីនចុងក្រោយរបស់លោក គឺ នៅឆ្នាំ២០០៤ ពេលឃោសនាបោះឆ្នោត ធ្វើជាប្រធានតំណាងប៉ាឡេស្ទីន ក្រោយពីមរណភាពរបស់ Yasser Arafat។ ឆ្នាំ២០១២ លោក ម៉ះមូដ អាបាស់ បានទៅក្រុងហ្សេនីនដែរ តែមិនបានទៅគោរពវិញ្ញាណក្ខន្ធនៅជំរំដូចគ្រានេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ