ប៉ាឡេស្ទីន៖កងទ័ពអ៊ីស្រាអែលបើកការវាយប្រហារទ្រង់ទ្រាយធំមិនធ្លាប់មានលើក្រុងហ្សេនីនក្នុងតំបន់ស៊ីហ្សកដានី
នៅក្នុងដែនដីប៉ាឡេស្ទីន កងទ័ពអ៊ីស្រាអែលបានបើកការវាយប្រហារតាំងពីជាង ២៤ម៉ោងលើទីក្រុងហ្សេនីនស្ថិតប៉ែកខាងជើងតំបន់ស៊ីហ្សកដានី។ ប្រតិបត្តិការយោធានេះជាប្រតិបត្តិការទ្រង់ទ្រាយធំមួយដែលកងទ័ពអ៊ីស្រាអែលបានធ្វើលើទឹកដីប៉ាឡេស្ទីននារយៈពេលប៉ុន្មានឆ្នាំកន្លងទៅ។ ជាផ្លូវការ រដ្ឋាភិបាលអ៊ីស្រាអែលបានលើកឡើងពីប្រតិបត្តិការប្រឆាំងនឹងភេរវនិយមដែលជាភាសាចង់សំដៅលើក្រុមប្រដាប់អាវុធប៉ាឡេស្ទីន។ ខណៈនេះ មានស្លាប់ប៉ាឡេស្ទីនចំនួន ១០នាក់ និងរបួសប្រមាណជា ១០០នាក់នៅក្នុងការវាយប្រហាររបស់កងទ័ពអ៊ីស្រាអែល។ អន្តរាគមន៍យោធារបស់អ៊ីស្រាអែលបានធ្វើឡើងក្រោយពីមានរលកនៃការវាយប្រហារប្រឆាំងអ៊ីស្រាអែលនៅប៉ែកខាងជើងតំបន់ស៊ីហ្សកដានី។គួរបញ្ជាក់ថា នៅក្រុងហ្សេនីនក៏មានជំរំដែលមានរស់នៅដោយប្រជាជនប៉ាឡេស្ទីនដែលបានរងការបណ្តេញពីដែនដីរបស់ខ្លួនក្នុងឆ្នាំ ១៩៤៨ដែលជាឆ្នាំនៃការបង្កើតរដ្ឋអ៊ីស្រាអែល។ លោកតូម៉ា វេស្កូវី អ្នកស្រាវជ្រាវឯករាជ្យបានយល់ឃើញថា ក្រុមយុវជនប៉ាឡេស្ទីននៅក្នុងតំបន់ស៊ីហ្សកដានីដែលកាន់កាប់ដោយអ៊ីស្រាអែលកំពុងប្រឈមនឹងភាពអយុត្តិធម៌ និងគ្មានជម្រើសអ្វីក្រៅពីការបន្តការតស៊ូទេ។
ចុះផ្សាយនៅថ្ងៃ៖
ស្តាប់ - ០១:៤៣
« គេឃើញមានយុវជនប៉ាឡេស្ទីនដែលកំពុងមានអារម្មណ៍ថា ពួកគេកំពុងប្រឈមនឹងភាពអយុតិ្តធម៌នៅក្រោយអ៊ីស្រាអែលចូលកាន់កាប់ដែនដីរបស់ពួកគេ។ ដូច្នេះសម្រាប់ពួកគេ គឺមានតែការតស៊ូ។ គួររម្លឹកថាជាប្រវត្តិសាស្រ្ត ក្រុងហ្សេនីនក៏ដូចជាក្រុង Naplouse មានបង្កប់ដោយឫសគល់នយោបាយប៉ាឡេស្ទីនយ៉ាងជ្រៅ។ មួយវិញទៀត បើគេនិយាយពីក្រុងហ្សេនីន គេមិនត្រូវភ្លេចនិយាយពីជំរំជនភៀសខ្លួននៅទីនោះទេ។
ជនភៀខ្លួនប៉ាឡេស្ទីនដែលកំពុងរស់នៅក្នុងជំរំជនភៀសខ្លួននៅក្រុងហ្សេនីនបានរស់នៅទីនោះតាំងពីឆ្នាំ ១៩៤៨ និងដែលពួកគេបានរងការបណ្តេញចេញពីដែនដីរបស់ខ្លួននៅក្រោយការបង្កើតរដ្ឋអ៊ីស្រាអែល។ ជនភៀសខ្លួនទាំងអស់បានរង់ចាំ និងកំពុងបន្តរង់ចាំឲ្យមានការអនុវត្តន៍ច្បាប់អន្តរជាតិ។ តែរហូតមកដល់ពេលនេះ ពួកគេនៅមិនបានទទួលអ្វីទាំងអស់។ ដូច្នេះពីជំនាន់មួយទៅជំនាន់មួយ ពួកគេកំពុងបន្តទទួលនូវភាពអយុត្តិធម៌ និងកំពុងប្រឈមនឹងអនាគតនយោបាយងងឹតស្លុង។
ដូច្នេះជម្រើសដែលនៅសេសសល់របស់ពួកគេ គឺបន្តកាន់អាវុធដើម្បីបន្តការតស៊ូ។ នាប៉ុន្មានសប្តាហ៍កន្លងនេះ ការវាយប្រហាររបស់កងទ័ពអ៊ីស្រាអែលបានសម្លាប់ក្រុមយុទ្ធជនប៉ាឡេស្ទីន និងមានក្រុមខ្លះត្រូវបានអ៊ីស្រាអែលគាស់រំលើង។ តែគេអាចកត់សម្គាល់ឃើញថា ក្រុមមនុស្សជំនាន់ថ្មីអាចនឹងបន្តដើរតាមផ្លូវដដែរនេះដោយសារតែអវត្តមានទស្សនៈវិស័យនយោបាយដែលអាចឋិតឋេរបាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ