ប្រមុខការទូតអាមេរិកបំពេញទស្សនកិច្ចនៅតំបន់ដើមបូព៌ាដែលកំពុងពុះកញ្ជ្រោលដោយអំពើហិង្សា
ប្រមុខការទូតអាមេរិកលោកអង់តូនី ប៊្លីនកិនផ្តើមទស្សនកិច្ចមួយជុំតំបន់ដើមបូព៌ាក្នុងថ្ងៃអាទិត្យ ទី២៩ មករានេះ។ វត្តមានរបស់លោកប៊្លីនកិននៅក្នុងតំបន់ត្រូវបានគ្រោងតាំងពីយូរមកហើយ តែវាបានធ្វើឡើងចំពេលដែលតំបន់ទើបផ្ទុះអំពើហិង្សានារយៈពេលប៉ុន្មានថ្ងៃចុងក្រោយរវាងអ៊ីស្រាអែល និងប៉ាឡេស្ទីន។ ក្រុមអ្នកវិភាគមានសង្ឃឹមតិចតួចដែលលោកប៊្លីនកិនអាចប្រើឥទ្ធិពលរបស់អាមេរិកដើម្បីរំងាប់ភាពតានតឹងពេលនេះ។
ចុះផ្សាយនៅថ្ងៃ៖
ស្តាប់ - ០១:៥៩
អេហ្ស៊ីបជាប្រទេសទី១ ដែលប្រមុខការទូតអាមេរិកលោកអង់តូនី ប៊្លីនកិនផ្តើមទស្សនកិច្ចមុនគេក្នុងថ្ងៃអាទិត្យ ទី២៩ មករា មុននឹងបន្តដំណើរទៅកាន់ប្រទេសអ៊ីស្រាអែលនៅថ្ងៃចន្ទ ទី៣០ និងទៅកាន់ទឹកដីប៉ាឡេស្ទីននៅថ្ងៃអង្គារ ទី៣១ មករាសប្តាហ៍ក្រោយ។ តែអ្វីជាការកត់សម្គាល់ ទស្សនកិច្ចនៅក្នុងតំបន់របស់លោកប៊្លីនកិនដែលបានរៀបចំទុកតាំងពីយូរបានធ្វើឡើង ចំពេលដែលអំពើហិង្សាបានផ្ទុះខ្លាំងនារយៈពេលប៉ុន្មានថ្ងៃចុងក្រោយរវាងអ៊ីស្រាអែល និងប៉ាឡេស្ទីន។ នេះជាប្រធានបទអាទិភាពមួយដែលលោកប៊្លីនកិនលើកយកទៅនិយាយជាមួយប្រធានាធិបតីអេហ្ស៊ីបលោកអាប់ឌែល ហ្វាតា អាល់ស៊ីស៊ី។
ការនិយាយរឿងនេះជាមួយលោកអាល់ស៊ីស៊ីព្រោះអេហ្ស៊ីបបានដើរតួនាទីជាអាជ្ញាកណ្តាលនៅក្នុងជម្លោះអ៊ីស្រាអែល និងប៉ាឡេស្ទីនតាំងពីដំបូង។ ក្រៅពីជម្លោះអ៊ីស្រាអែល ប៉ាឡេស្ទីន លោកប៊្លីនកិននិយាយជាមួយលោកអាល់ស៊ីស៊ីលើប្រធានរឿងផ្សេងទៀត ពិសេសបញ្ហានៅក្នុងតំបន់ដោយផ្តោតលើប្រទេសលីប៊ី និងប្រទេសស៊ូដង់។ ប្រធានរឿងបន្ទាប់មក គឺទំនាក់ទំនងទ្វេភាគីអាមេរិក និងអេហ្ស៊ីបក្នុងនាមអេហ្ស៊ីបជាប្រទេសមួយដែលទទួលបានជំនួយយោធាពីអាមេរិក។ តែជានិច្ចជាកាល ទំនាក់ទំនងរវាងក្រុងវ៉ាស៊ីតោន និងក្រុងគែរតែងរកាំរកូសដោយបញ្ហាសិទ្ធិមនុស្សនៅអេហ្ស៊ីប។
ទោះជាយ៉ាងនេះក្តី អំពើហិង្សារវាងអ៊ីស្រាអែល និងប៉ាឡេស្ទីនពេលនេះកំពុងគ្របដណ្តប់ខ្លាំងលើទស្សនកិច្ចរបស់លោកប៊្លីនកិននៅក្នុងតំបន់។ គ្រប់គ្នាសង្ឃឹមថានៅក្នុងជំនួបជាមួយថ្នាក់ដឹកនាំអ៊ីស្រាអែល និងប៉ាឡេស្ទីន លោកប៊្លីនកិនអាចនិយាយបញ្ចុះបញ្ចូលភាគីទាំងពីរឲ្យបញ្ឈប់ការប្រឈមមុខដាក់គ្នា។ តែក្រុមអ្នកវិភាគបានយល់ឃើញដូចគ្នាពីឥទ្ធិពលមានកម្រិតរបស់រដ្ឋបាលអាមេរិកនៅក្នុងព្រឹត្តិការណ៍ពេលនេះ។ តាមក្រុមអ្នកវិភាគដដែល លោកប៊្លីនកិនមិនអាចធ្វើអ្វីលើសពីការបន្តអំពាវនាវឲ្យអ៊ីស្រាអែល និងប៉ាឡេស្ទីនមានភាពស្ងប់ស្ងាត់ និងអត់ធ្មត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ