អំពើហិង្សាអ៊ីស្រាអែលលើប៉ាឡេស្ទីន ៖ ចូល២០២៣បាន២៦ថ្ងៃ ស្លាប់ជនប៉ាឡេស្ទីនអស់២៩នាក់
ការបាត់បង់ជីវិតក្នុងអំពើហិង្សានិងអាណានិគមកិច្ចអ៊ីស្រាអែល ឡើងខ្ពស់ជាលំដាប់។ តាំងពីចូលឆ្នាំ២០២៣មក មានប្រជាជនប៉ាឡេស្ទីនស្លាប់ជាមធ្យម ជាងម្នាក់ក្នុងមួយថ្ងៃ។ ៩នាក់ បានស្លាប់ក្នុងមួយថ្ងៃព្រហស្បតិ៍ទី២៦មករានេះ ដោយស្នាដៃយោធាអ៊ីស្រាអែល ក្រោមផ្លាកធ្វើប្រតិបត្តិការប្រឆាំងនឹងសកម្មជនអ៊ីស្លាមនិយមនៅជំរំជនភៀសខ្លួនហ្សេនីន ភាគខាងជើងតំបន់ស៊ីហ្សកដានីក្រោមអាណានិគម។
ចុះផ្សាយនៅថ្ងៃ៖
ស្តាប់ - ០២:០៦
ក្នុងប្រតិបត្តិការ ទាហានអ៊ីស្រាអែលបានបាញ់ឧស្ម័នបង្ហូរទឹកភ្នែក ចូលក្នុងអាគារព្យាបាលជំងឺកុមារនៃមន្ទីរពេទ្យក្រុងJenine បណ្តាលឱ្យក្មេងជាច្រើនថប់ដង្ហើម។ នេះបើតាមក្រសួងសុខាភិបាលប៉ាឡេស្ទីន ដែលបញ្ជាក់ថាជាសរុបមានជនប៉ាឡេស្ទីន៩នាក់បានស្លាប់ក្នុងនោះម្នាក់ជាស្ត្រីចំណាស់ និង២០នាក់បានរងរបួស។ ជាការបាត់បង់ជីវិតដ៏ច្រើនបំផុតក្នុងប្រតិបត្តិការតែមួយរបស់យោធាអ៊ីស្រាអែល គិតចាប់តាំងពីអង្គការសហប្រជាជាតិធ្វើសម្រង់បញ្ជីអ្នកស្លាប់នៅឆ្នាំ២០០៥មក។
អ៊ីស្រាអែលបានបដិសេធថាគ្មានទាហានណាមានចេតនាបាញ់លើមន្ទីរពេទ្យទេ ប៉ុន្តែយោធាបានចេញធ្វើប្រតិបត្តិការបោសសម្អាតក្រុមភេរវនិយម នៃអង្គការប្រដាប់អាវុធជីហាតអ៊ីស្លាម នៅក្នុងជំរំជនភៀសខ្លួនក្បែរនោះដោយមានការបាញ់តតាំងគ្នាជាមួយពួកភេរវជនផង។
បង្កើតឡើងនៅឆ្នាំ១៩៥៣ ជំរំជនភៀសខ្លួនហ្សេនីន បានក្លាយជាក្រុងមួយ នៅក្នុងក្រុង និងជាជម្រករបស់ជនភៀសខ្លួនប៉ាឡេស្ទីនជិតពីរម៉ឺននាក់ តែក៏ជាចំណុចវាយប្រហារពិសេសរបស់យោធាអ៊ីស្រាអែលដែលតាំងពីចូលអាណានិគមកិច្ចលើតំបន់ស៊ីហ្សកដានីនៅឆ្នាំ១៩៦៧មក តែងបើកប្រតិបត្តិការស្ទើរជារៀងរាល់ថ្ងៃក្នុងដែនដីអាណានិគមប៉ាឡេស្ទីន។
ប្រតិបត្តិការយោធា ឬអំពើហិង្សាស៊ីវិលអ៊ីស្រាអែល តែងឆក់យកជីវិតប៉ាឡេស្ទីនទៅជាមួយផង។ ២០២២ ជាឆ្នាំដែលមានជនប៉ាឡេស្ទីនស្លាប់ច្រើនជាងបង្អស់ សម្រាប់រយៈពេល២០ឆ្នាំចុងក្រោយនេះ ៖ ១៤៤នាក់បើតាមអង្គការការពារសិទ្ធិមនុស្សអ៊ីស្រាអែល តែជិត១៧០នាក់បើតាមតួលេខរបស់អាជ្ញាធរប៉ាឡេស្ទីន។ ប៉ុន្តែ២០២៣ទំនងជាអាចបំបែកកំណត់ត្រាឆ្នាំចាស់ បើមានល្បឿននៃអំពើហិង្សាដូចខែមករា។ គ្រាន់តែចូលឆ្នាំថ្មីបាន២៦ថ្ងៃ អំពើហិង្សាអ៊ីស្រាអែលបានផ្តាច់ជីវិតជនប៉ាឡេស្ទីនអស់២៩នាក់ហើយ ពោលគឺមានស្លាប់ជាមធ្យម ច្រើនជាងម្នាក់ក្នុងមួយថ្ងៃ។ សម្រាប់អ៊ីស្រាអែល អ្នកបាត់បង់ជីវិតភាគច្រើនជាយុទ្ធជនប៉ាឡេស្ទីន តែបើតាមការអង្កេតរបស់កាសែត Haaretz មានមិនដល់ពាក់កណ្តាលទេបានស្លាប់ដោយកាន់អាវុធ ខុសពីនោះជាជនស៊ីវិលទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ