ទស្សនកិច្ចប្រកបដោយចម្រូងចម្រាសរបស់រដ្ឋមន្រ្តីអ៊ីស្រាអែលទៅកាន់ទីលានវិហារអ៊ីស្លាម
នៅអ៊ីស្រាអែល រដ្ឋមន្រ្តីក្រសួងសន្តិសុខជាតិមកពីគណបក្សស្តាំនិយមជ្រុលលោកអ៊ីតាម៉ារ បេនវៀរបានធ្វើដំណើរទៅកាន់ទីលានវិហារអ៊ីស្លាមក្នុងទីក្រុងហ្សេរ៉ុយសាឡឹមខាងកើតនាព្រលឹមស្រាងៗព្រឹកថ្ងៃអង្គារ ទី៣ មករា។ ដំណើរទៅកាន់ទីលានវិហារអ៊ីស្លាមរបស់រដ្ឋមន្រ្តីអ៊ីស្រាអែលរូបនេះបានបង្កឲ្យមានភាពចម្រូងចម្រាស និងកំហឹងក្រៀវក្រោលពីប្រជាជនប៉ាឡេស្ទីន ពិសេសពីពួកហាម៉ាស់ប៉ាឡេស្ទីនដែលកំពុងកាន់កាប់តំបន់ហ្កាហ្សា។
ចុះផ្សាយនៅថ្ងៃ៖
ស្តាប់ - ០២:២១
នេះមិនមែនជាលើកទី១ ទេដែលអ្នកស្តាំនិយជ្រុលអ៊ីស្រាអែលលោកអ៊ីតាម៉ារ បេនវៀរបានធ្វើដំណើរទៅកាន់ទីលានវិហារអ៊ីស្លាមស្ថិតក្នុងទីក្រុងហ្សេរ៉ុយសាឡឹមខាងកើត។ កាលណោះ ក្នុងនាមលោកជាអ្នកតំណាងរាស្រ្ត។ តែឥឡូវនេះ លោកអ៊ីតាម៉ារ បេនវៀរបានធ្វើដំណើរទៅកាន់ទីកន្លែងដដែលនោះក្នុងនាមជារដ្ឋមន្រ្តីក្រសួងសន្តិសុខជាតិ មានន័យថា ក្នុងនាមជាសមាជិករដ្ឋាភិបាលម្នាក់។ ដូច្នេះវាជារឿងធម្មតាដែលទង្វើនេះបានបង្កឲ្យមានកំហឹងខ្លាំងក្លាពីប្រជាជានប៉ាឡេស្ទីន ពិសេសពីចលនាហាម៉ាស់ប៉ាឡេស្ទីនដែលកំពុងកាន់កាប់តំបន់ហ្កាហ្សា និងជាសត្រូវប្រឈមមុខរបស់អ៊ីស្រាអែល។
ចំណែកក្រសួងការបរទេសប៉ាឡេស្ទីននៅតំបន់ស៊ីហ្សាដានីបានចាត់ទុកទស្សនកិច្ចរបស់រដ្ឋមន្រ្តីក្រសួងសន្តិសុខជាតិអ៊ីស្រាអែលលោកអ៊ីតាម៉ារ បេនវៀរថាជាការបង្ករឿងមិនធ្លាប់មាន។ តែលោកអ៊ីតាម៉ារ បេនវៀរបានឆ្លើយបកវិញនៅក្នុងសេចក្តីប្រកាសព័ត៌មានថា ទីលានវិហារអ៊ីស្លាមជាទីកន្លែងសំខាន់ខ្លាំងណាស់សម្រាប់ប្រជាជនអ៊ីស្រាអែល និងថា អ៊ីស្រាអែលរក្សាសេរីភាពក្នុងការដើរហើរនៅទីលានវិហារអ៊ីស្លាមនោះសម្រាប់អ្នកកាន់សាសនាអ៊ីស្លាម និងអ្នកកាន់សាសនាគ្រឹស្ត។ គួរបញ្ជាក់ថា ទីលានវិហារអ៊ីស្លាមក្នុងទីក្រុងហ្សេរ៉ុយសាឡឹមខាងកើតជាទីសក្ការៈទី៣ របស់អ្នកកាន់សាសនាអ៊ីស្លាមដែលស្ថិតនៅលើដែនដីប៉ាឡេស្ទីន។
សព្វថ្ងៃ ទីលានវិហារអ៊ីស្លាមនេះត្រូវបានដាក់ឲ្យស្ថិតនៅក្រោមការគ្រប់គ្រងរបស់ប្រទេសហ្សកដានី។ តាមធម្មតា មានតែអ្នកកាន់សាសនាអ៊ីស្លាមទេដែលមានសិទ្ធិចូលទៅសូត្រធម៌ និងបន់ស្រន់នៅក្នុងវិហារអ៊ីស្លាម។ ចំណែកអ្នកមិនកាន់សាសនាអ៊ីស្លាមក៏អាចធ្វើដំណើរទៅកាន់ទីលានវិហារអ៊ីស្លាមបានដែរទៅតាមពេលម៉ោងដែលបានកំណត់ និងមិនអាចធ្វើការសូត្រធម៌ និងបន់ស្រន់នៅទីនោះបានទេ។ តែគេបានសង្កេតឃើញថានារយៈពេលប៉ុន្មានឆ្នាំចុងក្រោយនេះ មានជនជាតិជ្វីហ្វកាន់តែច្រើន ពិសេសអ្នកជាតិនិយម និងអ្នកជ្រុលនិយមបានធ្វើដំណើរទៅកាន់ទីលានវិហារអ៊ីស្លាម ព្រមទាំងធ្វើការបន់ស្រន់ដោយលួចលាក់។ ជារឿយៗ មានការប្រឈមមុខដាក់គ្នាយ៉ាងហឹង្សារវាងប្រជាជនប៉ាឡេស្ទីន និងកម្លាំងប៉ូលិសអ៊ីស្រាអែលនៅទីលានវិហារអ៊ីស្លាមនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ