អ៊ីរ៉ង់ព្រមានអ៊ីស្រាអែលកុំឲ្យដើរឆ្លងហួសខ្សែបន្ទាត់ក្រហមនៅឈូងសមុទ្រពែក្ស
អ៊ីរ៉ង់បានដំឡើងសំឡេងព្រមានអ៊ីស្រាអែលនៅថ្ងៃចន្ទ ទី២៨ ធ្នូថាកុំឲ្យដើរឆ្លងចូលខ្សែបន្ទាត់ក្រហមនៅក្នុងឈូងសមុទ្រពែក្សឲ្យសោះ។ ការព្រមានរបស់អ៊ីរ៉ង់នេះធ្វើឡើងនៅពេលដែលតំណែងជាប្រធានាធិបតីអាមេរិករបស់លោកដូណាល់ ត្រាំ នឹងត្រូវអស់សុពលភាពក្នុងរយៈពេល ២៣ថ្ងៃទៀត និងបន្ទាប់ពីអ៊ីស្រាអែលបានដាក់ពង្រាយនាវាមុជទឹកនៅទីនោះ។
ចុះផ្សាយនៅថ្ងៃ៖
ស្តាប់ - ០២:៣៥
អ្នកនាំពាក្យក្រសួងការបរទេសអ៊ីរ៉ង់លោកស៊ែអ៊ីត ខាធីបហ្សាដេហ្ស (Saeed Khatibzadeh) បាននិយាយថា សាធារណរដ្ឋអ៊ីស្លាមនឹងការពារខ្លួនប្រឆាំងទល់នឹងវត្តមានយោធាអាមេរិកណាមួយនៅតំបន់ឈូងសមុទ្រពែក្ស មិនថានៅថ្ងៃមុនប្រគល់អំណាចទៅឲ្យលោកចូ បៃដិន នាថ្ងៃទី ២០ ខែមករា ឆ្នាំ២០២១។
ប្រតិកម្មរបស់អ៊ីរ៉ង់ធ្វើឡើងមួយសប្តាហ៍ បន្ទាប់ពីកងទ័ពជើងទឹកអាមេរិកបានប្រកាសពីការពង្រាយនាវាមុជទឹកបំពាក់ដោយកាំជ្រួចនុយក្លេអ៊ែរនៅឯឈូងសមុទ្រពែក្ស ដើម្បីបង្ហាញសាច់ដុំបន្ថែមទៀតទៅកាន់អ៊ីរ៉ង់។
មួយវិញទៀត ប្រព័ន្ធផ្សព្វផ្សាយនៅក្នុងប្រទេសអ៊ីស្រាអែលបានរាយការណ៍ថា នាវាមុជទឹក អ៊ីស្រាអែលមួយគ្រឿង ក៏បានបរឆ្លងកាត់ព្រែកជីកស៊ុយអែស (Suez Canal Suez) ឆ្ពោះទៅកាន់តំបន់ឈូងសមុទ្រដែរ។ យ៉ាងណាក៏ដោយ អាជ្ញាធរអ៊ីស្រាអែលនៅមិនបានចេញមុខបកស្រាយអ្វីនោះទេថាតើសេចក្តីរាយការណ៍នេះពិត ឬក៏មិនពិតយ៉ាងណានោះ។
អ្នកនាំពាក្យក្រសួងការបរទេសអ៊ីរ៉ង់ បានលើកឡើងនៅក្នុងសន្និសីទសារព័ត៌មានតាមអនឡាញមួយថា "អ្នករាល់គ្នាដឹងហើយពីអ្វី ដែលឈូងសមុទ្រពែក្សតំណាងឲ្យអ៊ីរ៉ង់... ។ “មនុស្សគ្រប់គ្នា ដឹងច្បាស់ណាស់ពីហានិភ័យថាវាមានកម្រិតខ្ពស់ប៉ុនណានោះ ប្រសិនបើគំនូសបន្ទាត់ក្រហមរបស់អ៊ីរ៉ង់ ត្រូវគេបំពានដើរឆ្លងកាត់ហួសចូល។
ជាមួយគ្នានេះ ក្រុងតេហេរ៉ង់បានបញ្ជាក់ទៀតថាខ្លួនមិនចង់បង្កើនភាពតានតឹងនោះទេជាមួយសហរដ្ឋអាមេរិក និងបានអំពាវនាវឲ្យមានការគោរពនូវខ្សែបន្ទាត់ព្រំដែន។ មិនតែប៉ុណ្ណោះ រដ្ឋាភិបាលអ៊ីរ៉ង់ ក៏បានផ្ញើរជាសារព្រមានទៅរដ្ឋាភិបាលចាំផ្ទះអាមេរិកបច្ចុប្បន្ន និងប្រទេសផ្សេងទៀតនៅក្នុងតំបន់រួចរាល់ហើយដែរថាកុំឲ្យធ្វើសកម្មភាពអ្វីផ្តេសផ្តាសឲ្យសោះ។
គួរជ្រាបថា ភាពតានតឹងដែលមានអាយុកាលជាច្រើនទសវត្សរ៍រវាងទីក្រុងវ៉ាស៊ីនតោន និងតេហេរ៉ង់ បានកើនឡើងយ៉ាងខ្លាំងចាប់តាំងពីឆ្នាំ ២០១៨ នៅពេលដែលលោកត្រាំ សម្រេចដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ដោយឯកតោភាគី។
ប្រទេសគូសត្រូវទាំងពីរ វិះតែឈានដល់ការផ្ទុះសង្គ្រាមនឹងគ្នាពីរដងទៅហើយចាប់តាំងពីខែមិថុនា ឆ្នាំ ២០១៩ ជាពិសេសបន្ទាប់ពីអាមេរិកបានសម្លាប់ឧត្តមសេនីយ៍អ៊ីរ៉ង់ កាសឹម សូឡីម៉ានី នៅក្នុងការវាយប្រហារដោយយន្តហោះដ្រូននៅក្រុងបាកដាដកាលពីដើមឆ្នាំ ២០២០។
លើសពីនេះ នៅតែពីរខែមុនការផ្ទេរអំណាចទៅឲ្យប្រធានាធិបតីជាប់ឆ្នោតលោកចូ បៃដិន លោកដូណាល់ ត្រាំ ថែមទាំងបានពិចារណាចង់បើកការវាយប្រហារលើមជ្ឈមណ្ឌលនុយក្លេអ៊ែរអ៊ីរ៉ង់ទៀតផង។ នេះតាមព័ត៌មានដែលមានចុះផ្សាយដោយកាសែត New York Times កាលពីទីសប្តាហ៍ទី២ នៃខែវិច្ឆិកាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ