អ៊ីរ៉ង់ និងចិនកំពុងចរចាគ្នាលើកិច្ចព្រមព្រៀងដៃគូយុទ្ធសាស្រ្តរយៈពេល ២៥ឆ្នាំ
នៅក្នុងប្រទេសអ៊ីរ៉ង់ រដ្ឋមន្រ្តីក្រសួងការបរទេសលោកម៉ូហាម៉ាដ យ៉ាវ៉ាដ ហ្សារីហ្វបានធានាក្នុងថ្ងៃអាទិត្យ ទី៥ កក្កដាថា អ៊ីរ៉ង់កំពុងចរចាជាមួយចិនលើកិច្ចព្រមព្រៀងដៃគូយុទ្ធសាស្រ្តមួយរយៈពេល ២៥ឆ្នាំ និងបញ្ជាក់ថា គ្មានរឿងសម្ងាត់អ្វីនៅក្នុងកិច្ចព្រមព្រៀងនោះទេ។ ការធានាអះអាងរបស់លោកហ្សារីហ្វដូចនេះបានធ្វើឡើង បន្ទាប់ពីអតីតប្រធានាធិបតីអ៊ីរ៉ង់លោកម៉ាមូដ អាម៉ាឌីណេយ៉ាដបានថ្លែងបរិហារក្នុងថ្ងៃទី២៧ មិថុនាថា អ៊ីរ៉ង់កំពុងចរចាលើកិច្ចព្រមព្រៀងរយៈពេល ២៥ឆ្នាំជាមួយប្រទេសមួយ។ សម្តីរបស់លោកអាម៉ាឌីណេយ៉ាដពេលនោះបានបង្កឲ្យមានរឿងអាស្រូវយ៉ាងផុសផុលនៅលើបណ្តាញសង្គមអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:៣៤
គឺនៅចំពោះមុខក្រុមសមាជិកសភាដែលប្រមុខការទូតអ៊ីរ៉ង់លោកម៉ូហាម៉ាដ យ៉ាវ៉ាដ ហ្សារីហ្វបានប្រកាសពីការចរចាជាមួយចិនលើកិច្ចព្រមព្រៀងដៃគូយុទ្ធសាស្រ្តមួយរយៈពេល ២៥ឆ្នាំ។ « គ្មានអ្វីអាថ៌កំបាំងនៅក្នុងកិច្ចចរចាដែលកំពុងធ្វើជាមួយចិន ហើយប្រទេសជាតិនឹងទទួលបានព័ត៌មាននេះយ៉ាងលំអិតនៅពេលដែលកិច្ចព្រមព្រៀងមួយត្រូវបានរកឃើញ » នេះជាការថ្លែងរបស់លោកហ្សារីហ្វ។ តាមប្រមុខការទូតអ៊ីរ៉ង់រូបនេះដដែល កិច្ចចរចាដែលអ៊ីរ៉ង់កំពុងបន្តមានជាមួយចិនបានផ្តោតលើការវិនិយោគក្នុងវិស័យជាច្រើន។
ទន្ទឹមគ្នានេះ លោកយ៉ាវ៉ាដ ហ្សារីហ្វបានបន្ថែមដោយបញ្ជាក់ច្បាស់ៗថា ព័ត៌មានស្តីពីកិច្ចចរចារវាងអ៊ីរ៉ង់ និងចិនពេលនេះក៏ធ្លាប់បានប្រកាសជាសាធារណៈនៅក្នុងដំណើរទស្សនកិច្ចរបស់ប្រធានាធិបតីចិនលោកស៊ី ជីនពីងក្នុងប្រទេសអ៊ីរ៉ង់កាលពីខែមករា ឆ្នាំ ២០១៦ ដែរ។ នៅក្នុងសេចក្តីប្រកាសព័ត៌មានរួមនាឱកាសវត្តមានលោកស៊ី ជីនពីងលើទឹកដីអ៊ីរ៉ង់ ប្រទេសទាំងពីរបានសន្យាចរចាលើកិច្ចព្រមព្រៀងសហប្រតិបត្តិការរវាងគ្នាសម្រាប់រយៈពេល ២៥ឆ្នាំដោយផ្តោតលើការវិនិយោគទៅវិញ ទៅមកនៅក្នុងវិស័យផ្សេងៗ ពិសេសដឹកជញ្ជូន ថាមពល ឧស្សាហកម្ម និងសេវាកម្ម។
ចំណែកប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលលោកអាលី ខាមេណីក៏ធ្លាប់បានគាំទ្រលើកិច្ចចរចារវាងអ៊ីរ៉ង់ និងចិននេះដោយបញ្ជាក់ថា រដ្ឋាភិបាល និងប្រជាជនអ៊ីរ៉ង់ស្វែងរកដូចដែលខ្លួនធ្លាប់បានធ្វើកន្លងមកនូវការពង្រីកទំនាក់ទំនងជាមួយបណ្តាប្រទេសឯករាជ្យ និងគួរឲ្យទុកចិត្តបាន ដូចជាប្រទេសចិន។ ចិនជាដៃគូពាណិជ្ជកម្មទី១ របស់អ៊ីរ៉ង់ និងជាអតិថិជនដ៏សំខាន់ម្នាក់ដែលទិញប្រេងអ៊ីរ៉ង់ច្រើនជាងគេនៅមុនសហរដ្ឋអាមេរិកបានដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់។ ការចេញមុខធានារបស់លោកហ្សារីហ្វពេលនេះធ្វើឡើង បន្ទាប់ពីមានការលើកឡើងរបស់អតីតប្រធានាធិបតីអ៊ីរ៉ង់លោកម៉ាមូដ អាម៉ាឌីណេយ៉ាដក្នុងថ្ងៃទី២៧ មិថុនាដែលថា អ៊ីរ៉ង់កំពុងចរចាលើកិច្ចព្រមព្រៀងរយៈពេល ២៥ឆ្នាំជាមួយប្រទេសមួយ។
សម្តីបរិហាររបស់លោកអាម៉ាឌីណេយ៉ាដដូចនេះបានបង្កឲ្យមានរឿងអាស្រូវយ៉ាងផុសផុលនៅលើបណ្តាញសង្គមអ៊ីរ៉ង់តាំងពីប៉ុន្មានថ្ងៃជាប់គ្នា។ គួរបញ្ជាក់ថានៅក្រោយការបោះឆ្នោតសភាក្នុងខែកុម្ភៈ សភាថ្មីអ៊ីរ៉ង់កំពុងស្ថិតក្នុងដៃក្រុមអភិរក្សនិយម និងក្រុមជ្រុលនិយម។ ក្រុមទាំងពីរនេះតែងបានរិគន់រដ្ឋាភិបាលដឹកនាំដោយប្រធានាធិបតីកណ្តាលនិយមលោកហាសាន រ៉ូហានី ពិសេសរិះគន់លើកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដែលលោកហ្សារីហ្វបានព្រមព្រៀងជាមួយសហគមន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ