អាមេរិកដាក់ទណ្ឌកម្មលើក្រុមហ៊ុនចិនពីបទបានទិញប្រេងពីអ៊ីរ៉ង់
នៅថ្ងៃពុធ ទី២៥ កញ្ញា អាមេរិកតាមរយៈប្រមុខការទូតលោកម៉ៃ ប៉ុមប៉េអូបានដាក់ទណ្ឌកម្មលើក្រុមហ៊ុនចិន ព្រមទាំងថ្នាក់ដឹកនាំក្រុមហ៊ុនក្នុងបទបានទិញប្រេងពីអ៊ីរ៉ង់។ លោកប៉ុមប៉េអូបានថ្លែងយ៉ាងដូចនេះនាឱកាសសន្និសីទរៀបចំដោយក្រុមសម្ពាធ United Against Nuclear Iran នៅក្នុងទីក្រុងញូយ៉ក។ តាមលោកប៉ុមប៉េអូ ទង្វើរបស់ក្រុមហ៊ុនចិនទាំងនេះជាការរំលោភលើបំរាមរបស់អាមេរិកដែលហាមមិនឲ្យរកស៊ីជាមួយរបបដឹកនាំអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:០៦
លោកម៉ៃ ប៉ុមប៉េអូមិនបានប្រាប់ឈ្មោះក្រុមហ៊ុន និងឈ្មោះថ្នាក់ដឹកនាំក្រុមហ៊ុនចិនដែលត្រូវទទួលទណ្ឌកម្មដោយសារការទិញប្រេងពីអ៊ីរ៉ង់នោះទេ។ តែអ្វីដែលគេអាចនិយាយបាន បញ្ជីទណ្ឌកម្មប្រឆាំងនឹងក្រុមហ៊ុនបរទេស រួមទាំងថ្នាក់ដឹកនាំក្រុមហ៊ុនដែលរកស៊ីជាមួយអ៊ីរ៉ង់មានកាន់តែវែងឡើងៗ។ « យើងនិយាយទៅកាន់ចិន និងគ្រប់ប្រទេសទាំងអស់ថា យើងនឹងដាក់ទណ្ឌកម្មលើគ្រប់ការរំលោភលើបំរាមរបស់យើងដែលហាមមិនឲ្យធ្វើជំនួញជាមួយអ៊ីរ៉ង់ » នេះជាការថ្លែងរបស់លោកប៉ុមប៉េអូនាឱកាសសន្និសីទរៀបចំដោយក្រុមសម្ពាធ United Against Nuclear Iran នៅក្នុងទីក្រុងញូយ៉ក។
ប្រមុខការទូតអាមេរិករូបនេះដដែលបានពន្យល់បន្ថែមថា ចំណាត់ការរបស់រដ្ឋបាលអាមេរិកពេលនេះជាការចាប់អនុវត្តតាមពាក្យសន្យារបស់លោកដូណាល់ ត្រាំដែលបានថ្លែងនៅលើវេទិកាមហាសន្និបាតអង្គការសហប្រជាជាតិនាថ្ងៃអង្គារ ទី២៤ កញ្ញាថា ដរាបណាអ៊ីរ៉ង់នៅតែមានឥរិយាបទគំរាមកំហែង ដរាបនោះអាមេរិកមិនដកទណ្ឌកម្មចេញ និងថែមទាំងបន្តឹងឲ្យកាន់តែខ្លាំងថែមទៀត។ ក្រៅពីសំដៅលើក្រុមហ៊ុនបរទេសដែលរកស៊ីជាមួយអ៊ីរ៉ង់ លោកប៉ុមប៉េអូក៏បានប្រកាសចេញនូវវិធានការថ្មីប្រឆាំងនឹងកងឆ្មាំបដិវត្តអ៊ីរ៉ង់ដែរ។
អ្វីដែលគ្រប់គ្នាកំពុងរង់ចាំមើលគឺថា តើអាចមានដែរឬទេនូវជំនួបរវាងប្រធានាធិបតីអាមេរិកលោកត្រាំ និងសមភាគីលោករ៉ូហានី។ « អ៊ីរ៉ង់មិនជឿលើភាពស្មោះត្រង់របស់ឆន្ទៈអាមេរិកក្នុងការចរចាទេ » នេះជាការថ្លែងរបស់លោករ៉ូហានីនៅលើវេទិកាមហាសន្និបាតអង្គការសហប្រជាជាតិនាថ្ងៃពុធ ទី២៥ កញ្ញា។ គួររម្លឹកថា ថ្នាក់ដឹកនាំអឺរ៉ុប និងអាស៊ីដែលកំពុងចូលរួមនៅក្នុងមហាសន្និបាតអង្គការសហប្រជាជាតិក្នុងទីក្រុងញូយ៉កបានប្រឹងប្រែងព្យាយាមរៀបចំឲ្យមានជំនួបទ្វេភាគីរវាងប្រធានាធិបតីអាមេរិកលោកត្រាំ និងសមភាគីអ៊ីរ៉ង់លោករ៉ូហានីក្នុងទីក្រុងញូយ៉ក។ ប្រធានាធិបតីបារាំងលោកម៉ាក្រុងថែមទាំងបានយល់ឃើញកាលពីយប់ថ្ងៃអង្គារ ទី២៤ កញ្ញថា លក្ខខណ្ឌនៃជំនួបរវាងលោកត្រាំ និងលោករ៉ូហានីត្រូវបានបង្កើតឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ