ការសម្លាប់ឧត្តមសេនីយអ៊ីរ៉ង់កាសឹម សូឡីម៉ានីបាននឹងកំពុងពង្រឹងចលនាគាំទ្រអ៊ីរ៉ង់កាន់តែខ្លាំង!
ចុះផ្សាយនៅថ្ងៃ៖
ស្តាប់ - ០៥:០១
ព្រឹត្តិការណ៍បាញ់សម្លាប់ឧត្តមសេនីយអ៊ីរ៉ង់កាសឹម សូឡីម៉ានីក្រោមបញ្ជារបស់ប្រធានាធិបតីអាមេរិកលោកដូណាល់ ត្រាំក្នុងទឹកដីអ៊ីរ៉ាក់កាលពីថ្ងៃសុក្រ ទី៣ មករាកំពុងបន្តជាបច្ចុប្បន្នភាពយ៉ាងក្តៅគគុក។ នៅក្នុងពិធីបុណ្យសពលោកសូឡីម៉ានីនៅអ៊ីរ៉ង់នាថ្ងៃចន្ទ ទី៦ មករា ពលរដ្ឋអ៊ីរ៉ង់ជាច្រើនលាននាក់នៅទូទាំងប្រទេសបានអំពាវនាវឲ្យមានការសងសឹងចាស់ដៃប្រឆាំងអាមេរិក។ តាមក្រុមអ្នកជំនាញ ការដែលលោកត្រាំបានសម្រេចចិត្តសម្លាប់ឧត្តមសេនីយអ៊ីរ៉ង់សូឡីម៉ានីមកពីលោកចង់កម្ទេចឆ្អឹងខ្នងរបស់ចលនាអ៊ីស្លាមឈីអ៊ីតដែលប្រឆាំងអាមេរិកនៅមជ្ឈិមបូព៌ា។ តែខុសពីការគិតទុក ឃាតកម្មសម្លាប់ឧត្តមសេនីយអ៊ីរ៉ង់រូបនេះបែរជាបានពង្រីក និងពង្រឹងបណ្តាញតស៊ូរបស់ចលនាឈីអ៊ីតនៅក្នុងតំបន់ទៅវិញ។ ទន្ទឹមគ្នានេះ ទង្វើរបស់លោកត្រាំក៏បានធ្វើឲ្យពលរដ្ឋអ៊ីរ៉ង់រួមសាមគ្គីគ្នាជាធ្លុងមួយនៅពីក្រោយរបបសាធារណរដ្ឋអ៊ីស្លាមអ៊ីរ៉ង់កាន់តែខ្លាំងឡើងដែរ។
« សងសឹកឲ្យចាស់ដៃ » នេះជាពាក្យសន្យាដែលគេបានឮចេញពីបបូរមាត់ពលរដ្ឋអ៊ីរ៉ង់គ្រប់រូប និងថ្នាក់ដឹកនាំនយោបាយអ៊ីរ៉ង់គ្រប់និន្នាការទាំងអស់តាំងពីប្រធានាធិបតីលោកហាសាន រ៉ូហានីដែលគេស្គាល់ជាអ្នកកណ្តាលនិយមដល់ប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលលោកអាលី ខាមេណីដែលគេស្គាល់ជាអ្នកអភិរក្សនិយម។ « ស្លាប់ទៅអាមេរិក។ អាមេរិកត្រូវដឹងថា ពួកគេជាអ្នកចាប់ផ្តើមរឿងនេះ តែយើងនឹងជាអ្នកបញ្ចប់វា។ ឧត្តមសេនីយអ៊ីរ៉ង់កាសឹម សូឡីម៉ានីជាវីរៈជន។ គាត់ជាអ្នកវាយឈ្នះអង្គការរដ្ឋអ៊ីស្លាមនៅក្នុងប្រទេសអ៊ីរ៉ាក់ និងប្រទេសស៊ីរី » ទាំងសុទ្ធសឹងជាការថ្លែងរបស់បាតុករអ៊ីរ៉ង់។ « អ្វីដែលអាមេរិកបានធ្វើ ជាបទឧក្រិដ្ឋមួយ » នេះជាការបញ្ជាក់របស់បាតុករស្រ្តីអ៊ីរ៉ង់ម្នាក់។
គួររម្លឹកថាមានអាយុ ៦២ឆ្នាំ ឧត្តមសេនីយអ៊ីរ៉ង់កាសឹម សូឡីម៉ានីត្រូវបានទ័ពអាមេរិកបាញ់សម្លាប់នៅយប់ថ្ងៃព្រហស្បតិ៍ឆ្លងចូលថ្ងៃសុក្រ ទី៣ មករាក្នុងទីក្រុងបាកដាដ ប្រទេសអ៊ីរ៉ាក់។ លោកសូឡីម៉ានីជាឥស្សរជនអ៊ីរ៉ង់ម្នាក់ដែលមានឥទ្ធិពល និងមានប្រជាប្រិយភាពខ្លាំងណាស់នៅក្នុងប្រទេសអ៊ីរ៉ង់។ ក្នុងនាមជាមេបញ្ជាការកម្លាំងអាល់ កូដដែលជាកងឯកភាពមួយនៃកងឆ្មាំបដិវត្តន៍អ៊ីរ៉ង់ លោកសូឡីម៉ានីបានដឹកនាំប្រតិបត្តិការនៅក្រៅទឹកដីអ៊ីរ៉ង់ និងត្រូវបានគេចាត់ទុកជាឥស្សរជនគន្លឹះដែលបានដើរតួនាទីយ៉ាងសំខាន់ក្នុងការពង្រឹង និងពង្រីកឥទ្ធិពលរបស់អ៊ីរ៉ង់នៅមជ្ឈិមបូព៌ា ពិសេសនៅអ៊ីរ៉ាក់ និងនៅស៊ីរី។ ក្រោមភ្នែកចម្រុះរបស់រដ្ឋបាលអាមេរិកាំង គឺឧត្តមសេនីយអ៊ីរ៉ង់រូបនេះឯងដែលបានស្ថិតនៅពីក្រោយការបះបោររបស់ក្រុមឈីអ៊ីតប្រឆាំងអាមេរិកនៅតំបន់មជ្ឈិមបូព៌ា និយាយជារួម និងនៅក្នុងប្រទេសអ៊ីរ៉ាក់ និយាយដោយឡែក។
សម្រាប់ក្រុងវ៉ាស៊ីនតោន សម្លាប់ឧត្តមសេនីយអ៊ីរ៉ង់កាសឹម សូឡីម៉ានីដែលមានឋានៈស្មើនឹងប្រមុខ CIA និងមេបញ្ជាការប្រតិបត្តិការពិសេសរួមបញ្ចូលគ្នា គឺមានន័យស្មើនឹងកំចាត់បុរសខ្លាំងទី២ របស់អ៊ីរ៉ង់។ សម្រាប់លោកដូណាល់ ត្រាំ ការសម្លាប់បានឧត្តមសេនីយអ៊ីរ៉ង់រូបនេះជាការបំបាក់ឆ្អឹងខ្នងរបស់ចលនាឈីអ៊ីតគាំទ្រអ៊ីរ៉ង់ប្រឆាំងអាមេរិក និងផលប្រយោជន៍អាមេរិកនៅតំបន់មជ្ឈិមបូព៌ា។ តែក្រុមអ្នកជំនាញបានមើលឃើញថា អ្វីដែលលោកត្រាំបានគិត គឺខុសស្រឡះ ហើយអ្វីដែលលោកត្រាំបានធ្វើ គឺច្រឡំធំណាស់។ ផ្ទុយពីការយល់ឃើញរបស់លោកត្រាំ ការសម្លាប់ឧត្តមសេនីយអ៊ីរ៉ង់កាសឹម សូឡីម៉ានីបែរជាបានពង្រីក និងពង្រឹងបណ្តាញតស៊ូរបស់ចលនាឈីអ៊ីតនៅលើឆាកអន្តរជាតិទៅវិញ។ ចំណែកនៅក្នុងទឹកដីអ៊ីរ៉ង់ឯណោះវិញ មរណៈភាពរបស់លោកសូឡីម៉ានីបានធ្វើឲ្យពលរដ្ឋអ៊ីរ៉ង់រួមសាមគ្គីគ្នាជាធ្លុងមួយនៅពីក្រោយរបបសាធារណរដ្ឋអ៊ីស្លាមអ៊ីរ៉ង់កាន់តែខ្លាំងឡើង។
ពីប្រទេសលីបង់ទៅប្រទេសស៊ីរី យេម៉ែន និងដែនដីប៉ាឡេស្ទីនដោយឆ្លងកាត់ប្រទេសអ៊ីរ៉ាក់ កំហឹងសងសឹងប្រឆាំងអាមេរិកចំពោះការស្លាប់ឧត្តមសេនីយអ៊ីរ៉ង់សូឡីម៉ានីបានលាន់ឮយ៉ាងកងរំពង។ ជាក់ស្តែងនៅអ៊ីរ៉ាក់ មេដឹកនាំឈីអ៊ីតលោកម៉ុកតាដា សាដបានដាក់ឲ្យដំណើរការឡើងវិញនូវកងទ័ព Mehdi និងបានអំពាវនាវឲ្យគ្រប់ចលនានៅអ៊ីរ៉ាក់បង្កើតចលនាតស៊ូអន្តរជាតិមួយភ្លាមៗ។ សូម្បីតែលោកកាអ៊ីស អាល់ខាហ្សានីដែលជាអតីតអនុសេនីយ៍ត្រី និងជាសត្រូវផ្ទាល់ខ្លួនរបស់លោកម៉ុកតាដា សាដសព្វថ្ងៃក៏បានរួមសាមគ្គីដើម្បីប្រឆាំងនឹងអាមេរិកដែរ។ ចំណែកក្រុមអ្នកតំណាងរាស្រ្តឈីអ៊ីតអ៊ីរ៉ាក់បានស្នើរដ្ឋាភិបាលឲ្យបណ្តេញកម្លាំងទ័ពអាមេរិកចេញពីអ៊ីរ៉ាក់ ហើយគ្រប់គណបក្សនយោបាយបានរួមដៃគ្នាប្រឆាំងអាមេរិកដោយទុកចោលមួយកន្លែងនូវការខ្វែងគំនិតគ្នា។
នៅលីបង់ ប្រមុខចលនាហេស្បូឡាលោកហាសាន ណាស្រាឡាដែលជាមិត្តជិតដិតនឹងឧត្តមសេនីយអ៊ីរ៉ង់កាសឹម សូឡីម៉ានីបានយល់ឃើញថា ឃាតកម្មសម្លាប់លោកសូឡីម៉ានីមិនមែនជារឿងផ្ទៃក្នុងអ៊ីរ៉ាក់មួយទេ តែមានជាប់ទាក់ទងនឹងប្រជាជាតិអ៊ីស្លាមទាំងអស់។ ចំណែកនៅអ៊ីរ៉ង់ឯណោះវិញ ឃាតកម្មឧត្តមសេនីយសូឡីម៉ានី និងបញ្ហាសន្តិសុខបានក្លាយជាប្រធានរឿងអាទិភាពចូលជំនួសបញ្ហាសេដ្ឋកិច្ច សង្គម និងវប្បធម៌។ ពលរដ្ឋអ៊ីរ៉ង់គ្រប់រូប និងថ្នាក់ដឹកនាំនយោបាយគ្រប់និន្នាការមិនថាអ្នកកណ្តាលនិយម ឬអ្នកតឹងតែងនិយមបានរួមកម្លាំងគ្នាជាធ្លុងមួយដើម្បីប្រឆាំងអាមេរិក។ តែគេមិនត្រូវភ្លេចនិយាយទេថា រដ្ឋអំណាចនៅអ៊ីរ៉ង់ក៏អាចឆក់ឱកាសនេះដើម្បីខ្ទប់ដង្ហើមទាំងស្រុងលើចលនាបាតុកម្មរបស់ពលរដ្ឋខ្លួនចាប់ផ្តើមក្នុងថ្ងៃទី១៦ វិច្ឆិកាដែលបានប្រឆាំងនឹងការដំឡើងថ្លៃតម្លៃប្រេង។ រដ្ឋអំណាចបានបញ្ជាក់ពីការដោះស្រាយចប់សព្វគ្រប់ដោយមិនបាននិយាយពីតុល្យការនៃការបង្រ្កាបរបស់ប៉ូលិសទេ។ តែបើតាមអង្គការសិទ្ធមនុស្ស Amnesty International មានមនុស្សស្លាប់ ៣០០នាក់។
យ៉ាងណាក៏ដោយនៅចំពោះមុខ ជម្រើសសម្លាប់ឧត្តមសេនីយអ៊ីរ៉ង់កាសឹម សូឡីម៉ានីរបស់អាមេរិកដោយគិតថាជាការបំបាក់ឆ្អឹងខ្នងចលនាឈីអ៊ីតអ៊ីរ៉ង់ ឬមួយជាការបញ្ចប់ការលូកដៃរបស់អ៊ីរ៉ង់នៅអ៊ីរ៉ាក់ជាកំហុសឆ្គងយុទ្ធសាស្រ្តមួយ ព្រោះចម្លើយសងសឹកដែលអាមេរិកកំពុងរង់ចាំពេលនេះ គឺមកពីតំបន់ទាំងមូល ពោលមិនមែនត្រឹមពីអ៊ីរ៉ង់ ឬពីអ៊ីរ៉ាក់ប៉ុណ្ណោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ