ជនភៀសខ្លួននៅកោះណូរូត្រូវទទួលទោសពិន័យជាប្រាក់ពីបទប៉ុនប៉ងធ្វើអត្តឃាត
ជនភៀសខ្លួនអ៊ីរ៉ង់ម្នាក់ ដែលកំពុងស្ថិតនៅក្នុងជំរំជនភៀសខ្លួននៅលើកោះណូរូ ត្រូវបានតុលាការកាត់ទោសពិន័យជាប្រាក់ ពីបទថាបានប៉ុនប៉ងសម្លាប់ខ្លួនឯង។ ការកាត់ទោសដែលធ្វើឲ្យមានការបរិហាររិះគន់យ៉ាងខ្លាំងក្លា ទាំងពីសំណាក់អង្គការក្រៅរដ្ឋាភិបាល និងពីសំណាក់សមាជិកព្រឹទ្ធសភារបស់អូស្រ្តាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
យោងតាមការផ្សាយរបស់បណ្តាញព័ត៌មានអូស្រ្តាលី ABC ជនភៀសខ្លួនដែលត្រូវតុលាការផ្តន្ទាទោសនេះ គឺជាជនជាតិអ៊ីរ៉ង់ មានកូនស្រីម្នាក់អាយុ ៨ឆ្នាំ ហើយបានជាប់ឃុំនៅក្នុងជំរំជនភៀសខ្លួននៅលើកោះណូរូ អស់រយៈពេល ២ឆ្នាំមកហើយ។ ជំរំជនភៀសខ្លួននៅលើកោះណូរូ តែស្ថិតក្រោមការចាត់ចែងរបស់អូស្រ្តាលី។ ជនភៀសខ្លួនរូបនេះបានព្យាយាមសម្លាប់ខ្លួនឯង នៅពេលដែលខ្លួនរួមជាមួយនឹងកូនស្រីចង់ចេញទៅរស់នៅខាងក្រៅ ប៉ុន្តែ ត្រូវប៉ូលិសទៅចាប់យកមកវិញ។
ពីដំបូង រដ្ឋអាជ្ញានៃកោះណូរូបានទាមទារឲ្យតុលាការដាក់ទោសជនភៀសខ្លួននេះឲ្យជាប់ពន្ធនាគារ ពី ១ខែ ទៅ២ខែ ដោយលើកឡើងថា ការដាក់ទោសធ្ងន់បែបនេះ គឺដើម្បីធ្វើជាគំរូដល់ជនភៀសខ្លួនផ្សេងទៀត កុំឲ្យយកការសម្លាប់ខ្លួនមកធ្វើជាមធ្យោបាយក្នុងការទាមទារតាមអ្វីដែលពួកគេចង់បាន។ ក៏ប៉ុន្តែ នៅទីចុងបំផុត តុលាការមិនបានប្រកាសទោសពន្ធនាគារនោះទេ ដោយសម្រេចឲ្យពិន័យត្រឹមតែជាលុយចំនួន ២០០ដុល្លារអូស្រ្តាលី ដែលស្មើនឹង ១៥៥ដុល្លារអាមេរិក។
គួរបញ្ជាក់ឡើងវិញថា កោះណូរូ គឺជាកោះមួយក្នុងចំណោមប្រទេសជាកូនកោះផ្សេងទៀត នៅក្នុងមហាសមុទ្រប៉ាស៊ីហ្វិក ដែលអូស្រ្តាលីយកធ្វើជាទីតាំងបង្កើតជំរំជនភៀសខ្លួន ដែលព្យាយាមចូលទៅសុំសិទ្ធិជ្រកកោនក្នុងប្រទេសអូស្រ្តាលី។ ជារឿយៗ គេសង្កេតឃើញមានការរិះគន់យ៉ាងច្រើនពីសំណាក់អង្គការសិទ្ធិមនុស្ស ជុំវិញលក្ខខណ្ឌនៃការរស់នៅរបស់ជនភៀសខ្លួននៅក្នុងជំរំអស់ទាំងនេះ។
ករណីជនភៀសខ្លួនធ្វើអត្តឃាតនៅក្នុងជំរំជនភៀសខ្លួនអស់ទាំងនេះក៏ធ្លាប់កើតមានជាច្រើនលើករួចមកហើយដែរ។ យោងតាមរបាយការណ៍ចេញផ្សាយកាលពីខែមករាកន្លងទៅនេះ គ្រាន់តែនៅក្នុងរយៈពេលមួយឆ្នាំ គិតពីខែកក្កដាឆ្នាំ២០១៤ ដល់ខែកក្កដាឆ្នាំ២០១៥ មានករណីជនភៀសខ្លួនធ្វើអត្តឃាត ឬប៉ុនប៉ងធ្វើអត្តឃាតរហូតដល់ទៅ ១៨៨ករណី នៅក្នុងជំរំជនភៀសខ្លួននៅលើកោះណូរូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ